شۊنەو هرووژمە بۆردومانیەکەو دەوڵەتو تورکیایرە کەبی بەمەڵامەت و گەشمەرڎەبیەو دووۍ ژەنە ڕۆنامەنوویسا، ڕۆنامەنوویسا هەڵوێسو ۋێشا بەربڕی و واتشا: "بەئامانجگێرتەی ژەنا جەلایەنو دەوڵەتو ئەرەگیرو تورکیایۆ تەرسینە جە هێزو ژەنا"
دماو ئانەی جە ٢٣ۍ ئابو ٢٠٢٤ینە، جە سنورو قەزاو سەیسایەقی سەر بە پارێزگاو سلێمانی، دەوڵەتو ئەرەگیرو تورکیای بە چەمساغی هێڵۊو خیانەتی جە ڕاو فڕۆکەی بێ فڕۆکەوانیوە، ترۆمبێلێوە کەناڵو ستێرکیش بە ئامانج گێرت و بۆردوومانش کەرد، و چنەشەنە هەر دووە ژەنە ڕۆنامەنوویسۍ (هێرۆ بەهادین) و (گوڵستان تارا) گەشمەرڎۍ بیۍ و ڕۆنامەنوویسێوەیچ زامڎار بی، ناڕازایەتییەکۍ بەردەوام ئینۍ زیاڎبیەینە و ژەنا ڕۆنامەنوویسۍ بە تنی ئی هرووژمێشا شەرمەزارۍ و ڕسوا کەردۍ.
ڕۆنامەنوویسە پەریان ئەحمەدە، جە بارەو بۆردوومانەکەیۆ پەی ئاژانسوو هەواڵوو فوراتی (ANF) قسێش کەردۍ و واتش: "سەرەو ڕێزی پەی گیانی پاکو گەشمەرڎا منامنوورە، دیارا بە ئامانجگېرتەی ژەنا جەلایەنو دەوڵەتو ئەرەگیرو تورکیایۆ ئا حەقەتینەیە بەروزۆ کە ئاڎۍ چن جە هێزو ژەنا و ڕا و ڕێبازیشا متەرسا، بە تنی ئیڎانەو دەسەڵاتی کوردی و ئا سەندیکا و لایەنا مکەرو کە ۋەرا ۋەر پی تیرۆری و کۆمکوژیە بێدەنگێنۍ و کاروەدایشا نییا، دڵنیایی مڎەیمۍ کە پەی هەمیشەی سەرو ڕا و ڕێبازی ڕاسی و هەقیقەتی بەردەوامۍ بیمۍ و ڕاو ۋێما گومە نمەکەرمۍ، جوابو ئا هرووژما مڎەیمێوە و حەقەو گەشمەرڎا ۋێما مکەرمێوە."
هەر سەبارەت پی پەرسەیە، ڕۆنامەنوویسە بێریڤان بەرگارەییە، ماچۆ ئی تیرۆرە نمەکریۆ بەبێ چەمساغی هێڵۊو خیانەتی ڕووەبڎۆ و واتش: " ئێمە ئیدانەو ئی هرووژمەیە مکەرمۍ و ڕسوا و شەرمەزارش مکەرمۍ، حەجگیز نمەکریۆ دژمن بەبێ هێڵۆو خیانەتی پی جۆرە شۊن پاشا هۊرگێرۆ و گومانما نیا کە چەمساغی پەی دەوڵەتو فاشتی تورکیای دژمنی مکریۆ، دژمن ئەجۆشەنە کە ئێمە متەرسمۍ، بەڵام حەجگیز نمەتەرسمۍ و ڕا و ڕێبازو گەشمەرڎا ۋێما درێژە پنەمڎەیمۍ و جوابما پەی هرووژم و کردەوە قیزەونەکا دژمنی مبۆ."
