چی ئەڎا و ژەنی جە هەورامانەنە پیرۆزێنێ یاگۍ ڕێزیەنێ؟ چونکە ئەڎا واتێوە ئەویٛستاییەنە بەماناو (فریشتەو پاداشکەردەی، خواڵەو پاداشتی، یەزدانەو پاداشتکەردەی) مەیۆنە و هەر ئانە کە ئا پیرۆزی و ڕێزەشە بەخشان بە ئەڎێ و ژەنێ هەورامیێ.
چی هەورامانەنە و دلێ هەورامیەکانە ئانڎە گرنگی بە ئەڎێ بەتایبەتی و ژنی بەگردی مڎریۆنە؟ هۆکارەکێ پەشتو ئانەی چێشێنێ؟ چی پیێ هەورامیێ وەرانوەرە بەژەنێ تونڎوتیژێ نییەنێ؟ ئەی چی ژەنی هۆرامییە ئانڎە ئازادەنە؟ ئایا ڕیشەی تاریخی و میتۆلۆژیش و فەرهەنیش هەن؟ وەڵامێ سەرجەم ئی پرسیارا ڕەنگەن جە ئی کوڵەباسەنە هۆربگێرمێوە کە دکتۆر ناجح گوڵپی نویستەن.
ئەڎا Eďa
ئەڎا، یام ئەدا واتێ ئەویٛستاییەنە بەماناو (فریشتەو پاداش کەردەی، خواڵەو پاداشتی، یەزدانو پاداشت کەردەی). ئی واتیٛ زوانو ئەویٛستاینە ماناش فرە گەوریٛنە، یانی خواڵەگیانێ کە هەمیشە پاداشتو مەردمیش کەردەن، یەزدانیٛ کە پاداشتو خەڵکیش کەردەن. ئی نامیٛ ئینڎە گەوریٛ و پیروٙزە بییٛنە کە هەڵای لاو هەورامیەکانوە بەکار مەیوٙ پەی نامیٛ ئەڎێ، ئەڎای، ئەڎا هەمیشە یاگیٛش گەوریٛنە، هەمیشە مەبەخشوٙنە، پاداشت مەکەروٙنە، دادپەروەرەنە، بەخشندیٛنە، ئینە ئانەی سەلەمنوٙ هەکە ئەڎا، ژەنی سەردەمانی کوٙنەنە پلە و پاییٛش فرە گەوریٛ بییٛنە، کە تا ئیسەیچ ڕەنگەش مەنیٛنە دلیٛ هەورامانینە، هەکە ژەنی پایێ تایبەش هەن دلیٛمانە، هەڵای پایەش نزم نەبیەنوە جە پیای، ئەگەر شان بەشانش نەبوٙنە کەمتەر نیەن.
سەرچەمە: فەرهەنگو ئارایان واچی. د. هەورامانی
د. ناجح گوڵپی
