چالاکی ئێشکگیری سەرو سنوورو قامیشلۆی و ناوچەو نسێبینی و مێردینی کە دژو هرووژمەکا دۆڵەتو تورکی و چەتەکاو سوپاو نەتەوەیی سوریای (NSA) پەی سەرو سەرنیشتی و ۋەرکۊتوو سوریای دەسش پنە کەرڎەن، ٤ ڕوێن بەردەواما. شاندو ئێلحی پەشتگیری چالاکییەکەیشا کەرد. گەل سەرسەعبۆن جە مېڎانو چالاکییەکەینە کوۍ بیێوە، بە درووشم و گۆرانیۍ سڵامشا جە ئیدارەو ۋێڕاوەبەری سەرنیشتی و ۋەرکۊتوو سوریای کەرد و ناڕەزایشا بەربڕی ۋەرا ۋەر بە هرووژمەکا. سەڎان کەسۍ ئاماڎۍ چالاکییەکەی بێنۍ، هێلەکو "بژیۋۆ مڎرامانوو ۋەرنیشتی"شا پۆشا و ئێشکگیریشا دەس پنە کەرد.

پەرلەمانتاراو دەم پارتی کاموران تانهان و جۆرج ئاسڵان پەشتگیری چالاکییەکەیشا کەرد.

"چالاکییەکۍ سەرەمڕە بەردەوامۍ با"

هامسەرۆکو دەم پارتی ئێلح سۆنگول کۆرکماز واتش: "جەنگ چنۍ بەردەوام بۆ، تا دمایی پەشتگیری جە گەلو ۋەرنیشتی مکەرمۍ. تا دمایئامای پی جەنگە قیزەونەیە، چالاکییەکێما سەرەمڕە بەردەوامێنۍ. ۋەرنیشت شکۆو ئێمەن. شکۆو ۋێما پارێزنمۍ".

پەنەوازا دەمودەس گۆشەگیری هۆرگیریۆنە"

پەرلەمانتارو دەم پارتی کاموران تانهان سەرنجش وست سەرو دیدارو ڕابەر ئاپۆی، قسەکێ ڕابەر ئاپۆیش ویرئاردیمێ کە واتش "گۆشەگیری بەردەواما، ئەر هەلومەرج ڕەخسیۆنە، هێزو تیۆری و پراکتیکی ئانەیم هەن کە ئی پرۆسەیە جە زەمینەو جەنگی و تنوتیژییۆ فارو پەی زەمینەو یاسایی و سیاسی". ئاماژەش پانەیە کەرد هەرچنە ٥٥ ڕوێ سەرو دیدارەکەیرە ویەردەن بەڵام حکومەت حیچ هەنگامێوەش نەنیان، نە گۆشەگیری و نە جەنگ دمایشا نامان، واتش: " جە دماین دیدارەنە چنی بەڕێز عەبدوڵا ئۆجالانی هەرپاسە ئەرەیاوناش کە هێزو مڏرناو جەنگیش هەن. پێسە مزانیۆ ئارۆ دۆڵەتە ئیمپریالیستەکێ گەرەکشانە وەرنیشتی گۆشەگیر کەرا. ئارێ گەرەکشانە ئا خاکەی کە خەڵک بە ئارامی چنەش مژیوۆ، فاڕانە پەی هەرێمو جەنگی. ئێمە هەمیشە دەسو ئاشتی درێژ مکەرمێ ئەر ئارێ جددی با، موخاتەب ڕۆشنا. ئێمە مزانمێ ئا کەسەی دمای بە جەنگی مارۆنە بەڕێز عەبدوڵا ئۆجالانا. پەی ئانەیچ پەنەوازا دەمودەس گۆشەگیری هۆرگیریۆنە. مشۆم هەلومەرجێ دروس کریۆنە پەی ئانەی ئاشتی بێنە ئاراوە".

ئەرەیاوناکە بە بەرزکەردەیۆ درووشـمی و هەلهەلە دمایش پنەئاما. چالاکییەکە سەعبێ بەردەوام بۆنە.