بێریڤان بەرگارەییە کە جە ١٣/ ١٠/ ٢٠٢٠ جە تەرەفوو هێزەکا پەدەکەیۆ  گیریا و بێ سەروشۆنە کریا بە مەڵامەتوو ئانەی کە بەشداریش جە چن چالاکی و گلێرۊبیەیێنە کەردەن دژ بە ئەرەگیرکاری تورکیای و ۋەرتەسککەردەیۆ ئازاڎییەکا، حەرپاسە بە مەڵامەتوو  چالاکییەکاشۆ کە داواو بایکۆتوو کاڵای تورکی کەرۍ، دماو گێرتەیش  پۍ ماوەو ساڵێوە و حۆت مانگا جە ١٠/ ٥/ ٢٠٢٢ ێنە ئازاڎە کریا.

شیاوو باسیا گیریایا بادینانی بە بەهانۍ مادەو ژمارە (١)ی کە تایبەتا بە پارێزنای ئەمنی و ئاسایشی نیشتیمانی حوکمدریێنۍ، سەبارەڎ بە ڕووەدایەکا کەیسوو گیریایا بادینانی و ئا ئەشکەنجە و ئێش و ستەمەی جە تەرەفوو دەسەڵاتوو پەدەکەیۆ ۋەران ۋەرشا ئەنجام دریا، سەروو هەڵوێستیشا دژوو ئەرەگیری و ۋەرتەسک کەردەیۆ ئازاڎییەکا جە تەرەفوو بنەیانەو بارزانییوە، بێریڤان بەرگارەییە جە چەمپنەکۊتەیۍ تایبەتەنە پۍ ئاژانسوو هەواڵوو فوراتی (ANF)ی دوا.

بەمەڵامەتوو دژایەتی کەردەی ئەرەگیراوە گیریایمۍ

جە سەرەتاو چەمپنەکۊتەکەینە بێریڤان بەرگارەییە ژەنە رۆنامەنوویسە و چالاکە ۋێش ئشناسا و ئەرەیاۋناش، کە ئاڎە بەمەڵامەتوو هەرمانەکێش پێسە رۆنامەوانۍ و چالاکۍ یووەنە جە زینڎانی کریایا کەیسوو گیریایا بادینانی، کە چا کەیسەنە ژمارێوە فرە جە رۆنامەنوویسا، چالاکا، کەسا ئازاڎیواز و ووڵاتپارێزی کە دژوو ئەرەگیریەکا دەوڵەتوو ئەرەگیری تورکیای هەڵوێسشا ئەرمانا و ۋەروو هەڵوێسی ووڵاتپارێزیشا و ڕەڎکەردەیۆ ئەرەگیری جە تەرەفوو دەسەڵاتوو پەدەکەیۆ گیریۍ و زینڎانی کریۍ.

دەسەڵاڎ هەمیشە جە ئازاڎیوازا تەرسۆ 

بێریڤانە باسوو ڕەشبگیرییەکا پەدەکەیش دژ بە چالاکا و رۆنامەنوویسا کەرد و ئەرەیاۋناش: "لاو گرڎ کەسیۆ ئاشکران کە هەمیشە دەسەڵات تەرسێوەش جە کەسا ئازاڎیوازی هەن و تەرسیش چا کەسا هەنە کە گەرەکشانە ڕاسی و تاوانەکا دەسەڵاتی ئاشکرا کەرا بێ گومان ئی دەسەڵاتەو پەدەکەی هەمیشە حۆڵ مڎۆ ئا کەسە ئازاڎیوازا سەرکوت کەرا و بێدەنگشا کەرا بە چەمتەرسنای یان بەهەر ڕێوەتەر، منیچ ساڵەو ٢٠٢٠ گیریانی، پێسە مزانیۆ جە ساڵەو ٢٠١٩یۆ ڕەشبگیریکەردەی و گێرتەی رۆنامەنوویسا و چالاکا بەردەوامیش بۍ، چا ساڵێچەنە ٨٠ کەسۍ ئازاڎیوازۍ جە رۆنامەنوویسا و چالاکا و کەسا وڵاتپارێزی جە تەرەفوو پەدەکەیۆ گیریۍ.

جە مەنتیقەکا پەدەکەینە هەناسەو ئازاڎیی نەمەنەن

حەرپاسە بێریڤان بەرگارەییە باسوو ۋەرتەسک کەردەیۆ ئازاڎییەکاش کەرد بە تایبەتی جە سەردەموو کابینەکەو مەسرور بارزانینە و ئاشکراش کەرد: " کابینەو نوێەمی کابینەکەو مەسرور بارزانی ئازاڎیش ۋەرتەسک کەردۆ و حۆڵوو کپکەردەیۆ ئازاڎیش دا بە تایبەتی جە بادینانەنە تەنانەڎ هەناسەو ئازاڎیچش بە ڕاسی ناستەن، ئا کەسۍ کە دژوو تورکیای ئەرەگیری هەڵوێسشا بۍ گرڎشا گێرتۍ منیچ سەروو مژاروو بایکۆتوو کەلوپەلی تورکی گیریانی کە ئێمە ساڵانە خەڵکی هوشیار کەرمێوە جە کەلوپەلی تورکی کە ژەعرێوەنۍ دەوڵەتوو تورکیای گەرەکشا چا ڕێوە کوردی دلێنەبەرۆ".

بنەیانەو بارزانی سەڎان چالاکۍ رۆشنفکرێشا تیرۆرۍکەردێنۍ

جە درێژەو قسەکاشەنە سەبارەڎ بە ناڕەزایی مەردموو مەنتیقەکا چێروو دەسەڵاتوو پەدەکەی دژ بە ئەرەگیریەکا تورکیای، و سەرکوت کەردەیشا جە تەرەفوو پەدەکەیۆ، ئا ژەنە رۆنامەنوویسۍ ئاشکراش کەرد: "بنەیانەو بارزانی جە ساڵەکا ١٩٨٠یۆ تا ئیسە سەڎان چالاکۍ و رۆشنفکرێشا تیرۆرۍ کەردێنۍ، ئا ۋێنیشاندایۍ جە شیلادزێ و بادینانەنە کریۍ دژ بە ئەرەگیریەکا تورکیای، دیما کە پەدەکە مەردمی مەدەنیش گەشمەرڎۍ کەردۍ و چالاکێش تیرۆرکەردۍ و رۆنامەنوویسێشا گێرتۍ، شێروان شێروانی و هامڕێکێش حۆڵشادا ئا ڕاسییا ئاشکرا کەرا، ئێمەیچ تەنیا ۋەروو ئانەی دژوو ئەرەگیریەکا تورکیای هەڵوێسما بۍ و قبووڵما نەکەرد دەوڵەتوو ئەرەگیروو تورکیای بۍ دلۍ یانەو کوردی، چونکی خاکت ئەرەگیر کریۆ و حیچ هەڵوێسێت نەبۆ ئانە جە لاو منۆ بێ کەڕامەتیێوە گەورەن، گرڎوو گیریایا بادینانی هەر سەروو ڕەخنەگێرتەی و سەروو داواو حەقی و مافی و سەرو ئازاڎیی و ئینیشا بۍ کە گیریۍ .

دەسەڵاتی خیانەتکار و گەندەڵ هەمیشە جە مەردمی تەرسۆ

حەرپاسە نامەبریۍ باسش جە مەڵامەتوو تەرسەو بنەیانەو بارزانی جە دەنگوو ئازاڎیوازا کەرد و ئەرەیاۋناش: "بنەیانەو بارزانی بادینانی بە موڵکوو ۋێش مزانۆ و ۋێش زاڵ کەرۆ، بنەیانەو بارزانی گەرەکشا کە گرڎ کەسۍ پێویسا پێسە ئاڎیشا ویرکەرۊوە، ئەگەر ویرکەردەیۊی جیاوازت چنی دەسەڵاتی بۆ ئانە جە ڕاو تیرۆرکەردەی و گێرتەی و هەر ڕێوەتەریۆ پۍ بێ دەنگکەردەی و دلێنەبەردەی دەنگوو ڕای جیاوازی گێرۊنە وەر، دەسەڵات هەمیشە هەرمانەو سەرکوتکەردەی کەرۆ کە دەسەڵاتێوە گەندەڵ ئینا ئەو پەڕوو خیانەتینە کە مافەکا میلەتی پاشێل کەرۆ هەمیشە جە ویرکەردەیۆ ئازاڎیوازانەی تەرسۆ سەروو و کۆمێنت کەردەی جە تۆڕە کۆمەڵایەتییەکانە خەڵکی گێرۆ".

بە مەڵامەتوو ڕەخنەگێرتەی جە دەسەڵاتی گیریانی

بێریڤان بەرگارەییە واتش: "گرڎوو گیریایا بادینانی جە ڕاو سیناریۆیۆ گیریێنۍ، و چەواشاکەردەی جە دڎان نیایپۊرەیشارە بیەن، سەرەتا کە گیریانی نەزانام مەڵامەتەکەش چێشا دماتەر زانام کە سەروو ڕەخنەگرتەی جە دەسەڵاتی و ئازاڎیی ڕابەربڕیەی و داواکەردەی بایکۆتوو کەلوپەلی تورکی، هەڵوێس هۊرگێرتەی دژوو ئا ئەرەگیرەی کە ڕووانە خاکما بۆردوومان کەرۆ و هاموڵاتیاما گەشمەرڎە کەرۆ گیریێنا، ئانەم جە زینڎانەکا پەدەکەینە پۍ ئاشکرابی کە مافوو مرۆڤی حیچ قیمەتێوەش نیا جە دادگاکایچشانە حورمەت جە حیچ یاسێوە مەگێرا".

جە زینڎانەکا پەدەکەینە حورمەت جە داعشی گیریۍ و پاشێلکاری ۋەران ۋەر بە ئازاڎیوازا کریۍ

بێریڤانە باسش جە خراپی ئاژەو مافوو مرۆڤی کەرد جە زینڎانەکا پەدەکەینە و ئاشکراش کەرد: "فرەو جاری باسوو خراپی زینڎانییەکا سەرنیشتوو کوردسانی و ۋەرکەوتوو کوردسانی کریۍ بەڵام من ماچوو خراپتەرین زینڎان زینڎانەکۍ پەدەکەینۍ کە مرۆڤ حیچ قیمەتێوەش نیا دلێشانە و بە گرڎ جۊرۍ چا مافەکۍ مرۆڤی پاشێل کریا، جە زینڎانەکا پەدەکەینە چەتەکۍ داعشی کە دەسشا جە گەشمەرڎەکەردەو پێشمەرگەینە بیەن حورمەتشا چنە گیریۍ بەڵام پاشێلکاری جە مافوو ئێمەی ئازاڎیوازینە کریۍ، جە زینڎانەکا پەدەکەینە چەتەکۍ داعشی بە چنڎین سەعاتۍ تەلەفۆن بەکار ئارێنۍ بەڵام من تا شش مانگۍ ڕام پنەنەدریا تەلەفون کەر و ماوەو ساڵێوە و پەنج مانگا نەبریانی پەی دادگای".

مشۊم دەسەڵاتوو پەدەکەی دادگایی کریۆ

بێریڤانە باسش جە فاشستی پەدەکەی کەرد و واتش: "دەولەتوو تورکیای کە دوژمنوو نامۍ کوردی و نەتەوەو کوردیا بەڵام پەدەکە جە تورکی فاشیستەر و خراپتەرا ۋەران ۋەر بە کوردا ئازاڎیوازی، من سەروو کوردبیەی گیریێنا داخەم مەشۆ ئشیۍ جە زینڎانەکا تورکیاینە واتەبیێم سەروو کوردبیەی گیریێنا نەک دلۍ کوردانە سەروو نەتەوەکەیم گیریەو، بە بەهانۍ تێکدای ئەمن و ئاسایشوو هەرێموو کوردسانی گیریۍ بێنا بەڵام ئشیۍ دەسەڵاتوو پەدەکەی سەروو تێکدای ئاسایشوو هەرێمی دادگایی کریۆ کە ساڵانە دوژمنێوە کوردی مارۆ دلۍ خاکوو پانیشتوو کوردسانی بەمەڵامەتوو ڕیفراندۆمیوە ٥١٪و خاکوو پانیشتوو کوردسانیش جە دەسدا، جە ئیسەیچەنە مەنتیقەکۍ چێروو دەسەڵاتوو پەدەکەی پەڕۍ بیێنۍ جە سوپاو تورکی و ڕووانە بۆردوومانوو دەگایەکا کەرا و هاموڵاتیا گەشمەرڎۍ کەرا".

ئەشکەنجەی جەسڎەیی و دەروونیما ۋەران ۋەر کریۍ

بێریڤانە پی جۆرە باسش جە ئەشکەنجەکا دلۍ زینڎانەکا پەدەکەی کەرد: "جە زینڎانەکا پەدەکەینە پاشێلکاری ۋەران ۋەرما کریۍ جە ڕاو سوکایەتی پنەکەردەی بە کەسایەتی و وڕنای وورەیماوە، حەرپاسە ئەشکەنجەی جەسڎەیی و دەروونیما ۋەران ۋەر کریۍ، وەختۍ کە گیریانی ١٥ ڕووۍ جە زینڎانی تاکەکەسینە بێنۍ کە ئنڎە گولانەبۍ نەتاوێنا دلێشەنە هەناسە بڎەو بەبێ ئانەی پنەم واچا  کە سەروو چێشی گیریێنا، دماتەر فاڕانیشاوە پۍ هۆڵوو تیرۆریستا و چنی داعشا و بکوژا زینڎانی کریانی پێسە بەشێوە جە جەنگی دەروونی پۍ ئانەی پاسە بزانوو کە حیچ وەختۍ بەرمەشوو زینڎانەنە، و جە تەرسینە ئیعتراف کەروو".

بە مەڵامەتوو ئاسەواروو ئەشکەنجەدای منشا جە شاندوو مافوو مرۆڤی شارتۆ

حەرپاسە بێریڤان بەرگارەییە، ڕاسی چەواشاکارییەکاو پەدەکەیش جە ۋەران ۋەروو شاندەکا مافوو مرۆڤینە ئاشکرا کەرد و واتش: "جە زینڎانەنە پۍ ماوەو ١٥ ڕووا مانیم جە واردەی گێرت تا کەیسەکەم بیاوۆ بە دادگای ئاڎۍ تەرسیشا جە مانگرتەیم بۍ بە تایبەتی کە کەیسەکەم یاوابۍ بە دەزگاکا ئەرەیاۋنای، جارێوەشا مانگێرتەیم یاوا ٤٠ ڕووۍ ئاڎێچ دێنێم ۋنە و سەردانە ئاوی چیۍ کەرێنۍ لاشەمەرە و گرڎ جۆرە ئەشکەنجێوە دەروونی و جەسڎەیشا ۋەران ۋەر بەکارئاردا و دلۍ هۆڵوو زینڎانییەکانە سوکایەتیم پنە کەرێنۍ، بەمەڵامەتوو فرە کەلەپچەکەردەیم دەسەکێم ڕەنگەشا فاڕیێبۍ و ئاسەواروو ئەشکەنجەدایشا پێوەبۍ وەختۍ کە مافوو مرۆڤی سەردای زینڎانەکاش کەرد پەدەکە منەشا شارتانیۆ جە شاندەکەو مافوو مرۆڤی تا ئاسەواروو ئەشکەنجەکام نە وینا".

سەڕەڕاو ئێشەکام فەخر بە کوردبیەی و ژەن بیەی ۋێمۆ کەروو

بێریڤانەسەڕەڕاو ئێشی و ئەشکەنجەدایش بە فەخرۆ باسش جە هەڵوێستەکەیش کەرد و واتش: "ئێشی فرەم دی جە زینڎانەکا پەدەکەینە بەڵام حیچ پەشیمانە نیەنا کە باجی فرەم دان بە مەڵامەتوو هەڵویستەکامۆ بەڵکم سەربەرزەنا و فەخر بە کوردبیەی و  ژەن بیەی ۋێمۆ کەروو، داخەم مەشۆ دەسەڵاتوو پەدەکەی جەڕاو دادگایۆ پۍ هەتا هەتاین زارۆڵەکێشا چنە سانانی کە ئانە ئێشێوە فرە گۊرەبۍ پۍ من، بەڕاسی ستەمێوە فرەما چنەکریا و حیچ وەخت قەرەبوو مەکریۆوە، بەڵام گرنگ ئانەن ئینسان قوەتش بۆ هەمیشە واچێنا هەزاران کوردۍ جە زینڎانەکا تورکیای و ئێرانینە سەروو کوردبیەی گیریێنۍ پێسە من بنەیانەشا هەن و چایشاوە هێز هۊرگێرێنا و سەربەرزە بێنۍ کە ڕای ڕاسەم گرتێنە جە ئاشکرا کەردەی ڕاسی ئی دەسەڵاتەیە و دژوو ئەرەگیرکەردەو خاکەکەیم بیێنا، هەمیشە ۋێم بە قەرزارەو میلەتەکەیم مزانوو".

پەدەکە جە حێقمی ئیراڎەیم فرە تەرسۍ

بێریڤان بەرگارەییە باسش چانەی کەرد کە پەدەکە چن جە ئینسانی ساحیب ئیراڎەی تەرسۆ و پی جۆرە باسش کەرد: "هەمیشە هومێڎم بۍ و حیچ وەخت بێ هومێڎە نەبێنۍ کە زینڎانەنە بێنۍ دەسەڵات فرە چانەی تەرسۍ کە ژەنێوە ساحیب ئیراڎێنا، لاو دەسەڵاتوو پەدەکەیۆ یاگۍ تەعاجوبی بۍ کە ژەنێوە ئیراڎەش ئانڎە بەقوەت بۆ ۋەران ۋەروو ئا دەسەڵاتەیە مردۊوە و مانگرتەی زینڎانەنە کەرۆ بە چەکێوە دژوو دەسەڵاتوو پەدەکەی".

جە زینڎانەنە ڕۆحوو هەڤاڵێتیم ئشناسا

بێریڤانە بە ئەهمیەتۆ باسوو ئشناسای روحوو هەڤاڵێتیش زینڎانەنە کەرد و واتش: "جە زینڎانەنە دووۍ کەسۍ خەڵکوو کەمپوو مەخموریم ئشناسۍ کە بەکەیسی سیاسی زینڎانی کریێبێنۍ کە هێز و موڕاڵێوە فرەشا پنە بەخشانی بەتایبەتی جە وەختوو مانگرتەی و ئەشکەنجەدایمەنە فرە هامکارێم بێنۍ ئاگاڎارۍ تەندروستیم بێنۍ و بە مەڵامەتوو ئا دووە کەسەیۆ روحوو هەڤاڵێتیم جە زینڎانەنە ئشناسا، یاگۍ دڵوەشی بۍ کە ئاڎۍ وەڵۍ منەنە زینڎانەنە بەرشیۍ، بەمەڵامەتوو ئشناسای هەستوو هەڤاڵێتی وةشڵەی وازێنا زینڎانیکەردەکەیم جە زینڎانەکا سەرنیشتوو کوردسانینە بیۍ تا زینڎانی کەردەیم پێم بیۍ بە پەروەردە".

بنەیانەو بارزانی ڕا مەڎا کورد بە مافە نەتەوەییەکاش بیاوۆ

بێریڤانە سەرنجش وست سەروو وەڵینگەو خیانەتەکا بنەیانەو بارزانی پەی ڕاگیری کەردەی جە یاوای گەلوو کوردی بە مافە نەتەوەییەکاش، و ئاماژەش پانەی کەرد: "بنەیانەو بارزانی ساڵانە خیانەت جە گەلوو کوردی کەرا، تاوانەکۍ بنەیانەو بارزانی بەدرێژایی وەڵینگەی و بەتایبەتی جە ساڵاکا هەشتاکاوە تا ئیسە بە سەڎان کەسۍ ئازاڎیوازۍ، رۆشنۋیرێشا تیرۆر کەردێنۍ، هەر کەسێوە حۆڵوو خزمەتکەردەی نەتەوەو کوردیش دابۆ و حۆڵوو فاڕیایش دابۆ بنەیانەو بارزانی دلێشانە بەردەن، چانیشایچ گەشمەرڎە وەدات حوسێن کە بەدڕەنڎەتەرین شێوە گەشمەرڎەشا کەرد، حەرپاسە سلێمان ئەحمەڎ کە رۆنامەنووسێوەن و جە تەرەفوو پەدەکەیۆ بێ سەروشۊن کریان، ئینە سەلەمنەروو ئانەینە کە بنەیانەو بارزانی ڕا مەڎا کورد بە مافە نەتەوەییەکاش بیاوۆ جە حەر پارچێوە کوردسانینە بۆ".

پەدەکە حۊڵوو دلێنەبەردەی ئشناسنامە و کلتوروو کوردی مڎۆ

دەوڵەتو ئەرەگیروو تورکیای بەپاو پلانێوە درێژ مەودای حۊڵوو دلێنەبەردەی کوردی مڎۆ، موینمۍ بەمەڵامەتوو واردە و کەلوپەلوو تورکیایۆ خەڵک ڕووانە تووشوو نەوەشی شیرپەنجەی با، چونکی ئەرەگیر جە ڕاو کیانای واردەی وکەلوپەلیۆ مەڵامەتا پۍ وەشبیەی شێرپەنجەی حۊڵوو دلێنەبەردەیما مڎۆ، حەرپاسە جە ڕاو کەناڵەکا دەسەڵاتیۆ بەردەوام فیلم و زنجیرە دراما تورکییەکا پەخش کەرۆ، دەسەڵاتوو پانیشتوو کوردسانی پەروەردەو ئەرەگیری تورکیایشا یاۋنان بە گرڎ یانێوە جە ڕاو بەرنامە تەلەفزیۆنیەکاوە، چا ڕێوە گەرەکشانە ئشناسنامە و کلتوروو کوردی دلێنەبەرا"

کەناڵەکۍ پەدەکەی ئینۍ خزمەتوو ئەجێنداو دەوڵەتوو ئەرەگیروو تورکینە

حەرپاسە باسش جە حۆڵەکا پەدەکەی کەرد پۍ ئەسڕیەیۆ کلتور و وەڵینگەو کوردی و ئەرەیاۋناش: "پەدەکە جە ڕاو یاونەریەکاشۆ خەڵکشا بێ هومێڎ کەردەن و گەنجێشا بێ ئیراڎە کەردێنۍ، وەشەسیای نشتیمانی و خاکیشا دلۍ خەڵکینە کاڵ کەردەنۆ بەشێوێوە سیستماتیک هەرمانەش کەردێنە کە نەتەوەو کوردی و تاریخوو کوردی گرڎی سەڕۆوە، تەماموو کەناڵەکاو دەسەڵاتوو پەدەکەی ئینۍ خزمەتوو ئەجێنداو دەوڵەتوو ئەرەگیروو تورکینە، حۊڵوو تێکدای کلتوروو کوردایەتی مڎا پۊکای بنەیانەو بارزانی زەرەرۍ فرەش جە قەزیەو کوردی دان، ئەگەر ئی بنە یانە نەبیێنۍ ئیسە کورد جە تەماموو کوردسانینە یاوابۍ بە مافەکاش، بنەیانەو بارزانی دژایەتی کوردی کەرا پەی پارێزناو مەسڵەحەتوو ۋێشا، وەختۍ حۊڵوو ئاشکراکەردەی ڕاسیەکا مڎەیمۍ، دەسەڵات حۊڵوو چەواشەکاریی مڎۆ".

مشۊم یەک ڕیز و یەک دەنگۍ بیمۍ ۋەران ۋەروو ستەمینە

بێریڤانە، پەیامێوەش ئاڕاسەو ئازاڎیوازا کەرد و واتش: "ئێمەی میللەتوو کوردی هەمیشە پەنەوازما بە یەکڕیزییا، بنەیانەو بارازنی هەمیشە حۊڵمڎۆ پەرتەوازەیی بەینوو ئازاڎیوازانە و چالاکانە وەش کەرۆ، ئانەی زەرەر جە ئێمەی ئازاڎیوازا و چالاکا مڎۆ پەرتەوازەییا، گرنگا گرڎوو چالاکا واز جە مەسڵەحەتی تایبەتی بارا و یەک ڕیز و یەک دەنگ و یەک هەڵوێسۍ بیمۍ ۋەران ۋەر پا ستەم و نادادییەی کە ڕووانە کریۆ".

فەخر کەروو کە سەروو دژایەتی کەردەی ئەرەگیری گیریێنا

جە دمادمایی قسەکاشەنە بێریڤانە باسوو ڕۊو دادگایی کەردەکەیش کەرد و واتش: "دماو ساڵێوەو پەنج مانگا پۍ ئەوەڵجاری بریانی پۍ دادگای، جە کەیسوو گیریایا بادینانی زیاتەر ئاشکرا بۍ کە چی وولاتەنە دادگا و یاسا بیەیش نیا بەڵکم دادگا ئینا دەسوو حزبیوە و حزب کاریگەری فرەش سەروو چارەنوویسوو زینڎانیا هەن، تا ڕۊو دادگای ڕا نەڎریا پارێزنەرەکاما وینمۍ، جە دادگانە بە دادوەریم وات کە ۋێم بەتاوانبار مەزان و فەخر کەروو کە سەروو مافوو مللەتەکەیم و سەروو هەڵوێستیم دژوو ئەرەگیرا گیریێنا، جە دادگایکەردەی ئێمەنە نوێنەروو ووڵاتا و ڕێکوزیاکا ئاماڎۍ بێنۍ، جە دادگانە واتم مەبۆ چی دەسەڵاتەیە تەرسمۍ