جەنگاوەرو قەسەدەی باوەڕ عەفرین باسش چانەیە کەرد دۆڵەتو تورکی ئەرەگیری بە هێزی تەکنیکییۆ هرووژم مکەرۆ سەرو بەنداو تشرینی و واتش: "ئامانجو ئی هرووژما پەی ماڕاو ئیرادەیمانە، بەڵام ئیرادەما چا هرووژما بەهێزتەرا."
هرووژمەکێ دۆڵەتو تورکی ئەرەگیری و چەتەکاش کە جە ٨و کانوونو یوەمیۆ بەوپەڕی دڕندەیۆ پەی سەرو هەرێمەکا سەرنیشتوو و وەرکەوتوو سووریای و بە تایبەت پەی سەرو بەنداو تشرینی بەردەواما. جە وەراوەرو ئی هرووژمانە جەنگاوەرا هێزەکا قەسەدە و یەپەژەی بە مۆراڵێوە بەرزۆ ئینێ پارێزناو هەرێمەکا گەلینە.
'پەشتیوانی گەلەکەیما بی بە ورەمان'جەنگاوەرو قەسەدەی باوەڕ عەفرین کە ئینا قۆڵو مڏرامانەکا بەندواو تشرینینە، پەیوەس بە جەنگەکا ئیسەی پەی ئاژانسیما قسێش کەردێ و ئاماژەش پانەیەدا ماوەو دوو مانگان جەنگاوەرا قەسەدە و یەپەژەی، شانبەشانو گەلی ڕابەرایەتی مڏرامانێوە تاریخی مکەرا و واتش: "دۆڵەتو تورکی بە گرڏو هێزیشۆ جە هرووژمەکاش بەردەواما و قڕکەردەی ئەنجام مڏرۆنە. هەمڕێ گەشمەرڏەکێما وەربەرچو ئی هرووژماشا داوە و مڏرامانو تشرینیشا گۆرەتەر کەرد و بیێ بە مەڵامەتو زینەبییەی مڏرامانەکەی. گەشمەرڏێ و قوربانیێ فرێما دێنێ بێگومان ئینە ماناو ئانەی نییا ئیرادەمان لاواز بۆنە و مەڕیۆنە. چنی هەر گەشمەرڏە و زامڏاربییەی هامڕێیاما مڏرامانما بە بەهێزتەرو بەردەوام مکەرمێ. وە پەشتیوانی گەلەکەیما بییەن مەڵامەتو بەرزتەر بییەیۆ مۆراڵیما."
'سەرو بنەماو فەلسەفە و ئایدیاو وێما وەربەرجو هرووژمەکا مرەیمێوە'
باوەڕ عەفرین سەرنجش وست سەرو ئامانجو هرووژمە قورسەکا دۆڵەتو تورکی و چەتەکاش کە چنین جە ئاسمان و زەمینەنە ئینێ هرووژمکەردەینە و واتش: "ئامانجو هرووژمەکا پەی ماڕاو ئیرادەو گەلەکەیمانە. ٫گەرەکشانە گەلەکەیما کۆچبەرێ کەرانە. سەرەڕاو گرڏو ئی هرووژما، گەل جە ئیرادەو بەرزو وێش بەردەواما، وە خاوەنداریش جە جەنگاوەرەکاش کەرد. ئینایمێ تشرینەنە و مڏرامانما بەردەواما. دۆڵەتو تورکی بە بییەو هێزی تەکنیکییۆ گەرەکشا ئیرادەما ماڕۆنە، بەڵام ئیرادەو ئێمە چا هێزەیە گۆرەتەرا. فەلسەفە و ئایدیاما هەن، سەرو ئا بنەمێ جە ئەوەکۆشایما بەردەوامێ بیمێ. تا حەق کەردەیۆ ونەو هەمڕا گەشمەرڏەکاما جە دووژمنی، جەخت کەرمێوە جە مڏرامانیما."
