رێکوستەی پارتوو یەکسانی و دیموکراسیی گەلا(دەم پارتی) بە بۆنەو ١و ئەیلوولی ڕۆو ئاشتیی جیهانیوە و "دژو گۆشەگیری پەی ئازادیی دەنگ بەرز مکەرمێوە" وەردەموو بیانو پارتەکەینە کۆنفرانسێوی ڕۆنامەوانییش ساز کەرد.

پەرلەمانتاراو بازمەو ئیزمیروو دەم پارتی بیرجوگول چوبوک و ئیبراهیم ئاکن چەنی فرەو نوێنەراو ڕێکوزیا مەدەنییەکا ئامادێ کۆنفرانسە ڕۆنامەوانییەکەی بێنێ.

هامسەرۆکەو دەم پارتیی ئیزمیری زەهرا ڤەزان کارابولوتە ئەرەیاوناێوەنە واتش، بە دروشموو "نا پەی جەنگی"مەیدانەکانە بیمێ. ئەرەیاونایچش: "قەوەتبییەی دەسەڵاتە ڕاسگێرەکا و ملەملیشا سەروو دەسەڵاتی جەنگی تازە هورمگیسنۆ. دەسەڵاتداریی ئاکەپە-مەهەپەی ڕاو قەوتکەردەی بناغەکاو فاشیزمیوە درێنە بە ڕژێمەکیشا مدا. ئی دەسەڵاتە گردوو گەلا، ئایین و باوڕییەکان، ڕەنجدەرێ و ژەنی بەروو بەرژەوەندیی سەرمایەداری، مچەوسناوە و هەوڵێ مدا درێژە بە فەرمانڕەوایی وێشا بدا.

کارابولاک جەختیچش کەردۆ، کە وەختوو قەوەتکەردەیوە کۆشیاین و واتش:" ڕاسگێری و نەژادپەرسی و تەوژمو فاشیزمی ئینا بەرزبییەیوەنە، بەرش موزۆ کە مبۆنە بە وەربەس وەروو دەمیشا بنریۆرە و ئیساتێ وەختوو کۆشیای یۆگێرتەین، ئێمە دژوو گۆشەگێری تورکیا و کوردسانەنە، دژوو جەنگی و سیاسەتوو ئەرەگیری فاشیستی، ١و ئەیلوولینە ڕۆو جیهانیی ئاشتینە جەمێ بیمێوە. ئێمە گردوو ئاشتیوازا خوڵکە مکەرمێ، کە بەشدارێ با وێنیشانداێوە گەورەنە شارەکەنە".

لاو وێشۆ پەرلەمانتاروو دەم پارتی بورجوگوڵ چوبوک واتش، ئاندە گەل ئاشتییش گەرەکەن، ئاندە ئاکەپە و مەهەپە ئاواتەوازێ جەنگینێ، مشۆم گەل دژوو جەنگی و سەرووو ئاستیوازی وێش ڕێک بوزۆ. ئێمە دژو دەسەڵاتی و جەنگی ئاشتیی گەلا مپارێزنمێ".

هاموەخت ئیبراهیم ئاکن پەرلەمانتاروو دەم پارتی بازنەو ئیزمیرینە واتش، ئامادەکارییەکاو جەنگی یەرەموو جیهانی بەردەوامێنێ و ئەرەیاوناش" گرد یاگێوەنە واتەواچ بارەو جەنگیوە مکریۆ، گەلاو جیهانی موزیانە  بارەو جەنگیوە، گەلاو جیهانی موزانە دلێ ئاڵۆزیێوە تازەیوە، ڕووبەڕوو هەژاری و ئاوراییشا مکەراوە ئایندێوە نادیارەنە. با دژوو جەنگی بمدرمێوە، ١و ئەیلولی چی ڕووەوە فرە مانادارا".