هەڵمەتەو 'ئازاڎیی پەی عەبدوڵا ئۆجالانی، چارەسەریی سیاسی پەی پەرسو کورڎی' کە ١٠و تشرینو یوەم و ٢٠٢٣ سەرو ئاستی مېیاننەتەوەیینە جە دژو گۆشەگیری دژوارو سەرو رابەرو گەلوو کورڎی عەبدوڵا ئۆجالانی دەسشپنەکەرڎ، بە ۋەرفراوانی بەردەواما. بەشە جیاجیاکۍ گلێرگەی ئەرەیاۋناش کە ئا پاشێلکارییە یاساییەی ئیمراڵینە مکریۆ جە هیچ مەنتیقۍ تەرو جیهانینە نەکریان و گەرەکشانە دمایی بە گۆشەگیری جە ئیمراڵینە بۍ و عەبدوڵا ئۆجالان ئازاڎ بکریۆ.

چی دماییەنە ٦٩ کەسایەتیۍ جە براوەکا خەڵاتو نۆبڵی پەی ئانەی سەرنج وزا سەرو گۆشەگیرکەردەی عەبدوڵا ئۆجالانی و بە داواو دماییئارڎەی بە گۆشەگیری نامەشا پەی کۆمسیۆنو باڵاو ئەنجومەنو مافەکا نەتەوەیۆگێرتەکا، کۆمیتەو شالیارا ئەنجومەنو ئەوروپای، کۆمیتەو ڕاگێرتەی جە ئەشکەنجەو ئەوروپای (سی پی تی) و دادگاو مافەکا مرۆڤو ئەوروپای کیاست.

'کاتو ئانەی ئامان عەبدوڵا ئۆجالان ئازاڎ بکریۆ'

یۆ چا کەسایەتیا کە نامەکەش ئیمزا کەردەبۍ، زانای فەرەنسی بوارو کیمیای ژان پیێر سۆڤاج جە بارەو مەبەس و مەرامو نامەکەیۆ قسێش پەی ئاژانسوو هەواڵوو فوراتی (ANF)ی کەرڎۍ.

پرۆفیسۆر ژان پیێر سۆڤاج سەرنجش وست سەرو ئا مژارا کە جە نامەکەنە ئاماژەشا پنە دریان و ئەرەیاۋناش کە جگە چا مژارا هیچ چێوێتەرش نییا کە پەیش زییاڎ بکەرۆ و واتش، "بەڕێز عەبدوڵا ئۆجالان بە شێوێوە دژوار سزادریان. ئیتر کاتو ئانەی ئامان کە ئازاڎ بکریۆ ".

عەبدوڵا ئۆجالان دەوری گرنگش جە چارەسەری پەرسو کورڎینە مبۆ

براوەو خەڵاتو نۆبڵی زانای فەرەنسی بوارو کیمیای پرۆفیسۆر ژان پیێر سۆڤاج سەرنجش وست سەرو دەورو رابەرو گەلوو کورڎی عەبدوڵا ئۆجالانی پەی چارەسەری پەرسو کورڎی و واتش، " ئازاڎکەردەی بەڕێز ئۆجالانی پەی پەیوەندییەکا بەینو گلېرگەو کورڎی و حکومەتو تورکی فرە عال مبۆ".

ژان پێیر سۆڤاج کێن؟

جە ٢١و تشرینی یوەمو ١٩٤٤ پاریسەنە جە ئەڎۍ بییەن.  ساڵەو ١٩٦٧ جە کۆلێجو باڵاو کیمیایینە جە ستراسبورگ بڕوانامەش بە دەسئاورڎ و دماتەر جە زانشتگەو لوئیس پاستۆری ستراسبورگی بڕوانامەو دکتۆرایش بەدەسئاورڎ و جە ئۆکسفۆردیچەنە بی بە خاوەنو بڕوانامەو پۆست-دکتۆرای. جە مابەینوو ساڵەکا ١٩٧١-٢٠١٤ جە مېیانو ئەوەکۆڵیای زانستی نەتەوەیی فەرەنسینە ئەوەکۆڵیایش کەرد، ساڵەو ٢٠١٦ ی چنی دووۍ شارەزایا بوارو کیمیای سکۆتلاندی و هۆڵندی بە هامبەشی خەڵاتو نۆبڵو کیمیایشا بەدەسئارڎ.