بەسێ ئەرزینجانە ئەندامەو کوردیناسیۆنو کەژەکەی بەشدارییش بەرمانەو خوەبوونو ژەن- تیڤینە کەرد و جوابو پەرسەکاو ئارژین بایساڵێش سەبارەت پا دەورا کە سیستمی سەرمایەداری پەی ژەنێ و پیای دیاریێ کەردێنێ داوە.  

ورسەنگنای بەسێ ئەرزینجانێ پێسنەن:

ڕابەرو گەلو کوردی عەبدوڵا ئۆجالان کە ساڵەو ١٩٩٦دا باسو 'کوشتەی پیا'یش کەردەبێ، ئینەیچ فرەو لایاوە بە غەڵەت یاوێشنە. مەبەسو عەبدوڵا ئۆجالانی چێش بێ؟  

کۆشیایەکاو ڕابەر ئاپۆی پەی بۆ ژیوایێوی ئازاد و یەکسانی بێ. دووێ چێوێ بەفرەیی ناچارما کەرا. یوەم کۆیلایەتیی ژەنێ. دووەم دەسەڵاتداریی پیای، پەوکای ڕابەر ئاپۆ پێسەو ڕابەرێو گەرەەکش بییەن ژەنی گردوو بوارەکانە گنانێ وەڵێ. چ جە ڕووەو یاوینەیوە، چ جە ڕووەو یاگێ و ژیوایوە، ژەنی بەشداریی ژیوایشا کەردەن و ئاستێوەشا خوڵقنا. هاموەخت چنی ئینەیچە هەوڵێشآ دێنێ دیای هەژموونوازی و دەسەڵاتداری بفاڕۆ. چونکوم ئی دیایە و ورسونیشتە تەرسی وەشە مکەرۆنێ. بە جۆرێو گردو ژیوای دلێنە مبەرۆ. مزانمێ گلێرگا یەک ڕەنگش نییقا و تەنیا پیێ چی ژیوایەنە نمەژیوانێ. ژەنی هەنێ زاڕوێ هەنێ و گەنجێ و پیرێچ. بەڵام دەسەڵاتداری پیای پاسەش کەرد، کە گردو گلێرگایش بە بەرژەوەندیی وێش ڕێک وستەن. ئیرادەو بەشەکاو تەرو گلێرگایش دلێنە بەردێنێ، پەوکای کوشتەی پیای یانێ پیای دەسەڵاتدار بنەماو بنەڕەتو سۆسیالیزمی و ژیوای ئازادی وەش بکەرۆ. وەختێ ماچانێ کوشتەی پیای بێگومان مەبەست ئی عەقڵیەتینە نەک لایەنی فیزیکی. بەتایبەت جە ڕووەو ئەنەیاوایۆ، کەسایەتی، ژیوای، دلێ یانەینە، سیاسەتنە، کوشتەی دەسەڵاتداریی پیاین.  

ئێمە کوردستاننە بە جۆرێوی تەر کۆشییەیمێ، جە ڕووەو گلێرگەی و کۆشیای جێندەرییوە کۆشیایێوی قووڵتەر و فرەلایەنە بکەرمێ، بەپێچەوانەو شۆڕشەکای تەریوە. شۆڕشەکای تەر چەنینێ بێنێ؟ شۆڕشەکەشا هەمان شێوەو وێش بەبێ حیچ فاڕیاێوە مەنۆ. فاڕیاێوە کەمشا جە ژیوای و کەسایەتیینە کەردەن، فاڕیاێوە بنەڕەتیشا نەکەرد. بەتایبەت پیێ نەفاڕیێ و پێسەو وێشا مەنێوە. تەنیا چینێوە، نەتەوێوەشا بە بنەما ورگێرت. بەڵام ئێمە شۆڕشەکەمانە ژەنی بە بنەما مگێرمێ. چونکوم فرەتەرین چینەی ستەموەنەکریێ گلێرگای ژەنینێ. ڕابەر ئاپۆ ئاماژەش کەردەن پانەیە وەڵێ گرد چیوێوەنە ئازادیی پەی ژەنا زەرووەرا. چونکوم ئەگەر ژەنی ئازادە نەبۆ گلێرگایچ ئازاد نمەبۆ. ژیوای ڕوانەو پیاینە؛ هەموو ڕوێوە، لایەنو شێوەو ژیوای، تەنانەت لوای، قسەکەردەی، تێکەڵاوی، تایبەتمەندییەکاو دەسەڵاتداریی پیای موینیا. سەرۆک ئاپۆ ماچۆ پیاێوی پاسە ئازاد نییا. ئی پیا پەنەوازا ئی تایبەتمەندییا وێشنە نازۆ، پەنەوازا پەیوەندییەکاش چەنی ژەنا و گلێرگای بفاڕۆ و تایبەتمەندییە دەسەڵاتدارییەکەیش بکوشۆ و پێسەو پیاێوی ئازادی ملشرە زاڵ بۆ و وێش بنیات بنیۆوە. وەختێو پەی یوەم جاری ساڵەو ٩٦ینە باسو کوشتەیی پیایش کەرد، دەنگدایۆێوی گەورەش وەنە کەوتۆ، گرد لایێو سەرەشا سڕ مەن. سەرۆک ئاپۆ بە یوەمین ئاراسەو سۆسیالیزمی پێناسەش کەرد و بەردەوام چالاکییەکاش چا ڕووەوە بەردێ ڕاوە.

ڕەنگای بگێڵمێوە پەی وەڵێ ئانەیە. ئی پیاسالارییە چەنین پەرەش سانا؟ ئایا ئینەیە مگێڵندێوە پەی گەشەسانای پیشەسازی؟ ئایا حیچ کاریگەرییوی دەوڵەت نەتەوەی بییەن بایسوو دەسەڵاتداریی پیای؟

تارێخو دەسەڵاتداریی پیای مگێڵۆوە پەی ماوەو ٥٠٠٠ ساڵا و قۆناغ بە قۆناغ پەرەش سانان، بەڵام بەتایبەتی چی٢٠٠ساڵەو دمایینە پیاسالاری زیاتەر دەسەڵاتش سانان. چونکوم سیستمو مۆدێرنیتی سەرمایەداری  بنەڕەتنە سەرو ڕەنجو ژەنا بنیات نریان. چندە زیاتەر ژەنیش داگیرێ کەردێ، ئاندە گەورەتەر بی. چی سەردەمەنە کۆیلایەتیی ژەنێ فرە قووڵا. وەڵتەرێچ بییەن، بەڵام وەختێو زانست پەرەش سانا، تەکنەلۆژیا پەرەش سانا، سیستمو سەرمایەداری جە ڕووەو دارایی و بازرگانییوە گەشەش کەرد، دۆخوو ژەنا زیاتەر تێک شییەن و کۆیلە بییەن. ئیساتێ نەتەوە دەوڵەتەکێچ ژەنا دلێنە بەرانێ، فرەو نەتەوە دەوڵەتەکا پێوە هەرمانە مکەرانێ. حەرپاسە پیاسالاری جە لایەنی خراپۆ بەردەوام گەشە مکەرۆ. سەرۆک ئاپۆ فرەو جارا بەتایبەتی سەرنجەش وستێنە سەرو کوردستانی: "گێرا ژەنی یانەنە کۆیلێ بۆ و پیایچ دەسەڵاتدار بۆ، بەڵام پیا وەراوەرو دەوڵەتینە کۆیلەن". چونکوم سیستمو دەوڵەتی پێسنەن. وەختێوە پیا زاڵ مبۆنێ سەرو یانەیرە، پیای بێدەنگ مکەرۆ و هەمان وەختنە سیستمی دروست مکەرۆ.

پێسەو ئانەیە پاسەن کە سروشتو پیای دەسکاری کریابۆ. حەرپاسە پیێ  بەرو گلێرگەی سروشتیوە مردنیێنێ. ئایا ئینە کاریگەرییش نەبییەن؟

چەنی پەرەسانایی شارنشینی، پیاسالارییچ پەرەش سانان. چونکم پیا زینداننە، خەسەخانە و پەروەردەنە قەوەتتەرێ بیێ. ویەردەنە دەسەڵاتداریی بێ، بەڵام سیستمەکە پاسە قووڵ نەبێ، تا ڕاددێوە ژیوای سروشتی مەنەبێ. حەرچند خەڵک زیاتەر جە ژیوای دەگانشینی دوورێ گنێنێوە، سیستمو پیاسالاری قەوەتتەر بێ. پەی نموونەی سیستموو پەروەردەی فرە ڕەگەزپەرسانەن، سیستمو مۆدێرنیتی سەرمایەداری گەرەکشا دەس ملو گلێرگایرە بگێرۆ. گەرەکش نیا گلێرگا بە ئازادی بژیوۆ و پەیلوایش بەربوزۆنێ و ئیرادەو وێش بپارێزنۆ. گەرەکشا ڕاو پیاسالارییوە گردو گلێرگای بوزۆنێ بنەو دەسو وێش و ئەرەگیرش بکەرۆ. لایێوی تەریچۆ گەرەکشا بە کۆیلەکەردەی پیای، گردوو گلێرگایچ داگیر بکەرۆ. سیستمو ئەورووپای مواچۆنێ ژەنی و پیا یەکسانێنێ، بەڵام ئینە ڕاس نییا. ئێمە بەهاێوی فرەما پەی ژەنانیانرە، بەڵام وەختێو بە قووڵی موینمێش، پیێ زیاتەر جە ژەنا کۆیلێ بیێنێ.

 

تا ئیساتێ پەی کوشتەی عەقڵیەتو پیای چێش کریان؟

پیا بە تەنیا نمەفاڕیۆ. سیستمو مۆدێرنیتی سەرمایەداری جە کەسایەتیی پیاینە وێش ڕێک وستەن. وەڵێکەوتەیی ژەنا جە فاڕای پیایانە فرە بنەڕەتیین. ئەگەر ژەنی کۆمەڵ، ئیرادە و ویرۆکەردەی و ژیوای خاستەر بکەرۆ، ئەگەر چەنی وێش جەنگ بکەرۆ و فێرو ئازادیی بۆ، ئاوەخت پیا متاوۆ وێش بفاڕۆ. بێگومان مەسەلەکێ ئانێنە  یۆ بە یۆ پیایا بفاڕانێ، بەڵام بێگومان ئانەیچ گرنگا. ژەنی پەنەوازا جە هەردووە لایەنۆ قەوەتە بۆ. متاوۆ پیسەو کەسێوی وێش بوزۆ وەڵێ و وێش ڕێک بوزۆ. ڕابەر ئاپۆ یۆ جە ورسەنگنایەکاشنە، ڕەخنەش وەنەو ژەنا گێرتەن و ماچۆ: "تەنانەت نمەتاوا پیای بفاڕا" یانێ جەنگی هەقەتین مشۆم چێوە دەس پەنە بکەرۆ و فرە گرنگا.

ئینە چەنی مێ ئاراوە؟ تۆ باسو وتارو ژەنا یا ڕێکوستەیەکا مکەری، ئایا میکانیزمێو پەی ئی هەرمانێ هەن؟

ئینێ گرد هەنی. پەی فاڕیای پیایا فرە ڕێ هەنێ، بەڵام مشۆم گرد لاێوە هێزو وێما پەرە پەنە بدەیمێ. بڕێو جارێ ماچمێ بییەی ڕێکوزیایەکا وەسێن. بەڵام پاسە نییا. هەڵوێست و بەشداری و گفتوگۆما وەختو هەرمانکەردەی چەنی پیایانە فرە گرنگا. فرەو کەموکوڵییەکا بەرێ مگنا. ماچا ئێمە ئازادێنمێ یا قەرار مدەیمێ پیاو دلێما بکوشمێ. بەڵام بڕێو بوارێ پێسنێ نییەنێ. مشۆم جەنگو دەسەڵاتداریی پیای بکەرمێ، بەڵام بڕێو جارێ چەمەڕێ ئانەیە مکەرا، کە پیاێو چێوێ بواچۆ و هامشێوەش مامەڵە مکەرا ئینە هەرمانێوە ڕاسە نییەنە. یانێ جەنگ چەنی پیای هونەرش گەرەکا. پاسە فاڕیای مکریۆ. پێسە جمیەرێو چەنی هەردووە هامڕایا بیمێ و چەنی پیاسالاریی جەنگ مکەرمێ، بەشو فرەو زەحمەتی ئینەنە.

یان کۆشیایی پەی نمەکریۆ، یان بە شێوێوی لیبراڵی مامەڵەش چەنی نمەکریۆ، یا بە تەمامی ڕەت مکریۆوە. ئینێ پیای مفاڕانێ. پاسە دەسبەردارێ تایبەتمەندییە پیاسالاری و باڵادەسییەکاش نمەبۆ وەختێو تۆ بە شێوێوی لیبراڵیانە مامەڵەش چەنی بکەری. چونکوم بە شێوێوی پێوە ورمکەردێ و ڕەخنە نمەگێردێ. یا وەختێ چەنەش جیا مبۆوە نمەتاوینە هامڕاییش بکەری. حەرپەوکای دووریکەردەی دروس مبۆ. کارەکتەرو پیای پێسەن، تا ورسونیشتی تندتەرش چەنی بکەری، ئادیچ تندتەر مبۆوە. ژەنی مشۆم بەڕێکوپێکی هەماهەنگ مامەڵە بکەرۆ، چەنی هامنەوەعەکاش جمۆوە، ڕێکوزیای تایبەتیی وێش و ساعیب ئیرادە بۆ، بتاوۆ موناقەشە بکەرۆ و ئەنەیاوا بۆ. وەختێو پێسە بلۆ دلێ ژیوایوە، هەم متاوۆ هامڕاییش بکەرۆ و هەم متاوۆ جە لایەنە خراپەکاو جەنگی بکەرۆ. چونکوم ئێمە پێوە دژو فاشیزمی و سیستمو دەوڵەت نەتەوەی جەنگ مکەرمێ.  بێگومان وێستەیوە ڕێباز و شێوازێوە پەی ئی هەرمانێ ئاسان نییا. هەمان وەختنە هەم هامڕاییش بکەری هەم جەنگ بکەری هەرمانێوە ئاسانە نییەنە.

بەڵام لایەنێو پاسە نییا؛ پیا چەمەڕاو کەسێوە بۆ و بفاڕۆش. ئایا ئینە جەنگێوی دووەلایەنە نییا؟

بەگردی ئینە تەمام غەڵەتا، بەڵام بەداخۆ پاسنەن، ئینە کۆشیایێوەن. پیا مشۆم پیسەو ژەنێ بکۆشیۆ. دۆخەکە لاو گەلو ئێمەیچۆ حەر بە هەمان شێوەن. فرەو پیایا ورمێزا و باسو هامڕا ژەنەکاشا مکەرانێ و ماچا ژەنی پێسە وەڵێ کەوتێنە، سەرمەشقە بیێنە، پێسە شۆڕشش کەردەن و هتد. بەڵام وەختێو تەماشەو کەسایەتیی وێش مکەرمێ، یەک یەس فاڕیای نمەوینی، ئینە چانەنە. پێسەو ئانەیە بواچی ئی جەنگە هینو ژەنان، بەڵام پاسە نییا. پیا مشۆم بواچۆ ئی تایبەتمەندیێ من تایبەتمەندیێ دەسەڵاتەکەینێ و بۆ بایسو ئانەیە ژەنی و پیا ئازادێ نەبانێ.  دەسەڵاتداریی چێشا؟ پیێ تەنیا پێسە ئامێرێوی سێکسی ژەنا موینا. پێسە هامڕاو وێشا نمەویناش. مشۆم پێسەو هامڕاێوی واتەواچش چنی بکەرانێ، ڕێزش وەنە  بگێرا، پێسەو ئینسانێوی تەماشە بکریۆ و نەک تەنیا بواری سێکسییوە. ٥ هەزار ساڵێن پیا ژەنی پێسەو واڵێ و ژەنێ و ئەداو وێشا موینانێ، بەڵام قەت بە چەمو ژەنێ و کەسێوی یەکسانی چەنی وێشا نمەویناش. پیا پەنەوازا بەردەوام چەنی وێش جەنگ بکەرۆ و وێش ڕەخنە بکەرۆ.

ئانە مشۆم کەمێو ئارامیی وێش تێک بدۆ

پەنەوازا جە وێش شەرم بکەرۆ. چونکوم ئی سیستمە سەرمایەدارییە پیای دەسدرێژکەر دروس مکەرۆ. عەقڵیەتێوی جەنگوازانە وەش مکەرۆ. ئینسنان تا چند هاگادارو ئینەینە یا نا، چیوێوە تەرا، بەڵام سیستم پێسە ئینسانی چەنی وێش مگونجنۆ. پەوکای پەنەوازا پیا وەراوەرو ژەنێنە شەرم بکەرۆ و ڕەخنە وەنەو وێش بگێرۆ و وێش ڕاس بکەرۆوە. ئانە گەرەکشا خەباتگێڵن، ئازادیواز یا دیموکرات بۆ، سەرەتا مشۆم گرد تایبەتمەندییە پیاسالارییەکاش بفاڕۆ. پەی نموونە ژەنی بە کەم نەزانۆ، پێسەو ئینسانێو بوینۆش و بە یەکسان بوینۆش، بەڵام دەوروو ژنایچ فرە گرنگا. ژەنی پەنەوازا بە هۆشیارییوە مامەڵە چەنی پیایا بکەرانێ. دیارا بەردەوام ملەملێ هەنێ چونکوم یەکسانی بەینو هەردووە ڕەگەزەکەینە نییا. قەت ژیوایێوی ئارام نییا. پەوکای پێویسیی ژەنا بە پەروەردە و ئازادی و بە شێوێوی ڕێکوزیای هەرمانە مکەرانێ. بە هەمان شێوە پیێچ مشۆم ئا هەرمانێ بکەرا.

بڕێو چا کۆدا مەژگمانە یاگێ گێرا. باسو ئانەیتە کەرد بە هەزاران ساڵێ ژەنی کۆیلێ و پیێچ دەسەڵاتدارێ بیێنێ. ئارۆ پۆلو یوەمی مەکتەبە حکومییەکانە موچیاوە. پەی زاڵبییەی سەرو ئی چەمکارە جە سیستمو کۆنفیدرالیزمی دیموکراتیکینە مشۆم چێش بکریۆ؟

یوەمین ئامانجو سیستمو ژەنا بنیاتنیای ژیوایێوی ئازادین. شۆڕشی فرێ ڕووەشا دان، بەڵام هامسەنگیێوی ئازاد بەینو ژەنێ و پیاینە بەدی ناما. ئێمە ئیساتێ بانگەشەو ئانەیە مکەرمێ، کە ڕاو شۆڕشو ژەناوە شۆڕشێوی هەقەتین بنیات منیەیمێ. سۆسیالیزمی هەقەتین ڕاو شۆڕشو ژەناوە دروست مبۆ. کۆنفیدرالیزمی دیموکراتیک تەنیا سیستمێو نییا. ئێمە داوا وەنەو کەسانێو مکەرمێ کە بەشێوەنێ جە سیستمی کۆنفیدرالیزمی فاڕیای وێشانە بخوڵقنا. چی سیستمەنە گەلێو ڕێکوزیێ و فرە ئایدۆلۆژیێ و چەمکێ متاوانێ پێوە بژیوانێ. ئی سیستمە میللەتی دیموکراتیکو ئێمەن. گردو ئینسانەکا بە سەرمەشقایەتیی ژەنا پێوە هەرمانە مکەرا و مژیوا.

دەورو ژەنولۆژیی چێشا؟

ئیساتێنە ژەنولۆژی چی بوارەنە سەرمەشقایەتیی مکەرۆ. ژەنۆلۆژی بۆ بایسو فاڕیای پیای و گلێرگای. یۆن جە  قەیرانە گەورەکاو سیستمو زانستی. زانستش سەرو کۆمەڵو ئینسانی بنیات نریان. ئارۆ با تەماشەو تارێخی و شۆنەوار، کۆمەڵشناسی، فیزیا و هامشێوەکاش بکەرمێ. گردشا جە یۆترینی جیێ کریێنێوە، ژەنی جە هیچکامینە نییەنە. بە درێژایی تارێخی ژەنی گردو زانستەکاشا خولقنێنێ، ژەنی ئاردەینەیشا کەردەن،  پیێ ئا ئاردەینەیشا بە نامێ وێشاوە کەردەن و سیستمی سەرمایەدارییشا بنیات نیان. ژەنولۆژی نیشانەما  مدۆنێ، کە چەنی ژیوایێوی دروس بنیات بنیەیمێ، حەرپاسە نیشانەما مدۆ کە چەنی بنەیانێوی یاگەدار، سیاسەتێوی گونجیا بنیات بنیەیمێ. پەی ژەنێ و پیای کێشە نییا، کە فرە هەرمانە مکەرانێ، هەوڵێ مدانێ، بەڵام جە پێشکەشکەردەی ڕانمایی و ڕێکوستەیەکا کەموکوڵیی هەن.

ئا زوانە ئیساتی پەنەش قسێ مکریا پیایانەن و ڕەگەزپەرەسانەن، ئێمەیچ پەی زوانی کۆشیەیمێ. زوانی کوردی، شێوەزاری کرمانجکی، زوانو ژەنێن. کرمانجێکینە قسیوە هەنە: "ئەز ما خوەرە بێژیم" یانێ بە ئەدێم بواچو. پەی نموونەی زوانی تورکیینە ئینە پاسنە نییا، بە تورکی ماچا "بە ئاغاکەیم بواچو". مەبەس پیایان. بەڵام بە کوردی، موخاتەب ئەدانە. بناغەو کولتووری کوردی سەرو بنەماو کولتوورو ئەدێ و ژەنێ ئەرەمەرزیان. بێگومان ئەی جۆرە زەحمەتیێ پەی فاڕیای پیایچ فرە پێویسێنێ.

بە سەدان پیێ جە ئەرەپڕایەکاو کوردستانی و ئێرانینە مەردێ، حەرپاسە دیما پیایانێوە هەنێ گەرەکشانە وێشا بفاڕا، بیاوا ئا حاسە، دژو پیاوەتیی ناخیشا مگژیانێ. ئی وزە چەنی مشۆم بەربگنۆ و بپارێزنیۆ؟

بێگومان پیێ چانێچ هەنێ. دروشمو ژەنی، ژیوای، ئازادی دروشمێوی فرە تارێخیین. پەی یوەمجاری گلێرگا بە دروشمو ژەنا، ژەنی، ژیوای، ئازادی مجیێرە سەرو جادەکا. پیایانێوی فرێ بەشداریی وێنیشانەدایەکا بیێ، قەنارە دریێ و ئەشکەنجە دریێ. سەرەوردایەکانە، نەک حەر وەرکەوت و کوردستاننە و ئێراننە، بەڵکوم گردو جیهانینە پیێ بەشدارییشا کەرد. ئینە ئاماژەنپەی چێشی؟ پیێ ئیساتێ هەست پانەیە مکەرا کە تا ژەنی ئازادە نەبۆ، ئازادی نمێ دەس. ئینەیچ حاسو کۆشیای ژەنێ و پیایچ بەرموزۆنێ. ڕاو ئازادیی پەی گردو گەل و ویروباوەڕەکاو  وەرکەوتو دلێراسەی هەموار بۆوە. ئانەیچ ئینا دەسو ئێمەنە.

سەرۆک ئاپۆ چەنی وێش ورسونیشتش کەرد؟ چەن وێش جەنگش کەرد و چەنی فاڕیایش کەرد؟

سەرجەمو ڕێبازەکا، ئایدۆلۆژیا و ڕوانگەکێ، کە باسما کەرد پەیوەندییش بە سەرۆک ئاپۆیۆ بێ. ئەگەر نەتاوی وێت بفاڕی، نمەتاوی سەرمەشق بی. سەرۆک ئاپۆ ماچۆ: "گرد ڕوێو چەنی وێم جەنگ مکەرو" پەی نموونەی سەرۆک ئاپۆ هامسەرگیرییش چەنی فاتیمەی کەرد. ١٠ ساڵێش خواینا و سەرۆک ئاپۆ بەردەوام شرۆڤەش پەی هامسەرگیرییەکەی کەرێ. هەوڵێش دێ و ڕۆشنش کەرێوە، کە چەنی ئا پیاشە کەسایەتیی وێشنە کوشتەن. سەرەتا چەنی وێش جەنگش کەردەبێ. چونکوم سەرۆک ئاپۆ هۆگرو ئازادیی بێ، ئی نۆعە کەسایەتییێ فرە دەگمەنێنێ. ڕابەر ئاپۆ بە ژیوایش ئا مۆدێلە کە دلێشنە بێ ڕەتش کەردۆ. ئا مۆدێلەشە ڕەتکەردۆ، کە ژەنی پێسەو کۆیلەو پیای پێسە و سەردەسەی دیارییە کەردێبێ دمایی جیا بیۆ. گرد کەسێو نمەتاوۆنێ ئینەیە بکەرۆ. چونکوم عاشقو ژیوای ئازادی و گەلەکەیش بێ، گردو هێز و سەرنجیش بەرەو ئامانجەکەیش فاڕا و فاڕیایش کەرد. پەی ئازادیی ژەنێ کۆشیای فرەش کەرد، پەی ڕێکوستەی و گەشەپەنەدای ژەنا، پەی قەوەتکەردەی ژە نان فرە کۆشیا. تەنیا چوارچوەو تیۆرێونە نەمەنۆ، بەڵکوم بە شەخسیی دەسش بە بەیاگەیاونای کەرد، هەم پەی وەشکەردەی پارتو ژەنا و سوپاو ژەنا ئامادەکارییش کەرد.