ڕۊو جومعەی ٢٣ۍ ئابی، هەر دوە ڕۆنامەنوویسۍ ژەنی (گوڵستان تارا و هێرۆ بەهادین)ە بە مەڵامەتوو بۆردوومانوو فڕۆکەی بێفڕۆکەوانى دەوڵەتوو تورکی ئەرەگیری، نزیک بە مەنتیقەو سەیسایەقی گەشمەرڎۍ بیۍ. چا بارۆ کاروان ئەحمەد براو گەشمەرڎەو قەڵەمی کاوە گەرمیانی پەی ئاژانسوو هەواڵوو فوراتی (ANF)ی قسێش کەرڎۍ.

'دەسێوە دلێینە مەڵامەتوو تیرۆرکەرڎەی ئی دووە ڕۆنامەنوویسەینە'

مامۆسا کاروان ئەحمەد جە سەرەتاو قسەکاشەنە پرسە و سەرەوەشیش ئاراسەو بنەیانەو هەر دووە گەشمەرڎا کەرڎ، کە بە دەسێوە سېیاو جە دلێینەو پانیشتوو کورڎەسانینە تیرۆرۍ کریۍ، واتش: "ئی تیرۆرە درێژە پنەدەرو هرووژم و تیرۆرەکا تەرین کە کریان سەرو ڕۆنامەنوویسا جە هەرێموو کورڎەسانینە، کە بە دەسۍ دلێینە تیرۆرۍ کریێنۍ. گومانم نییا کە ئینەیچ دەسێوە دلێینەش ئینا چنە، چونکی تورکیا ٤٠٠ کیلۆمەترۍ چێگەیۆ دوورا، چنین فرۆکێوە بێ فرۆکەوان متاوۆ چێگۆ دووۍ ڕۆنامەنوویسۍ بە ئامانج بگېرۆ، پۊکەی دڵنیانا چانەی کە دەسێوە دلێینە بیەن بە مەڵامەتوو ئانەی ئی دوە ڕۆنامەنوویسەیە جە لایەنو تورکیایۆ بە مەرام بگیرییا.

ئینە ئانەی سەلەمنۆ کە ئی دەسەڵاتە جە ٣٠ ساڵی ۋییەرڎەنە تەنیا کارێوە تاوانش بکەرۆش تیرۆرکەردەی ڕۆنامەنوویسەکا هەمڕایما بیەن. مزانا ڕۆنامەنوویسەکۍ ڕووەی ڕاسییەو ۋەرپرسی و زاوڵاکاشا نیشانەو گلێرگەی مڎا، پۊکەی قینیشا جە ڕۆنامەنوویسەکا مبۆوە."

واتیچش: "پېسە چنی ڕژێمو بەعسی جە کاتوو وڕایشەنە گرڎوو کارە نائەخلاقی و قیزەوەنەکێش، کە ۋەرا ۋەر بە گەلوو عێراقی کەردێبێنێشا ئاشکرۍ بیۍ. دڵنیانا بە وڕای ئی حیزبە کوردییا کە ماوەو ٣٠ ساڵان دەسەڵاتشا ئینا دەسۆ گرڎوو کارە نائەخلاقی و قیزەوەنەکێشا پەی گرڎوو میللەتی ئاشکرا مبۆ.

ئا وەختە بڕەما پەی وڵاتا تەری بەڵام شۊنیتارە مەیمۍ و گێڵمۍ گرڎیتا دادگایی مکریەیدۍ. تیرۆرکەردەی ڕۆنامەنوویسا ماوێوە نەمەنەبۍ، ڕۆنامەنوویسا گێرای گێرێنۍ، بەڵام جە ئیساتێنە تیرۆرکەرڎەی ڕۆنامەنوویسا دەسش پنە کەرڎەنۆ کەواتە درێژە پنەدەرۍ کاری تیرۆریستیینۍ ئی دەسەڵاتە."

'جە دلێینەو هەرێموو کورڎەسانینە کە ڕۆنامەنوویس بە مەرام مگیریۆ ئاڎۍ چنەش ۋەرپەرسێنۍ'

جە درێژەو قسەکاشەنە مامۆسا کاروان باسش چانەیە کەرد کە دەسەڵاتی سیاسی پانیشتوو کورڎەسانی ۋەرپەرسێنۍ جە ۋەرا ۋەرو تیرۆرکەردەی ڕۆنامەنوویسا ئازاڎیینە و پی جۆرە بەردەوام بی: "جە دلېینەو هەرێموو کورڎةسانینە کە ڕۆنامەنوویسۍ بە مەرام مگیریا ئاڎۍ چنەش ۋەرپەرسێنۍ. دماتەر باسوو ئانەی مکەرمۍ کە تورکە فاشیستەکۍ چنەش ۋەرپەرسێنۍ چونکی زانیارییەکۍ جە دلێینەو هەرێمو کورڎەسانینە دزەشا کەردەن پەی ئاڎیشا، ئەگەر کاری سیخوری نەبۆ ئی دووە ڕۆنامەنوویسە دەسوو ڕژێموو تورکی فاشیستی نمەگنا و تیرۆرۍ بکریا. پۊکەی هەمیشە ئانەما واوەی کەردەنۆ کە واز جە هەرمانەو تیرۆری باردۍ چونکی مەنەیۆ دەسەڵاتیتا پێوەس نییا بە تیرۆرکەردەی ڕۆنامەنوویساوە، ئەگەر گەرەکتانە دەسەڵاتتا درێژە بکێشۆ مشۆم ۋێتا چنی ڕۆنامەنوویسا و هاموڵاتیا ئی هەرێمەیە ئاشت بکەردێوە."

جە دمادمایی قسەکاشانە کاروان ئەحمەد داواش جە گەلی و ڕۆنامەنوویسا کەرد کە هەڵوێس برمانا جە ۋەرا ۋەر بە تیرۆرکەردەی ڕۆنامەنوویسانە، واتش: "دواکاریم جە ڕۆنامەنوویسا ئانەنە ڕا نەڎا تیرۆر سەرشارە ۋییەرۆ. گرڎوو ڕاکا جە دەسەڵاتدارا ئی هەرێمەیە بگێرا چونکی ئارۆ نا سەوای سەرەو گرڎیما مۍ."