نویسگەو وزەو کانتۊنوو جزیرەو سەرنیشت و وەرکەوتوو سوریاینە پێوەس بە هجوومەکا ئەرەیاونایوە پەڕ زانیارییش وەڵا کەردۊ و واتش: " ئەنجاموو بۊردومانکەردەی وێستگەو کارەبێوە، ئاوەو دەیان شاراو هەرێمەکەی و دەگایەکاو؛ دێریک، کۊچەرات، گرکۍ لەگێ، چلاخا، تل کۊچەر، تربە سپی، تل حەمیس، شاروو قامیشلۊی و عامۊدۍ بڕیێنە. چونکوم وەروو نەبییەی کارەبۍ وێستگەیی ئاویی ئا یاگا جە هەرمانۍ کەوتەن.

هەرپاسە هەر یەرە وێستگەو ئاوەو هیلالی، لوێجە و جەق جەقی، کە ئاوەو زیاتەر جە ٩ هەزار یانابێ، بۊنەو  نەبییەی کارەبێوە مردان. دێریکیچنە ١٢ بیرۍ مردێنێ، کە ئاوەو ٣ هەزارا و ٥٠٠ یاناش سەرۊ بێ".

بە پاو ئەرەیاونایەکەی مەنتێقەو گرکۍ لەگێ: ٩ بیرۍ جە شاروو کەشکەینە، ٣٦ بیرۍ جە مەنتێقەو چلاخای، ١٤ بیرۍ تربە سپیینە کە ئاوەو دە هەزارا و ٩٠٠ یاناش سەرۊ بێ، جە هەرمانە کەوتێنێ، تل حەمیس ١٠ بیرۍ و  عامۊدێنە ٢٤ بیرۍ جە هەرمانە کەوتێنێ.  

بە پاو ئەرەیاونایەکەی حەر یەرۍ وێستگەکەو قامیشلۊی و ١٠٥ بیرۍ تەرێ، ئاوەو زیاتەر جە ٤٥٠ هەزار کەسا دابین کەرێ.

دەوڵەتی ئەرەگیرکەروو تورکی  ١٣ کانوونوو دووەمیوە بە فڕۊکەی بێفڕۊکەوان و جەنگکەر، بۊردومانوو هەرێمەکاو سەرنیشت و وەرکەوتوو سوریای کەرۊ.