وەرو هرووژمەکا دۆڵەتو تورکی ئەرەگیری سەرو هەرێمو عەفرینی، گەل ناچار بیی کۆچبەر بۆنە. ئی کۆچبەر بییەیە بییەن بە ٨ ساڵێ. ئی گەلە مڏرامانە سەرە ڕاو ئازاری و سەختی مڏرامن مکەرا و سەر پەی دووژمنی نەوی مەکەرا. دماو ئانەی جە عەفرین کۆچبەرێ بیێ، لوێ شەهبا، بەڵام دووژمن پینەیە ڕازی نەبی جارێوە تەر جە هەرێمو شەهباینە کۆچبەرێ بیێ. مڏرامان و ئەوەکۆشای بیی بە مەڵامەتو ئانەی کە هەوڵەکا دووژمنی پوچەڵ بکەراوە.

سەبارەت بە کۆچبەرا عەفرینی، سەبارەت با سەختییا کە جە کاتو کۆچکەردەیشا جە عەفرینۆ پەی شەهبا و جە شەهباوە پەی ڕەقە تووشش بییێنێ، پەی ئاژانسو هەواڵو فوراتی (ANF) قسێشا کەردێ.

هاموڵاتی عەلی پیری سەرو کۆچبەریش جە عەفرین تا شەهبان قسێش کەردێ و واتش: "جە ساڵو ٢٠١٨ دۆڵەتو تورکی ئەرەگیری و چەتەکاش شەوێ بە فرۆکەی جەنگی و چەک، تەمامو تانکەکاش هرووژمشا کەرد سەرو عەفرینی. دۆڵەتو تورکی ئەرەگیری ئی هرووژمەشە بە ئامانجو زینە کەردەیۆ دەسەڵاتو عوسمانی و ئەرەگیر کەردەو خاکەیما ئەنجامش دا. دۆڵەتو تورکی ئەرەگیری هرووژمەکێش سەرو گەلی ئەنجام دێ. کۆمکووژییێ گۆرەش سەرو زاڕۆڵا و ژەناوە ئەنجام دا. بە شێوێوە دڕندانە هرووژمش کەرد و بە هەزاران کەسێ گەشمەرڏێ بیێ . گەلەکەما ٥٨ ڕوێ جە عەفرینەنە مڏرامانشا کەرد و خاکەکەش بە ئاسانی تەسلیمو دووژمنی نەکەرد".

هاموڵاتی فاتمە ڕەشیدە جە ناوچەو بلبلی شارو عەفرینی واتش: "کاتێ عەفرینەنە بێنمێ، ژیوایما وەشو و ئارام بێ، بەڵام داخەم مەشۆ دماو ئانەی کە دۆڵەتو تورکی هرووژمی دڕندەش سەرما ئەنجام دا، بە شێوێوە دڕندانە زاڕۆڵێ و، ژەنێ و، بەتەمەنێما گەشمەرڏێشا کەردێ.  دماو ٥٨ ڕوا مڏرامنیما ناچارێ بییەیمێ جە خاکەکەمانە بەربشمێ. یانەو، موڵک و زەمینما جیائاست و بەرەو هەرێمو شەهبای کەوتیمێ ڕا. ژیوایێ تەرما جە شەهبانەنە ئەرەمەزنا پەی ئانەی جارێوەتەر گێڵمێوە پەی خاکەکەیما عەفرین.

کاتێ یاوایمێ شەهبا واچێنمێ شەهبا مکەرمێ بە عەفرینێ کولانە پەی زاڕۆڵەکاما، بەڵام جارێوەتەر هرووژمشا کەرد سەرما و جە ماوەو سەعاتێنە جە شەهبانە بەرکریایمێ و بەرەو هەرێمەکا ئیدارەو وێڕاوەبەری کەوتیمێ ڕا. وەرو دڕندەی دووژمنی جارێوەتەر کۆچبەرێ بییەیمێ. جە هەمان کاتەنە جە کاتو کۆچبەرییمانە کوشتەی، بڕفانای و چنین چێوێ پیسێ جە لایەنو دۆڵەتو تورکی ئەرەگیریۆ سەرو گەلوو مەدەنی ئەنجام دریا. دۆڵەتو تورکی ئەرەگیری دماو ئینەی بەردەوام و چێوی پیس دەرحەق بە گەلوو کوردی ڕۆژانە زیاتەر مکەرۆ. جە وەراوەرو ئینەینە گەلوو کوردی گرڏ کاتێ ئەوەکۆشای مکەرۆ و مڏرامنەکەش بۆ بە بەهێزترین چەک جە وەراوەر دووژمنینە".

فەریدە ئەحمەدە کە ئاڏش یۆنە جە کۆچبەرا عەفرین-شەهبای ئاماژەش پانەیە کەرد کە ساڵەو ٢٠١٨ جەنگ سەرو ئاڏشا ئەنجام دریا جە دژو مرۆڤایەتی بێ، واتش: "دلێ یانەکا وێمانە جە عەفرین ئارامێ بێنمێ، بەڵام دووژمن هرووژمش کەرد سەرما و جە یانە و خاکەکەما دوورشا وستیمێ. هەرپاسە بە سەدان ژەنی و زاڕۆڵی گەشمەرڏێ کریێ ، بەڵام کەس جە دۆڵەتا مییاننەتەوەیی دەنگش بەرزنەکەردۆ و ئی ‌هرووژمەشە نەمردنا. چەتەکێ سوپاو نیشتیمانی سووریای (SNA) و چەتەکا دۆڵەتو تورکی ئەرەگیری گرڏ چێوێ پیسشا سەرو گەلەکەمارە ئەنجام دا".