ئانە ماوەو ٣٠ ساڵان جمېیەرو ئازادیی کوردی جە ئەڵمانیانە تاوانبار مکریۆ. گرڎو حکومەتەکا، چ لایەنو CDU ی بۆ یان SPD، ئی سیاسەتەشا پەیڕەو کەردەن. بە تایبەتی قەڎەغەکەردەی پەکەکەی بنەماو پاشێلکەردەی مافو مرۆڤیش دژو کوردا جە ئەڵمانیانە چنەگنۆوە.

جە بانگەوازەکەنە، گلاسنێر-هومێل و شامبەر یاڎشا ئاوردۆ کە جە ساڵەکا ٢٠١٣-٢٠١٥ جە کاتو پرۆسەو ئاشتینە جە تورکیا، هۊرشېونایۆ قەڎەغەکەردەی پەکەکەی کۊت ۋەرو باسی، و ئاماژەشا پانەی کەرڎ کە ڕەنگە جارێوەتەر دەرفەتێوە پەی گفتوگۆیۍ هامشێوەی بۍ ئاراوە. ڕامېیاریمەدارا ئەرەیاۋناشا پەی ئانەی جارێوەتەر هەوڵو هۊرگېرتەی قەڎەغەکەردەکەی وزیۆ ڕۆژەڤی سیاسییوە، پەنەوازا DIE LINKE بەشێوێوە بەهێز بلۆ پەرلەمانۆ.

پارتو دۆسو کوردا: DIE LINKE

DIE LINKE جە ساڵۊو ٢٠١٤ی پەی لابەردەی قەڎەغەکەردەی پەکەکەی پڕۆژە یاسێوەش پێشکەش بە پەرلەمانی کەرڎ پېسە پارتی یووەمی. DIE LINKE جە ئەڵمانیا ۋێش پېسە بەهێزتەرین هامپەیمانی جمېیەری ئازادیوازی کوردی نیشانە مڎۆ. باس چانەیچ کریان کە چی هۊرچنیەینە مشۊم جە گرڎ ڕوێوە بەهێز بلۆ پەرلەمان.

مردنای ورەتەی چەکی

هەرپاسە ئەرەیاۋېیان کە بایربۆک جە ئەنقەرەنە داواش کەردەبۍ کە یەپەگە و یەپەژە چەکۍ بکریا و هابەک سەرۆکو پارتو سەوزی ئەرەیاۋنابێش کە چەک بە تورکیای نەورەشیان، جە دژو ئا قسا دای لینک تەنیا لایەنا کە گەرەکشا دەمودەس چەک ورەتەی بە تورکیای مردۆنە. هەرپاسە ئەرەیاۋنانش کە ئەوەکۊشای سەرەکی DIE LINKE ی سەرو ئازادی کوردەسانی بۆنە.

کاندیدەکۍ کوردی

جە لیستو DIE LINKE ینە کاندیدا کوردی جانسو ئۆزدەمیر، گۆکای ئاکبولوت و فەرات کۆچاک هەنۍ. هەرپاسە جان ڤان ئاکێن سەرۆکو پارتەکەی بە ئاشکرا پەشتیوانی ۋێش پەی جمېیەرو ئازادیی کوردی بەربڕی و ئەرەیاۋناش کە یۆ جە یووەم سەرۋنەدایەکاش دماو هۊرچنیەی پەی کوردەسانی بۆ.

جە ٢٣ۍ شوباتینە دەنگ بە دای لینکی بڎەیدۍ

جە بانگەوازەکەنە ئامان ئەوەکۊشای سەرەکیما جە ئەڵمانیا، ئانەنە کە گلېرگەی کوردی جە ستەم و چەوەسنایۆ دۊڵەتی ڕزگارش بۆ، هەرپاسە بانگەواز کریان پەی ئانەی کورد و لایەنگراش دەنگێوە بەهێزشا بۆ پەنەوازا دەنگ بە DIE LINKE بڎریۆ.