فەرماندۍ یەپەژەی جە ئەیالەتو هەجینی، ئاخین قامیشلۆ ئاماژەش پانەیە کەرد کە حکومەتو شامی و دەوڵەتو تورکی ئینۍ پەشتەو هرووژمەکا سەرو دێرەزوری و واتش: "بیەو یەپەژەی جە هەرێمەکەنە بېیەن بە یاگۍ متمانە و باوەڕی ژەنا."
فەرماندۍ یەپەژەی جە ئەیالەتو هەجین و کانتۆنو دێرەزوری، ئاخین قامیشلۆ جە بارەو هرووزمەکا هێزەکاو حکومەتو شامی و گروپوو دیفاع وەتەنی کە ٧و ئابی کریا سەرو دێرەزوری سەبارەت پا هرووژما پەی ئاژانسیما قسێش کەردۍ و هۊرسەنگنایش پەی ناڕەزایەتییەکا کەرد.
جە سەرەتاو قسەکاشەنە ئاخینە ئاماژەش پانەیە کەرد جە ساڵەو ٢٠١٤ینە هرووژمۍ فرە قورسۍ دژوو دێرەزوری کریۍ و واتش: " ساڵەو ٢٠١٤ی دژوو شێتاتی کۆمکوژی کریا، چا کاتەنە قەسەدە دەسوەردایشکەرد و گورزێوە گۆرێش ۋنەو دوژمنی دا. حەرپاسە باغۆزەنە چەتەکۍ چا بنەشا وستێبۍ. پۊکەی قەسەدە چا گورزەی دماینەو ۋێش جە داعشی دا. هەر چا کاتۆ هرووژمەکۍ پەی سەرو دێرەزوری بەردەوامێنۍ."
'بە جوابدایۆیۍ پۆڵاین هرووژمەکۍ مەڕیۍ'
ئاخین جە قسەکاشەنە سەرنجش وست سەرو هرووژمەکا ٧و ئابی پێسە باسش کەردۍ: "هرووژمېوە ۋەرفراوانشا دەسپنەکەرد. وەڵۍ دەسپنەکەردەو هرووژمەکانە بە ئەرەیاۋنێوە ئاماژەشا بە دەسپنەکەردەو هرووژمەکا کەرد. جە گرڎ ڕووێوە ۋێشا پەی ئۆپراسیۆنەکەی ئاماڎەکەردەبۍ. بەڵام هرووژمەکێشا فرە بە زووی جە لایەنو هێزەکاماوە ۋەرپەرچ دریێوە و مەڕیۍ.
جە هرووژمەکەنە جە لایەنو هێزەکاو دیمەشقیوە یانەو مەنزڵ و مەدەنی بۆردوومانکریا. بە تایبەت جە مەحاڵەو دەحلاینە چڼین مەدەنیۍ گەشمەرڎۍ و زامڎارۍ بیۍ. بەڵام سەرەڕاو گرڎوو هرووژمەکا گەل پەشتیوانیش پەی قەسەدەی بەربڕی، چونکی خەڵکو مەنتیقەکەی فرە عال جە حەقیقەتو دووژمنی یاوێنێنە، چانەی یاوێنێنە کە ئا هێزۍ تەنیا مەسڵەحەتوو ۋێشا لاوە گرنگا. ئا هرووژمۍ بەردەوامیشا بۍ، کە دەوڵەتا هەرێمی بە تایبەتی دەوڵەتو تورکی ئەرەگیری و حکومەتو شامی پەشتیشۆ بێنۍ. گرڎوو ویستو ئا هێزا پەی وەشکەردەو پشێوین جە مەنتیقەکەنە و ماڕای متمانەو گەلین بە هێزەکاو قەسەدەی. پۊکەی گرڎوو هەوڵەکاشا شکسشا ئارد و گەل باوەڕی ۋێش پەی قەسەدەی واوەی کەردۆ. تەنانەت جە بڕۍ مەحاڵێنە گەل شانبەشانو قەسەدەی چەکشا هۆرگېرت و دژوو هرووژمەکا مردێوە.
ۋەرفراوانی هرووژمەکا ئەغلەبیەت جە ئەبوو حەمام و قرانیچەنە بێنۍ، چونکی چا شۊنانە شانۍ پەنهانۍ ئا چەتا بێنۍ. پی جۆرە هرووژمەکېشا ۋەرفراوانتەرۍ کەردۍ بەڵام دیسان شکسشا ئارد. جە ئۆپراسیۆنوو هێزەکامانە چا مەنتیقانە چڼین شانۍ پەنهانۍ ئا هێزا تێکۍ دریۍ و ئەندامەکێشا گیریۍ، دڎانشا نیا پۆرە کە جە لایەنو حکومەتو شامی و دەوڵەتو تورکیوە بە ڕێکوستەی کریێنۍ و پاڵپەشتی لۆجستیشا پەی مەیسەر کریان."
'یەپەژە کرێڵو کەردەیۆ ڕاو هیوایمانە'
جە دمادمایی قسەکاشەنە ئاخینە باسش چانەیە کەرد کە ژەناو دێرەزوری یەپەژەی پېسە تاکە هیواو ۋێشا موینا و واتش: "جە هەرێمەکەنە عەقڵیەتی فیوداڵی و خێڵەکی چڼین ساڵێن وەڵا بیەنۆ، بە ئامای داعشیچ ئاژەو ژەنا خراپتەر بی. فشارێوە فرە سەرو ژەناوە بۍ. جە حەقەتینەنە دێرەزورەنە عەقڵیەتی هۆزگەرایی فرە ۋەر وەڵابۍ، پۊکەی هەمیشە ژەنی چېرو فشارینە بێنۍ و بە گولانە تەماشە کریێنۍ. بەڵام دماو ڕزگارکەردەو مەنتیقەکەی جە دەسوو داعشی، ژەنی بەرەو کۆشش و گەشە بە وێدای هەنگامەشا هۊرگېرتە. ئەرەمەرزیا و ڕێکوزیاو ۋێشا هەن. چا یۆبیەی ژەنا زەنوبیای هەن. ژەنی کۆشش مکەرا ۋێشا بەڕێکوستەی بکەرا. بیەو یەپەژەی جە مەنتیقەکەنە بیەن بە یاگۍ باوەڕی ژەنا، کاتێ یەپەژە سەردای یانەکا مکەرۆ، خێرامایشا ۋنە مکریۆ و دڵوەشی ۋێشاما پەی بەربڕا و پنەما ماچا 'یەپەژە کرێڵو کەردەیۆ ڕاو هیواو ئێمەی ژەنان' پۊکەی ژەنی بەشدارۍ دلۍ ڕیزەکاو یەپەژەی مبا. هەڵوێسی قەوەتو یەپەژەی هیوا بەخشو ژەنان. پۊکەی دڵنییاشا مکەرمېوە پېسە یەپەژەی و قەسەدەی گرڎ کاتێ پەشتی گەلوو دێرەزوریوە بیمۍ. جە گرڎ هرووژمۍ پارێزنمێشا. پېسە یەپەژەی چنی دژو زهنیەتی تاریکپەرسی داعشی گژیایمۍ و ماڕێما، هەرپاسەیچ جە دژو زهنیەتو پەشتەو هرووژمەکا ئیساتێچ گژیەیمۍ و بەردەوامۍ بیمۍ تا ڕزگارکەردەی ژەنا جە دەسوو زوڵمی و ستەمی."
