ڕۆو پەنج شەممەی ۋییەردەی ٤ و نیسانی، مەراسیمۍ فەرهەنگی شکۊڎارەنە جە دەگاو دەگاگاو هەورامانوو ۋەرکەوتوو کوردسانینە بە بەشداری لاو کەمیۆ ١٥ هەزار کەسا جە شۊنە جیاجیاکاو ۋەرکەوتوو کوردسانی و سەرانسەرو ئێرانی بەشدارێ مەراسیموو هەزار دەفېشا کەرد.

یۆ جە سیما زەریفەکا مەراسیمەکەی ئانەبۍ کە مەردم بە جلوبەرگی کوردیی ڕەنگاوڕەنگ و ئاڵوو واڵاوە دیمەنێوی قەشەنگشا بە مەراسیمەکەی بەخشابۍ. هەرپاسە بە پۆشتەو ئا جلوبەرگە کوردی و فەرهەنگییە کولتوریەو کوردسانی سەرنجەو مێماناو شۊنە جیاجیاکاو ئێرانی و مېمانەکا بەریش لاو ۋێشەرە کێشتەبۍ. 

 ئانەی کە زیاتەر بیەبۍ بە یاگۍ سەرنجەو مێمانەکا، بەشداریۍ ڕەهاو ژەنا بۍ جە مەراسیمەکەنە هەم بە بەشداریکەردەیشا جە دەف ژەناینە، هەم جە نیشانگاو هەرمانە دەسی و فۆلکلۆرییەکاو هەورامانی و بەرهەم و وارڎەکا تایبەت بە مەنتیقەکەینە.  

مەراسیمەکە بە پاو بیناسازیی هەورامانی، دەفژەنێ سەرو یانەکاو دەگێکێوە ڕیزشا بەست و هونەرو وێشا پێشکەش کەرد، کە جۆشوخرۆشێوی تایبەتییش بە مەراسیمەکەی بەخشا.

پاسە قەرارا ڕۊو جومعەی ١٩/٤/٢٠٢٤ شارەدەگاو پاڵنگانیچنە هەمان مەڕاسیم بەبەشداریۍ ۋەرفراوانوو خەڵکوو هەورامانوو ۋەرکەوتوو کوردسانی و بەروو کوردسانی بلۆڕاوە.

 ئێمە گۆشېوەتەر جە دیمەنە سەرنجڕاکێشەکاو مەراسیموو هەزار دەف و دەگاگایتا پۍ فاڕمېوە.