جمېیەرو دۆسایەتی بەینو گەلا جە دژو نەژاڎپەرسی(MRAP) قەرارەکۍ کۆنگرەو ١٢ـەمینو پەکەکەیش وستۍ بەرنامەو کارو ئەنجوومەنو مافو مرۆڤو نەتەوە یۊگێرتەکاوە کە سەرو بنەماو 'بانگەوازو ئاشتی و گلېرگەی دیموکراتیک)ـی ٢٧و شوباتو ڕابەر ئاپۆی هۊرگیریان. مراپ گوزارشتەش پێشکەش بە ئەنجوومەنەکەی کەرد کە ئەرەنیشتەی ٥٩و ئەنجوومەنو مافو مرۆڤو نەتەوە یۊگێرتەکا جە ئۆفیسو نەتەوە یۊگێرتەکا  جە ما بەینو ١٦و حوزەیرانی و ٩و تەمووزی جە ژنێڤەنە ئەنجام مڎریۆ. جە گوزارشتەکېنە داوا جە نەتەوە یۊگێرتەکا کریان پەشتیوانی جە پرۆسەو چارەسەرینە بکەرۆ.

جە گوزارشتەکېنە وچیان، "جە تورکیانە ئەوەکۊشای پەی دڎانیای بە ئازادی و مافە بنەڕەتییەکا گەلو کوردی، جە مانگۊو ئایارینە بە بانگەوازو عەبدوڵا ئۆجالانی پەی چەکنیایرە و قەرارەکۍ کۆنگرەو ١٢ـەمینو پارتو کرێکارا کوردەسانی (پەکەکە) پڕاوە پەی قۆناغێوە تازەی." و سەرنج وزیان سەرو ئاژەو گېرتەخانەکا تورکیای و ئاستەیۆ ڕابەر ئاپۆی جە ئیمراڵیینە.

پېوەس بە ئاژەو گێرتەخانەکا تورکیای یاڎ وزیاوە کە کۆمیتەو دژ بە ئەشکەنجەو نەتەوە یۊگێرتەکا (CAT) جە مانگۊو تەمووزو ٢٠٢٤ینە جە چەمڎاریکەردەی و شۊنیرەلوای دەرەنجامەکانە، ئەرەیاۋناش جە ڕوو سەربەخۆیی دادگەری، دادوەر و پارێزنەراوە دماکۊتەیۍ جددی هەن.

هەرپاسە ئەرەیاۋېیان جە ئیمراڵینە ڕژێمێوە تایبەتو گۆشەگیری هەن و وچیا، "پا ئەزموونا جە ڕژێمی تایبەتی جە گێرتەخانەو ئیمراڵییوە بەدەسئامېنۍ، کە جە ساڵۊو ١٩٩٩یۆ عەبدوڵا ئۆجالانش ئینا چنە، سیستەمو سیاسی تورکیای، سیستەمو ئیساتۍ گێرتەخانەکاش وەشکەردەن. ئیمراڵی پېسە مېڎانێوە جبەرو سیستەمی یاسایی تورکیای سەرجەنۆ وەشکریانۆ و پیمەرە یاساییە گرڎینیەکۍ جە ئیمراڵینە جابەجێ نەکریێنۍ و پېوەس بە ئیمراڵییوە بە تایبەت فاڕیای یاسایی ئەنجام دریان." هەر جە گوزارشتەکێنە سەرنج وزیان سەرو ئاستو گۆشەگیری سەختو ئیمراڵی و شێوازو ڕاگیریکەردەی جە دیدارەکا ئیمراڵی.

جە گوزارشتەکێنە ئاماژە بە دیدارەکا ئی دماییەو ئیمراڵی کریان و جەختکریانۆ سەرو ئانەی ئی دیدارۍ بەماناو لابەردەی قەدەغەو دیدارو پارێزنەرا نمۍ و بە ئیساتێیچۆ دواکارییەکێشا جواب نمەڎریاوە.

مافو هیوای پاشێل مەکریۆ

جە گوزارشتەکېنە سەرنج وزیان سەرو قەرارو دادگاو مافو مرۆڤو ئۊروپای کە جە ١٨و ئادارو ٢٠١٤ ی پېوەس بە مافو هیواو ڕابەر ئاپۆی گێرتەنش و دەسنیشان کریان جابەجێ کەردەی ئا قەراریە جە لایەنو تورکیایۆ پاشێل کریان.

'عەبدوڵا ئۆجالان ئیرادەو ئاشتیش نیشانەدا'

جە درێژەو گوزارشتەکېنە سەرنج وزیان سەرو کۊششەکا ڕابەر ئاپۆی بە 'بانگەوازو ئاشتی و گلېرگەی دیموکراتیکی' پەی چارەسەری پرسو کوردی و ئامان: "سەرەڕاو گۆشەگیرکەردەیش جە لایەنو دۊڵەتیوە، بەڵام ئۆجالان ئیرادەو ۋێش پەی هامکاریکەردەی و سەروستەی چارەسەری ئاشتیانەو مەسەلۍ کوردی نیشان دان." جە بەردەوامیینە پېسە تەمامکاریێوە جە بانگەوازە تاریخیەکەو ڕابەر ئاپۆی، سەرنج وزیان سەرو قەرارەکا پەکەکەی و ماچۆ: "پەکەکە جە ١و ئادارو ٢٠٢٥یوە ئاېێربەسش ئەرەیاۋنا و دماتەر قەرارو دمایئاردەیش پا کار و چالاکییاشە دا کە چېرو نامۍ پەکەکەینە مەکریا."

ئەنجام و پێشنیار

جە بەشو ئەنجام و پێشنیارو گوزارشتەکێنە ئامان، "سیستەمو گۆشەگیری سەرو عەبدوڵا ئۆجالانی و سزادریایا تەری، مافە مېیاننەتەوەییەکۍ پاشێل مکەرۆ و گۊرەتەرین کۊسپا جە مەسەلۍ چارەسەری کوردینە.

چی کاتەنە کە سەرەنجو گلېرگەی مېیاننەتەوەیی ئینا سەرو دەوری هەرێمی تورکیای، نمەبۆ گرڎو ئا پاشېلکارییە نایاساییا تورکیای سەرو ئۆپۆزسیۆنی و بە تایبەت سەرو گەلو کوردی درک پنە نەکریا. پەی ئانەی پرۆسەو ئاشتی و دیموکراتیزەکەردەی سەرگنۆ مراپ ئی داواکاریە مەکەرۆ: پەنەوازا ۋەرپەرسا تورکیای قەرارەکا دادگاو مافو مرۆڤو ئۊروپای و پێشنیارەکا کۆمیتەو دژ بە ئەشکەنجەو نەتەوە یۊگێرتەکا (CAT) و کۆمیتەو مافو مرۆڤو نەتەوە یۊگێرتەکا کە ساڵەو ٢٠٢٤ی پەسیناش، جابەجێ بکەرۆ. وە پەنەوازا ئۆفیسو کۆمیسیاری گۊرەو مافو مرۆڤو نەتەوە یۊگێرتەکا بەشێوێوە تایبەت ئاگاڎارو ڕووەدایەکا دلۍ تورکیای بۆ، گوزارشتەو ساڵۊو ٢٠١٧ـی تازۍ بکەرۊوە و هۊرشسەنگنۊوە."