ڕێکوزیاو نۆردیک مۆنیتۆری، کە بارەگاکەش ئینا ئەوروپانە، جەبارەو ئانەی، کە بنەیانەو ئەردۆغانی سەڎان ملوێن دۆلارێشا جە نەوتەو هەرێموو کوردسانی دەسکۊتەن گوزارشتێوەش وەڵاکەردۆ.

جە گوزارشتەکێنە ئامان، دادگاو پاریسی قەرارشدا بە قەرەبووکەردەیۆ عێراقی جە تەرەفوو تورکیایۆ بە میقداروو یەک ملیاری و ٥٠٠ ملیۆن دۆلارا چنی زیاتەر جە نیم ملیار دۆلارا سوو قەرزەکەی بە حکومەتوو فیدراڵی عێراقی، ئانەیچ پەردەش سەروو ئابڕووشیێوە گۊرەی سەروو تاڵانەو نەوتەو هەرێمی و دۊڵەمەنڎبیەی بنەیانەو ئەردۆغانی هۊرداوە.

باس چانەیچ کریان، ورەتەو نەوتۍ نەک تەنیا بە بنەیانەو ئەردۆغانی بیەن، بەڵکم بریتی بۍ جە فاڕایۆ و ورەتەو نەوتەو هەرێموو کوردسانی، کە بە شێوێووە سەرەکی جە تەرەفوو کۆمپانیێوە بریۍ ڕاوە، کە ئەردۆغان ساحیبش بۍ.

ئانەیچ وزیان ڕووە، هەرمانوو کاروو فاڕایۆ و ورەتەو نەوتەو هەرێمی جە تەرەفوو کۆمپانیاو پاوەر ترانس پترۆڵ ڤێ ئینێرجی تیکیوە ڕێکوزیۆ، کە بەرات ئەلبایراک زەماو ئەردۆغانی، ڕاوەبەرشا و بە مەڵامەتوو ورەتەو نەوتەو هەرێمی بنەیانەو ئەردۆغانی سەڎان ملوێن دۆلارێشا جە ورەتەو نەوتەو هەرێمی دەس کۊتەن.

حەر جە گوزارشتەکێنە ئامان، کۆمپانیاو پاوەر ترانسی کۆمپانیێوە تازە ئەرەمەرزیان، تەندەروو فاڕایۆ و بەشکەردەی نەوتەو هەرێموو کوردسانیش هۊرگێرتەن، ئینەیچ بە مەڵامەتوو پەیوەندییە نزیکەکا بەینوو بنەیانەو ئەردۆغانی و بنەیانەو مەسعود بارزانی و داتاکاو تۆماروو بازرگانی ئاشکراش کەرا، کە کۆمپانیاو پاوەر ترانسی جە ٣١و ئاداروو ٢٠١١ ینە جە ئەستەنبوڵ جە تەرەفوو کۆمپانیاو شێڵی بە نامۍ Grand Fortune Ventures Pte Ltd و هاموڵاتیێوە تورکی ئەحمەڎ موحەسیلۆئۆغڵویۆ مەرزیانەرە.

جە درێژەو گوزارشتەکێنە ئامان، ئا کەسەی، کە ئی مامەڵێشە ڕێکوستێنۍ، بەرات ئەلبایراک زەماو ئەردۆغانی بۍ، کە وەڵۍ ئانەینە بۆ بە وەزیروو وزەی جە کابینەکەو ئەردۆغانینە، پێسە ڕاوەبەروو جابەجێکاروو ڕێکوزیاو چالک هۆڵدینگی، کە تەرەفڎاروو حکومەتی بۍ هەرمانەش کەردێنە و موحەسیلئۆغڵو، کە وەڵتەر کارمەندوو هەمان کۆمپانیای بیەن، جە نزیکۆ چنی ئەلبایراکی هەرمانەشا کەردێبۍ.

جە دمادمایینە ئامان، کۆمپانیاو پاوەر ترانسی نەوتەو چەتەکا داعشىیش جە عێراق و سوریانە ورەتێنە، کە ماوێوە کۆنترۆڵوو بیرە نەوتییەکا ئا دووە وڵاتەیشا کەردەبۍ، بەجۆرێوە بەشێ چا نەوتۍ، کە جە تەرەفوو کۆمپانیاو پاوەر ترانسیوە فاڕیێنۆ بە شێوێوە نایاسایی بە بازاڕوو دلێینەو تورکیای ورەشیێنە، واتە کۆمپانیاکە جە قاچاخچیەتی و ساغکەردەیۆ نەوتەو بیرە نەوتییەکا چێر دەسوو چەتەکا داعشینە بەشداربیەن.

جە ١٠/٤/ ٢٠٢٣، عێراق دەعوایێش پێشکەش بە دادگاو پاریسی کەرد پۍ جابەجێ کەردەی قەرارێوە، کە چنەشەنە داواش کەردەبۍ کە  تورکیا قەرەبوو عێراقی کەرۊوە بە میقداروو یەک ملیار و ٤٧٠ ملوێن دۆلارا، ئانەیچ بە مەڵامەتوو ئانەی کە تورکیا بەشداربیەن جە ئاسانکاریی کەردەی پۍ ورەتە و هەناردەکەردەی نەوتەو هەرێموو کوردسانی.

جە مانگەو ئاداروو ساڵەی ویەردۍ دادگاو پاریسی قەرارش دا، کە هەناردەکەردەی نەوتەو هەرێموو کوردسانی جە ڕاو خاکوو تورکیایۆ نادەستوورییا و جە دماو ئا قەراریۆ هەناردەکەردەو نەوتەو هەرێموو کوردسانی جە بەندەروو جەیهانی تورکینە مردا و تا ئیسەیچ دەس بە هەناردەکەردەیشۆ نەکریان و حیچ وادێوەیچ پۍ ئا مەبەسیە دیارینەکریان.

تورکیا جە ساڵەو ٢٠١٤یۆ ڕا بە هەرێموو کوردسانی مڎۆ نەوتە جە ڕاو بۆرییێوە هەناردەو جەهانی کەرۊ و پا مەڵامەتۆ دادگا قەرارشدا، کە پێویسا تورکیا میقداروو یەك ملیاری و ٥٠٠ ملوێن دۆلارا قەرەبوو بە عێراقی بڎۆ، کە سەربەخۆ ڕاش دێنە هەرێموو کوردسانی نەوتە هەناردە کەرۆ.