تەڤگەروو ژەناو کوردوو فەڕەنسای (تەژەکە-فە) و یۆبییەی ژەنە سۆسیالیستا (سەکەبە) بە ئامانجوو پەشتگیری جە مانگێرتەی جە واردەی زیندانییا، کە ٩٠ ڕوێن پەی ئازادیی جەستەیی ڕابەروو گەلوو کوردی عەبدوڵا ئۆجالانی  زیندانەکانە بەردەواما، ناوەندوو جڤاکی دیموکراتیکوو کوردینە بۆردیۆنە ٣ ڕوێ چالاکیی مانگێرتەی جە واردەیشا دەس پەنە کەرد.

چالاکێ بە مۆراڵێوە بەرزۆ درێژە بە چالاکییەکەیشا مدا، نوێنەراو ناوەندوو چاندوو عەلەوییەکا، چندین ئەرەمەرزیێ سۆسیالیستیێ فەڕەنسای و سەندیکاکاو کرێکارا و گەلوو کوردستانی سەردایشا کەردێ.  

چالاکێ ورپڕێ و گۆرانیێشا واتێ، دمایی چندین وەڵێکریێوێشا دەربارەو چالاکییەکەیشا بەش کەردێ.

چالاکێ نامەشا کیانا پەی ڕابەروو گەلوو کوردی عەبدوڵا ئۆجالانی، کە ٢٥ ساڵێن چێرووئینا  سیستموو گۆشەگیری و ئەشکەنجەی و قڕکەردەینە، هەرپاسە ئا زیندانییە سیاسییێ، کە ٣ مانگێن مدرامان کەرا.

چالاکێ ئاماژەشا  کەرد  پەی ماڕای گۆشەگیری سەروو ڕابەروو گەلوو کوردی عەبدوڵا ئۆجالانی و مسۆگەرکەردەی ئازادیی جەستەیی و پەشتگیریی جە زیندانییە مدرامانکەرەکا، چالاکیی مانگێرتەی جە واردەیشا دەس پەنە کەردەن و واتشا: "هومێدەوارێنمێ گەلی وەڵاتپارێزن و دۆسەکێما ئەورووپانە خاوەنداریی جە چالاکییەکەی کەرا".