پەرلەمانتارەو دێرسیم و دەم پارتی ئایتەن کۆردووە کە بەشدارەنە جە 'ڕاپیمای گۊرەو ئازاڎیینە' واتش: "ئی ڕاپیمایە پۍ ئازاڎیی فیزیکی بەڕێز ئۆجالانی و ئازاڎیی ۋێمانە، ئی کۊشیایما بەردەوام بۆ. هەروەختۍ گۆشەگیری دمایش ئاما ئا وەختە چارەسەری دیموکراتیک دەسپنەکەرۆ".
یووە جە بەشدارا 'ڕاپیمای گۊرەو ئازاڎیی' ئایتەن کۆردووە ئاماژەش پانەی دا "پۍ مژاروو مسۆگەرکەردەی ئازاڎیی جەستەیی بەڕێز ئۆجالانی، قەرارداریێوە گۊرە هەن. ئی ڕاپیمایچە بەشێوەن چا قەرارداریە".
پەڕلەمانتارە ئایتەن کۆردووە خی بارۆ پۍ ئاژانسوو هەواڵوو فورات (ANF)ی قسێش کەردۍ و واتش: "ملمۍ هەر یاگێوە بە جۆش و خرۆشۆ پێشوازی جە ڕاپیماکەی کریۆ، بەڕاسی ئینە ئیراڎەما بەقوەتتەر کەرۆ. پېسە مزانمۍ پۍ مژاروو ئازاڎیی جەسڎەیی قەرارداری گۊرە هەن. زینڎانیا سیاسی مانیشا جە واردەی گرتێنە، ئێشکگیری دادپەرەوەری بە سەرمەشقایەتی کەسوو کاروو زینڎانیا ملۊڕاوە. ڕاپیمای گۊرەو ئازاڎییچ حەر ئینا چوارچێوەو ئا مژارەینە".
'بە ڕاپیمایما ئازاڎیی مسۆگەر کەرمۍ'
کۆردووە ئاماژەش پانەی دا کە مشۊم مژاروو ئەرەنیشتەی و گفتوگۆی، سەرجە نۆ دەسپنەکەرۆوە و واتش: "عال مزانمۍ کە متاومۍ بە گفتوگۆکەردەی، کێشەکا چارەسەرکەرمۍ. هەم پۍ ئازاڎیی کوردسانی و تورکیای، هەم پۍ ئازاڎیی ۋێما و هەم پۍ ئازاڎیی جەسڎەیی بەڕێز ئۆجالانی بەردەوامۍ بیمۍ جە ڕاپیمای و بێگومان سەرۍ گنمۍ و سەرکۊتەی بەدەس مارمۍ. قەناعەتما پانەی هەن و بە هێز و ئیراڎێوە گۊرۆ کۊشیایمۍ".
