شەوەو ٢٨-٢٩و ئابو ٢٠٢١ سەرو دەرەو زێنە جە خەلیفان گروپێوە حۆت کەسی گەریلای جە لایەنو هێزەکاو پەدەکەیۆ هرووژمشا کریا سەر و جە ئاکامەنە ٥ گەریلۍ گەشمەرڎۍ بیۍ. یۆ چا گەشمەرڎا سەردەم جودی (یوسف ئیبراهیم)بۍ. براو سەردەم جودی یوسف ئیبراهیم و واڵەکێش بە نامۍ گوڵچین ئیبراهیمی قسێشا پەی ئاژانسوو هەواڵوو فوراتی (ANF)ی کەرڎۍ.

گەلوو کورڎی ئاگاڎارو خیانەتو پەدەکەیا

یوسف ئیبراهیم ئەرەیاۋناش، "گەریلا شکۆو گەلوو کورڎی پارێزنۆ. ئەگەر گەریلا نەبیۍ شکۆو هەیمەنەو گەلوو کورڎی مەڕیێ. گەریلا پەی گەلوو کورڎی گیانوو ۋێش بەخشۆ. ئا گەلوو کوردەی دەوڵەتوو تورکی واچۍ ' کۆنکرێتما کەرڎ سەرو قەبرەکێشەرە' سەرجەنۆ هۊرئێستۆ. گەریلا نەبیۍ گەلەکەیچما نەبۍ. جە دژوو دژمنی کە مرۆڤایەتی نمەشناسۆ و بە شێوێوە وەحشیانە هرووژم مکەرۆ، گەریلا جە کەشەنە بە ئاورایی، تەژنەیی، بە بۍ وەرمی پەی شناسنامەو گەلەکەیش گژیۆ".

یوسف ئیبراهیم ئاماژەش پانەیچ کەرڎ، کە تاریخو پەدەکەی پەڕا جە لاپەڕەی پیس و واتش، خیانەتو پەدەکەی تەنیا هەر ئینۍ ئی ڕوا دماییە نییەنۍ، عەیامێوەن خیانەتەکەش بەردەواما. هەڤاڵ سەردەم و هەمڕاکێش خەلیفانەنە بە دەسو پەدەکەی گەشمەرڎۍ بیۍ. پەدەکە دژمنوو گەلوو کورڎین. گەلوو کورڎی ئاگاش جە خیانەتو پەدەکەیا. خیانەتو ئاڎیشا ئاشکرابیەن. ئەگەر پەدەکە نەبیۍ دەوڵەتو تورکی نەتاوۍ هەنگامێوەیچ بێنە پانیشتوو کورڎەسانی".

گۆششا پەی داواو ئێمە نەگێرت

یوسف ئیبراهیم ئاردشۆ وە یاڎ کە ۋەردەم و دەروازەو سنووری سێمالکاینە خێمێشا هۆردێنە، ١١١ ڕوۍ داواشا جە پەدەکەی کەرڎ کە تەرمو گەشمەرڎە سەردەمی و هەمڕاکاش رادەس بکەرۆوە و واتش، "گۆششا جە داواکێما نەگێرت، ئێمە داواو تەرمەکاما مکەرمۍ. ئێمە گەرەکمانە بزانمۍ گەشمەرڎەکێما کۆ وزیێنۍ. ١١١ ڕوۍ ئێمە بێ جواب مەنیمۍ. نەتاواما تەرمەکاما هۆربگێرمۍ. مزانمۍ کە تەرمۍ گەشمەرڎەکاما ئینۍ لاو پەدەکەیۆ. ئەگەر بە ۋێش ماچۆ کە کورڎا، مشۆم تەرمەکاما رادەس بکەرۆوە".

رۆڵۍ کورڎا مکوشیا

گوڵچین ئیبراهیمە هرووژمەکۍ دەوڵەتو تورکیش بە داردەسی پەدەکەی شەرمەزارۍ کەرڎۍ و واتش، "بە دەسو کورڎا رۆڵەکۍ کورڎا مکوشیا. براکەم سەردەم بە دەسوو پەدەکەی گەشمەرڎە کریا. ئێمە داواو تەرمو براکەیما کەردۆ و تا ئیساتێچ داواش مکەرمێوە. گەرەکمابۍ سەردەمی جە قەبرسانو گەشمەرڎانە چنی هەمڕاکاش بەرەو گەشتی بێکۆتایی ئەسپەرڎە بە خاکی بکەرمۍ. سەرەڕاو هەوڵەکاما تەرمەکێشا نەڎایمۍ پنە. گۊرەتەرین دژمنوو گەلوو کورڎی پەدەکەن. ئانەی ئێرش وەردان دڵیما گەشمەرڎەبیەو سەردەمی نییا. سەردەم بە شکۆمەندی ۋێش پەی ئازاڎیی گەلەکەیش جەنگش کەرڎ، گیانبازیش کەرڎ. بەڵام ۋەرو ئانەی بەدەسوو ئانیشا کە بە ۋێشا ماچا کورڎ گەشمەرڎە کریا، ئێر ۋەربۆنە دڵما ".

چڼین ساڵێچ ۋییەرا ئێمە تەرمەکاما هەر هۆرگێرمێوە

گوڵچین ئیبراهیمە داواش جە پەدەکەی کەرد هەنگامە بنیۆ و داواو تەرمەکەیشا بکەرۆ: "١١١ ڕووۍ ئێمە ئەرەکۆشایمۍ، ئەرەکۊشای ئێمە هەڵای بەردەواما. ئێمە خێمێما هۆرداو چالاکیما کەرد. جەماوەریچ چنەشەنە بەشداربۍ، بانگەواز کریا، بەڵام پەدەکە نتقش چۆوە ناما، لایەزال تا ئیساتێچ نکۆڵی جە ئاژەکەی مکەرۆ. با پەدەکە بزانۆ ساڵێچ ۋییەرۆ ئێمە تەرمو سەردەمی هۆرگێرمۍ".