هامسەرۆکی گردینوو دەم پارتی تونجەر باقرخان بەشدار بێ جە کەردەیۆ نویسگەو ورچنیەی ئەلکێنە، تیشکەش وستە سەروو فرتوفێڵوو دەسەڵاتدارا وەڵێ ورچنیەینە و واتش: "نە ئەسکەندەر و نە فارسەکێ نەتاواشا پی کەشارە ویەرا، حەرگیز دزەکێ نمەتاوا پێگەرە بویەرا".
هامسەرۆکی گردینوو پارتوو یەکسانی و دیموکراسیی گەلا (دەم پارتی) تونجەر باقرخان بەردەواما جە سەردایەکاش جە ورچنیەینە شەرناخنە. باقرخان و شاندێوە هامڕێش ئامێ ئەلکێی شەرناخی و دەگاو بەرماڵینە پارتەکا خێرامای کەردێ. دمایی بە کارەوانێوە بەرەو ناوەندوو مەنتێقەکەی کەوتێ ڕا و هاموەڵاتێ بە درووشمێ و نیشانێ سەرکەوتەی خێرامایشا کەردێ.
سەرەڕاو کەشوهەوای سەردوو ناوەندوو ئەلکێ خێرامایێوە گەرمشا کریا، دماو دەیەقێوە ڕێزگێرتەی، کاندیداو هامسەرۆکوو شارەوانی، بەیبون ئەسڵان و عەگید یگیت سڵامشا کەرد.
دمایی باقرخان ئاماژەش کەرد، ئەلکێ دڵوو بۆتانین، واتش: "٣١ ئاداری جوابێوە مدەیمێ ئا سیستمەیە ددا بە کوردیرە مەنیۆ و ئێساڵ ٣١ ئادارینە ئی قەیوما کیانمێوە".
باقرخان واتش وەختێ ئامانێ ئێگە پێسە واچی ئی دیاگە گولانێ ئەرەگیرە کریێبۆ، دەوروبەرش پەڕا بنکێ و خاڵێ وشکنای، ئینەیە شەرمەزار کەرمێو مشۆم دەسەڵات بزانۆ ئی فشارێ ڕاگێری وەنەو گەلوو کوردی نمەکەرانێ، و واتش: "ئێمەی کوردا چێشما بە کێ کەردەن؟ ئێمە ئاشتییما گەرەکا، گەرەکمانە کورد بە زوانوو وێش دوۆ و قەیوم نەنریۆرە و هاموەڵاتیبییەێوە یەکسانما گەرەکا. بەڵام جە یەکسانی مەیاوانە. سەرەشا ئینا سوجدەیە، بەڵام مەژگشا پەڕا فێڵێ و تەڵەکێ".
باقرخان تیشکەش وستە سەروو هەوڵێ فێڵا و ساختەکارییەکاو ئاکەپەی، ئاماژەش پانەیە کەرد، گەرەکشانە ڕاو زۆرەزما و فشاری و قەیومی و دەنگدەری ساختەیۆ ئیرادەو گەلەکەیما زەوت بکەرانێ، واتش: "پێویسا وەراوەروو وەراوەروو حەر دەنگدەرێوە حەرامیوە، ئێمە دووێ دەنگدەرێ حەڵاڵێما با. مزگیوە تا یانەکا قەناعەت بە گەلەکەیما بارمێ. هامپەیمانیی وەرگی و دزەکا تەنیا بۆ بە هامپەیمانیی وەرگەکا نەوەک هامپەیمانیی ئەلکێ. هامپەیمانیی ئەلکێ هینوو ژەنا و گەنجا و مەلاکامانە".
باقرخان ئاماژەش کەرد دارستان و بەحر و ڤیستیڤاڵ و گۆرانیێ و جلوبەرگ و گرد چێوما قەدەغە کەرانێ و نمازانێ بە چاندوو وێماوە بژیومێنە و بە زوانوو وێما دوومێنە، ئی گەلە جیای ئانەی بۆ بە جەردەوان، قەسەمش واردەن دەس جە کۆشیای ئاشتی و دیموکراسی ورنەگێرۆ، واتش: "دڵنیانا گەلوو ئەلکێ جوابێوە پێویس مداوە. نە ئەسکەندەر و نە فارسەکێ نەتاوانشا پی کەشارە ویەرا، بێگومان حەرگیز دزەکێچ نمەتاوا ویەرانێ. ئی گەلە شکۆمەندە هیزی ڕاش نەدا و ئارۆیچ ڕا مەدۆ.
بە گردوو هێزیماوە پەی ورچنیەی ٣١ ئاداری خەبات کەرمێ. ئێمە کوردێنمێ، ٩٩٪ خەڵکوو ئەلکێ کوردێنێ. ئێمە پەی کرەواردەی مەکۆشیەیمێ، بەڵکوم پەی بۆ زوانوو ئەدێما و دیموکراسیی کۆشیەیمێ. با یاگێ بنکە سەروازییەکانە هەرمانگێ مەرزنارە، کاندیدەکاما مسپارمێ بە شمە".
دمایی شاندەکە قردێلەش بڕی و نویسگەو ورچنیەییش کەردۆ.
دمایی بەرەو قلەبان کەوتێ ڕا.
