هامسەرۆکوو دەم پارتی تونجەر باقرخان باسش چانەی کەرد کە وانەنە پەشتیوانی مدرامانی سەرکەوت و واتش: "پۍ خاوەنداریکەردەی جە مدرامانوو وانی، هامپەیمانیێوە ٨٦ملوێنی بۍ. بە هەمان مدرامانۆ ڕا مەڎەیمۍ شارەکۍ تەرێچ دەسشا سەرەرە گیریا."
دماو ئانەی بە مدرامانەکا وانی و پەشتیوانی گەلا تاوییا شارەوانی گەورە شاروو وانی گېڵۊوە پۍ گەلی و مەرسوومی هامسەرۆکایەتی عەبدوڵا زەیدانی بە ئیراڎەو گەلیوە هۊرگیریاوە. ئی سەرکەوتەیە بی بە دڵوەشی پەی گەلا، پەیوەس پی مژارەیۆ هامسەرۆکوو گرڎیی دەم پارتی تونجەر باقرخان پۍ ئاژانسوو هەواڵوو فورات نیوزی (ANF)ی قسێش کەردۍ و باسش چانەی کەرد پەشتیوانی و کۊشیای جە وانی سەرکۆت. حەرپاسە تونجەر باکرهان باسش چانەی کەرد پەی شارەداریەکا بەدلیس، شڕناخ، قەرسی و شارەکا تەری کە دەسشا سەرەرە گیریان، پێویسا کۊشیایەکۍ وانی بەردەوامۍ با.
"کۊشیای و تانەکېما بەردەوامۍ با''
باقرخان ئاماژەش پەنەی کەرد کە کۊشیایما بەردەوام بۆ و واتش: " دژوو دەسگێرتەی سەروو شارەوانیەکا بەدلیسی و شڕناخیرە کە بە هۊرچنیەی ساختەی و سوپۍ و پۆلیسیوە بەدەسشا ئاردێنۍ، گەلوو کوردی ئینا سەروو پەیاوە. کۊشیای و تانەکېما بەردەوامۍ با. جە ئیسەیچەنە چا شارانە گەل هەڵوێسش هۊرگێرتەن".
هەر جە درێژەو قسەکاشەنە باقرخان ئاماژەش پانەی دا: " بەدلیسەنە زیاڎ جە ٢ هەزار دەنگېما بە پوچەڵ ئەژمارکریێنۍ، ئەنجامەکاو هۊرچنیەی جە جوڕنە سیاو، خەلفەتینە گۊرشێویێوە. پەیوەس پی شاراوە جە هەرمانەکامانە بەردەوامێنمۍ. بە پەشتیوانی و مدرامانەکا دەس سەرەرە گېرتەو ئیرادەو گەلی چا شارانە بەتاڵ مکەرمېوە."
"پڕایۆ پۍ قۊناغێوە، کە گەل ۋێش سیاسەتش متەنەرە"
باقرخان ئانەش دەسنیشانکەرد کە بەرنجامەکۍ هۊرچنیە دلێینەییەکا ئاماژەنۍ پۍ هۊرشێونایۆ ئاکەپەی و واتش: "خەباتکار، ڕەنجدەر، کرێکا و چێر دەس ئیتر گەرەکشا نیا پی جۊرە درێژە بڎا بە ژیۋای. جە هۊرچنیەکانە پەیاموو ئانەیشا دا، کە بەسیاسەت و ئۆپۆزسیۆنێوە عالیۆ، متاویۆ تورکیا دیموکراتیک بکریۆ. پۊکەی سەرکەوتەی ئا پارتا چی هۊرچنیەینە نیشانۍ سەرکەوتەی گەلین. جە ڕوانگەو منۆ پێویسا گرڎ کەسێ بەشوو ۋێش چی کۊشیایە هۊر بگێرۆ. پڕێنێوە پۍ قۆناغێوە کە گەل سیاسەتش متەنەرە."
