بەیاننامەو کۊمیتەو پژاکی کۊڵن – ئاڵماننە
کۊمیتەو پەژاکی کۊڵنوو ئەلمانیاینە، داواش کەرڎە، کە وەرفراوانانە بەشداری بۊ جە کەمپینوو میاننەتەوەیی "ئازادیی پەی عەبدۊڵڵا ئۊجەلانی و چارەسەری سیاسی پەی کێشەو کوردی".
بەیاننامەو پەژاکی پێسنەن:
سەرەتا ویس و پەنجەمین ساڵڕۊو گێرتەی ڕابەر ئاپۊی شەرمەزار کەرمۍ و هاموەخت ئا دەوڵەت و لایەنا، کە چی کۊمپلۊیەنە بەشدارییشاکەرڎەن نەعلەت و ڕسوا کەرمۍ.
بێگومان پانزەو شوباتوو ساڵەو ١٩٩٩ یۊن جە خاڵە سیاوەکاو سەدەو ویسەمی، کە دژوو گەلەکەیما و تەڤگەری ئازادیوازیەکەیش وەش بی، کە ئینەیچە گەلوو کوردی پێسە ڕوۍ سیاوی مشناسۊش.
پێسە مزانیۊ سەرەکیتەرین ئامانجوو ئی پلانگێڵنییە میاندەوڵەتییە سەروو ڕابەریما، ماڕای ئیرادەو نەتەوەکەیمانە پەی یاوای بە حەز و مافەکاش و هەمان وەختەنە پەی تەسلیمورگێرتەی نەتەوەکاما وەش بی. بە ماناێوە تەرە جە کەسایەتیی ڕابەر ئاپۊینە نکۊڵی، قڕکەرڎەی و دلێنەبەرڎەی سیاسیی گەلوو کوردی بۍ جە ئاستی جیهانی و هەرێمیینە.
ڕابەر ئاپۊ بە هەڵوێست و ورسونیشتش جە گێرتەیخانەو ئیمراڵینە و وەڵێوستەی فەلسەفە وئەرەمەنەی وێش و دەسوەڵیوستەی پە ئاشتی و برایەتیی بەینوو گەلاو هەرێمەکەی تاواش ئی پیلانگێڵنییە، کە ڕووبەڕووش کریابێوە پووچەڵ و بێکاریگەر کەرۊ. هەرپاسە خاوەندارێتیی گەورەو گەلوو کوردی جە ڕابەرەکەیش گردوو بەشەکاو کورڎسانی و بەروو وەڵاتیچەنە و بە هەڵوێستی شۊڕشگێڵنانەو وێش، جوابوو ئی سیاسەتە چەپەڵەیشا دژوو ڕابەرەکەیشا داوە.
ڕابەر ئاپۊ جە پێواژۊو ئیمراڵینە بە ئاواکەرڎەی سیستمێوە تازەی و پێشکەشکەرڎەی مانیفێستوو شارستانیەتی دیمۊکراتیکی، نەک تەنیا چوارچوەی ئیمراڵیش ماڕا، بەڵکوم ڕێبازوو ئازادی و کەرامەتی ئینسانییش پێشکەشوو ئینسانیەتی کەرد.
پێسە جمیەری ئازادیوازوو وەرکەوتوو کورڎسانی بە گردوو هێز و تواناو وێماوە سۊز و پەیمانوو وێما پەی ئارڎەیدیی داواو گردوو گەشمەرڎاو گەلەکەیما و ئازادیوازا سەروو بنەماو هزری و ئەرەمەنەی ڕابەر ئاپۊی کۊشیایما وەرفراوانتەر و قەوەتتەر کەرمۍ و هەوڵداێوە فرە پەی ئاواکەرڎەی شۊڕشوووەکەوتوو کورڎسانی، جوابێوە گونجیان پەی گەشمەرڎا و گەلەکەیما و ئازادیی ڕابەر ئاپۊی.
چی ڕوەنە سۊز و پەیمانەو وێما بە بەرزکەرڎەی کۊشیای ئازادی و هەرپاسە لکەدای بییەی و حەزکەرڎەی وێما پەی ڕابەر ئاپۊی ئەوەخوای کەرمێوە.
ئاخرۊ و چی ڕوەنە، داوا جە گردوو گەلەکەیمان وەرکەوتوو کورڎسانینە کەرمۍ، کە بە چالاکیی نۊعاونۊع و بە دروشموو "بە ئازادی ڕابەر ئاپۊی، جە ئازادی و کەرامەتوو وێما خاوەندارێتی کەرڎێ" جارێوە تەر هەڵوێستوو وێشا نیشانە بدا و وەراوەروو دوژمناو گەلەکەیمانە بێدەنگۍ نەبا. ئینجا هەمان وەختیچەنە داوا جە گردوو جواناو وەرکەوتوو کورڎسانی کەرمۍ، کە بە بەشداربییەی پەی دلۍ ڕیزەکاو کۊشیای ئازادیی، بەشداریی قەڵەمبازیێوە تازەی وەرکەوتوو کورڎسانینە کەرا.
