ئەرەنیشتاو هەرێموو جەزیرەی دژوو هجوومەکاو دەوڵەتی ئەرەگیروو تورکی پەی پارێزنای ناوەندە ستراتیژی و خزمەتگوزارییەکا مدرامان کەرا. وەرڎەموو ئا ناوەندانە چندین دەگا و شار و شارۊچکەو کانتۊنەکەینە بیێنۍ قەڵغانی زینڎە تا وێستگەکاو سۊتەمەنی هجوومەکانە پارێزییا. چالاکییەکە دێرک و تەل کۊچەر و گەرکی لەگینە و تربەسپینە بەرڎەوام بی.  

ئەنداموو پەیەدەو دێرکی، محەمەد سەعید ئەرەیاوناش، پەی شکسئارڎەی  بە ئامانجوو ئەرەگیرا مدرامان و یۊگێرتەی پەنەوازا.

مەجلیسوو مەنتێقەو تەل کۊچەری بە ئەرەیاوناێوە داواش جە گەلاو جیهانی کەرڎە پەشتگیری جە پڕۊژەو نەتەوەی دیموکراتیک و ئیدارەو وێڕاوەبەری کەرا.

هامسەرۊکوو مەجلیسوو مەنتێقەو گەرکی لەگی، زوڵەف بەدرۊ، واتش: "ئێمە ساعیبۍ ئی خاکەینمۍ و ئامادێنمۍ وێما فیداو ئی خاکەیە کەرمێ".

هامسەرۊکوو مەجلیسوو بنەیانەو گەشمەردا گەرکی لەگی، محەمەد جەمیل، واتش: " پەی تەرسنای ئەرەنیشتا، هجووم کەرا سەروو ناوەندە ستراتیژییەکا. مشۊم هۊشیارۍ بیمێ. حەرچند هجووم و سیاسەتەکاو جەنگی تایبەتی گرانتەرۍ با، مدرامانما بەرڎەواما".

ئەندامەو ئیدارەو مەجلیسوو بنەیانەو  گەشمەرداو نمەنتێقەو تربەسپی، عەتیە حەسەنە، واتش: "دەوڵەتوو تورکی گەرەکشا ئا دەسکەوتا کەرۊ ئامانج، کە بە ونەو گەشمەردا دەس ئامان و ئیرادەما ماڕۊ، دماو ئا جەنگە تایبەتەیە دژوو ئێمە شکسش ئارد".