هامسەرۆکی گردینوو دەم پارتی تونجەر باقرخان جزیرنە واتش: "ئانێ گەرەکشانە پەرسەو کوردی چارەسەر کەرانێ ئێمە ناموونیشانشا مدیمێ پەنە، گۆشەگیریی ورگێردێ. پەی چارەسەرکەردەی پەرسەو کوردی ڕاو عەبدوڵا ئۆجالانیوە ڕاێوە تازێ دیالۆگی و دایوسانای کەراوە".
هامسەرۆکی گردینوو پارتوو یەکسانی و دیموکراسیی گەلا (دەم پارتی) تونجەر باقرخان مەنتێقەو جزیروو شەرناخینە چن خەڵکی کۆ بییۆ.
وەختوو یاوای باقرخانی و شاندی هامڕایشنە، هەزاران کەسێ جەمۆ بیێ و درووشموو "بژیوۆ سەرۆک ئاپۆ"ی و "پەکەکە گەلا، گەل ئینا چێ"یشا بەرز کەردۆ و ڕاشا پیما.
تونجەر باقرخان قسێش کەردێ و واتش: "کۆشیاکەیما سەختا وەختێ سیستمێوە کۆشیای کە ددان ئێمەرە مەنیۆ، حساب پەی زوانەکەیما مەکەرۆ، حسابوو ئینسانیما پەی مەکەرۆ و ساڵانێوەن هەوڵێ دلێنەبەردەیما مدۆ".
باقرخان ئەوەخوایش کەردۆ، گەرەکشانە گەلوو کوردی گەندەڵ و بێ‌شناسنامە کەرا.
باقرخان واتش ناموونیشانوو ئاشتی مدەیمێ ئا کەسا کە دایمە باسوو جەنگی و ماڵاییۆیرەی و ئۆپەراسیۆنی کەرا، "پەرسەو کوردی بە جەنگ و ئۆپەراسیۆن چار مەبۆ، بە دیالۆگ و دایوسانای چارەسەر بۆ، ئێمە ناموونیشانەکەشا مدەیمێ پەنە، گۆشەگیری سەروو بەڕێز ئۆجالانی ورگێرا. بەیدێ چەنی بەڕێز ئۆجالانی ڕاێوە تازێ کەرمێوە تا پەرسەو کوردی بە دیالۆگ و دایوسانای چارەسەرە بۆ".
باقرخان پەشتگیریی دەم پارتییش پەی گرد هەوڵێوە دیالۆگی و چارەسەری و دایوسانای ئەوەخوای کەردۆ، پەی مردنای جەنگی و ونمتەی.
واتش گەلوو جزیری ڕاو ورچنییەی ٣١ ئاداریوە، زوان و چاندوو وێش پارێزنۆ، جەزیرەی جە دزەکا و ماددەی هۆشبەری پاک کریۆوە.
