هامسەرۆکو گرڎیی پارتو یەکسانی و دیموکراسیی گەلا (دەم پارتی) تونجەر باقرخان جە گلېرۊبیەو "ئازادینە پەی ئاشتی" جە ئامەدەنە قسێش کەردۍ.

باقرخان سەرنجش وست سەرو کۊششەکا ڕابەر ئاپۆی پەی چارەسەری، واتش: "ئېژا ئۆجالان چێش مکەرۆ؟ پەی ئانەی ئامەد ئازاڎ بۆ، قەیوم جە ئامەدەنە نەنریۆرە، کۆچبەراو سێرتی بە ئشناسنامەو ۋێشا و بە ئازادانە بژیۋا، نەخشەڕێوە ئاماڎە مکەرۆ. ئېژا ئۆجالان نەخشەڕاو ئاشتی ئاماڎە مکەرۆ. نەخشەڕاکە تەنیا پەی کوردی نییا بەڵکم پەی ژیۋای یەکسانی گرڎو باوەڕ و نەژادەکا تورکیاین. ئېژا ئۆجالان گەرەکشا کوردەکۍ بە ئازادی و بە زۋانو ۋێشا قسۍ بکەرا و بە زۋانو ئەڎایی ۋێشا پەروەردە بوینا. ئېژا ئۆجالان گەرەکشا قەیوم سەرو ئیرادەو گەلوو کوردیرە نەنریۆرە. گەرەکشا ئامەد بە ئیرادەو ئامەدی ڕاوەبەر بکریۆ، ئێلح بە ئیرادەو ئێلحی ڕاوەبەر بکریۆ، سێرت بە ئیرادەو سێرتیۆ ڕاوەبەر بکریۆ".

باقرخان ئەرەیاۋناش پەنەوازا گرڎ کەسۍ چنی ئا نەخشەڕایا با کە ڕابەر ئاپۆ پی نزیکا ئاشکراش مکەرۆ، واتش: "ناڕەحەتۍ مەبیدۍ و مەتەرسدۍ. کورد، ئیتر کوردو سەدەی وەڵینی نییا. ئا کوردە نییا سەرو مێزەو گفتوگۆیۆ هۊرخەڵەتیۆ. گەلوو کوردی، گەلێوە دینامیکییا، گەلێوە بەهێز و ڕێکوزیاو هەرێمەکەیا. تا شمە بیدۍ، کەس نمەتاوۆ هۊرتا خەڵەتنۆ. تا شمە بەهێزۍ بیدۍ، ئا کەسۍ ڕەڎێما مکەراوە ناچارېنۍ بەیا سەرو مێزەو گفتوگۊی. بەهێزۍ بیدۍ و باوەڕ و هیواتا بۆنە".

باقرخان جە دما دماینە واتش: " عەبدوڵا ئۆجالان هیوا و زېڵۍ ملیۆنان کەسان. تا ئا کاتەی هیواو ملیۆنان کەسا جە ژوورێوەنە گۆشەگیر بۆ، باوەڕ بە جدییەتو شمە نمەکەرمۍ. جە ژوورێوە ١٢ مەترینە ئەرەنیشتەی نمەکریۆ و دیموکراسی بەدی نمۍ. با ئۆجالان چنی گەلوو ئامەدی کۊبۆوە، با گەلوو ئامەدی و ئۆجالان پێوەرە کوۍ باوە".