وێرەگاو ئارۆی چالاکا و ڕۆنامەنوویسا سەیسایەقی جە شۆنەماو گەشمەرڎەکەردەی ڕۆنامەنوویسا گوڵستان تارۍ و هێرۆ بەهادینینە کوۍ بیێوە، تاجە ولینەشا جە شۊنەماو گەشمەرڎەکەردەیشانە نیارە و کۆنگرێوە ڕۆنامەوانیشا سازکەرڎ. 

بە نامۍ چالاکا و ڕۆنامەنوویساوە، عەدنان قادر هرووژمەکەش شەرمەزار کەرد و سەرەوەشیش پەی کەسوکار و هەمڕەیا گەشمەرڎا گوڵستان تارۍ و هێرۆ بەهادین بەربڕی، واتش: چێگۆ پەیامو ۋێچما ئاڕاسەو ئا لایەنا مکەرمۍ، كە تاك بە تاكو كورڎی ئیساتۍ قەڵاچۆ مکریۆ و دلێنەمشۆ و بێدەنگێنۍ، ئانە ڕەوایەتیداین بە توركی فاشیستی پەی ئانەی زیاتەر جوانەکاما دلێنەبەرۆ و گەشمەرڎێشا بكەرا".

عەدنان قادر هرووژمەکەش بە ترسنۆکانە ئشناسا و واتش: "بەڵام ئیراڎەو گەلی فرە چانەی قەوەتتەرا، پەیامما پەی ڕژێمو توركیای هەن، نمەتاوۆ وەرمی گڵیاو ۋێش جە کورڎەسانەنە جابەجێ بکەرۆ، چونكی باوباپیرایچما نەتاواشا ئا كارەیە بكەرا، پۊکەی دڵنیۍ با هەمان شەقەو زەمانەیشا وەرگنۆ، ئا خیاڵەشا زیڼەبەچاڵ مبۆ".

دماتەر ڕەخنەش جە هەڵوێسو حزبە باڵادەس و ئۆزپۆزسیۆنەکا گێرت و واتش: "چا ڕوۆ نەتاوانشا بە تەنیا بە بەیاننامێوەیچ ئیدانەو ئا كارە تیرۆریستییەو سەرو ڕۆڵا نەتەوەكایما بكەرا، ئانە نیشانۍ كلكایەتیی و جاشایەتیی عەقڵی خەسیاو ئاڎیشان، نمەتاوا جە ئاستو ۋەرپرسیاری ئێش و گەلەکەیمانە با، داواشا ۋنە مکەرمۍ بلاوە ۋێشارە هەڵوێس هۆرگێرا، هیچ نەبۆ بلانە بەرەو گەلی هامخەمۍ كارەساتەكا گەلەكەیشا با".