بەمەڵامەتوو بومەلەرزەیۆ لاوکەمیۆ ١١٨ کەسۍ چینەنە گیانشا جە دەسدا
جە سەرنیشتوو ۋەرنیشتوو چینی بومەلەرزە ڕووەشدا و بە مەڵامەتشۆ لاوکەمیۆ ١١٨ کەسۍ گیانشا جە دەسدا. حۊڵەکۍ پۍ رزگارکەردەی ئا کەسا چېروو داروپەردوو یانەکانە مەنېنۍ، بەردەواما.
بومەلەرزېوە بە قوەتوو ٦.٢پلا بە پیمەروو ریختەری ویلایەتوو گانوسوی چینیش لرناوە، کە هەزار و ٣٠٠ کیلۆمەترۍ جە پانیشتوو ۋەرنیشتوو پەکینیوە دوورا. بە پاو ئا ئامارا سەرسەعبوو ئارۆی جە زۋانوو کاربەدەسا ویلایەتوو گانسوی وەڵاکریاوە، لاوکەمیۆ ١٠٥ کەسۍ گیانشا جە دەسدان، نزیکەو ٤٠٠ کەسایچ زامڎارۍ بیۍ.
بە پاو کەناڵوو سی سی تیڤی حکومەتی، جە شارۆچکڵەو هایدۆنگوو ویلایەتوو کینگهایچ ١٣ کەسۍ گیانشا جە دەسدا و ١٨٢ کەسېچ زامڎارۍ بیۍ و ٢٠ کەسېچ بۍ سەرووشۊنېنۍ. بومەلەرزەکە زەرەرش بە هەزاران یانا یاونان و ئەرەنیشتۍ ئا مەنتیقا ناچارۍ بیۍ، سەرەڕاو سەرداو سۆڵەی جە کۆڵانە و جاڎەکانە مەناوە.
چین کۊتەن سەروو خەتەو بومەلەرزەی و جە ساڵەو ٢٠٠٨ینە بە مەڵامەتوو بومەلەرزەیۆ جە ویلایەتوو سیچوانی زیاتەر جە ٨٣ هەزار کەسا گیانشا جە دەسدا کە ٥ هەزارۍ و ٣٣٥کەسېشا زارۊڵۍ بېنۍ.
