دەسوەڵۍ وستەو کەمپینوو 'ئازاڎیی پەی عەبدوڵا ئۆجالانی' جە چوار چېوەو هەرمانەکاشەنە، دژوو گۆشەگیری ئیمراڵی داواش جە ڕۆشنۋیر، خەباتکەر، چالاکوان، هونەرمەنڎی و سەندیکاکا...هتد کەرد جە بەینوو ڕووانوو ١٥-٢٢ۍ حوزەیرانینە جە چالاکی 'گفتووگۊی چنی ئۆجالان'ی و وەڵاکەردەیۆ فکروو عەبدوڵا ئۆجالانینە بەشدارۍ با.

چی ڕوۆ دەسوەڵێوستەکەی جە ئەرەیاۋنێونە ئاماژە بە گۆشەگیری ئیمراڵی مکەرۆ و ماچۆ: "عەبدولا ئۆجالان ئانە زیاتەر جە ٢٥ساڵېن ئینا چېروو گۆشەگیریێوە سەختینە. پۊکەی ئینسان مەتاوۆ باوەڕ بە کۆمیتەو ڕاگیری جە ئەشکەنجەو (سی پی تی)، ئەنجومەنوو ئەورپای و دادگاو مافەکا مرۆڤوو ئەوروپای نەکەرۆ."

هەر جە ئەرەیاۋناکەینە باس جە نویستەکا ڕابەروو گەلوو کوردی عەبدوڵا ئۆجالانی مکەرۆ بە ئیلهام بەخش نامېشا مارۆ و ماچۆ: "نویستەیەکۍ عەبدوڵا ئۆجالانی ئیلهام مڎا بە ڕۆشنۋیری، ئازاڎیوازی، خەباتکەری، چالاکوانی، هونەرمەنڎی، سەندیکاکاری، تەڤگەری جڤاکی، سیاسەتمەداری و گرڎوو گلېرگەی. عەبدوڵا ئۆجالان پېسە ڕابەرێوەکوردی سوریانە بەرکۊت و دماو ساڵانێوە پېسە سەرمەشقوو گلېرگێوە دیموکراتیکی ئازاڎیی فرە نەتەوەی، فرە باوەڕداری گېڵاوە. جە سەرنیشتوو ۋەرکەوتوو سوریایچ ڕاوەبەری خۆسەر سەروو فکر و بنەماکا عەبدوڵا ئۆجالانی ئەرەمەرزیا. جە ژوری تاکەکەسی زینڎانینە فەلسەفەو 'ژەنی ژیۋای ئازاڎیی'ش فۆرمەلەکەرد و جە سەڎەو ٢١ینە بیە بە دروشموو ژەنا کۊششکاری.