گلێرۆبییەی و چەمپنەکەوتەو دەبەپەی و دەم پارتی بە درووشمو 'چەمپنەکەوتەی پەی ئازادی و ئاشتی کۆمەڵایەتی' بە بێ مردای ئەنجام دریۆنە.

جە مێردینەنە گلێرۆبییە چنی گەلوو هەرێمەکەی ئەنجامدریا، نوێنەرێ پارتە سیاسییەکا و ڕێکوزیاکا گلێرگەو مەدەنی بەشداری چەمپنەکەوتەکەی بیێ.

جە گلێرۆبییەکەینە هامسەرۆکەو گرڏی دەبەپەی چیدەم کلچگون ئوچارە قسێش کەردێ و ئاماژەش پانەیەدا دەرنجام پەی چارەسەرکەردەو پرسو کوردی متاوۆنە جە گرڏ یاگێنە خەباتی وەرفراون ئەنجام دریۆنە، ئینە چێوێ نییا تەنیا جە پەڕلەمانەنە مشتومڕش سەر کریۆنە و چنین ئەزموونێ چارەسەریێ هامشێوە جە وڵاتا تەری بیێنێ.

جە بەردەوامینە ئوچارە سەرنجش وست سەرو ڕووەداوەکا سووریای و دەستنیشانشکەرد جە سەرنیشتوو و وەرکەوتوو سووریای مۆدێلێوە نمونەی وەشکریان، ئوچارە سەرنجش وست سەرو چەمپنەکەوتەو دیبلۆماسیانەو دۆڵەتو تورکی چنی سەرۆکو هەتەشەی، جەختش چانەیە کەردۆ مشۆم تورکیا پرسو کوردی وینۆنە جە سووریانە چنی مەزڵوم عەبدی و فەرماندەو قەسەدەی گلێر بۆوە و هیچ ئاستەنگیێ نییا وەردەمو ئینەینەو واتش: "پەنەوازا بە شێوێ بنەڕەتی قسێ سەرو پرسو کوردی کریۆنە و ئینەیچ بە وەرپرسیارەتی پارتە سیاسییەکا دلێ پەڕلەمانی. ئی قۆناغە قۆناغێوە چا جۆرە نییا تەنیا پەی دەسەڵاتداری جیامەنۆنە."

جە دماینە چیدەم کلچگون ئوچارە ئاماژەش پانەیەدا جە کوردەسانەنە دەسەڵاتداری سیاسەتەکێ جەنگی تایبەتی، ڕژێمو گۆشەگیری و سەپناو قەیومی وەرچەرخنای پەی سیاسەتو بنەرەتی وێش و دەسنیشانش کەرد دۆڵەت ئینا دۆخێنە ناچارا 'ئیمراڵی' پێسەو نامونیشانو چارەسەری هورگێرۆنە و واتش: "سەدێوەن تورکیا پەنەوازیش پی چارەسەرییەینە. ئەی چی ئێژا ئۆجالان ماوەو ٢٦ ساڵان ئینا زینانەنە و دەسەڵاتداری گۆش و چەمێش جە پرسو چارەسەری وزتەنەرە؟ چی ئارۆ گرڏو هیوا و چمەڕایەکێ ئینێ ئیمراڵینە؟ وەرو ئانەی پرسو کوردی پرسێوە تاریخیا و کاریگەری ئەساسیش جە ئایندەو ئی وڵاتەیە هەن. بەڵێ مشۆم گرڏو ئانیشا ئایندێوە ڕۆشنشا پەی حپئی وڵاتەیە گەرەکا گوفتار و ڕەفتارشا بۆنە و چنی چارەسەری ئاشتیانەی بانە."

ئەرزڕۆم

جە چوارچێوەو چەمپنەکەوتەو گەلی جە ئەرزڕۆم ئەندامێ دەم پارتی چنی گەلوو هەرێمەکەی گلێرێ بیێ.

یاگەگیرو هامسەرۆکا گرڏی دەم پارتی مەحفوز گولەریوز قسێش کەردێ و دەستنیشانش کەرد بە مڏرامانو گەلوو کوردی گۆشەگیری ئیمراڵی ئینا ڕاوە پەی قۆناغێوە تەر و مەیل پەی دەسپنەکەردەو پرۆسەو ئاشتی نیشانەدریان و واتش: "نمەتاومێ بی قۆناغەیە واچمێنە پرۆسەو ئاشتی یان ئەرەنیشتەی، بەڵام متاومێنە واچمێنە پرۆسێوە تازەن. مەڵامەتو سەرەکی ئی پرۆسەیە مڏرامنو گاریگەری گەلەکەیمانە. جە لێوەتەرۆ سەرجەنۆ دیزاینکەردەیۆ جە وەرکەوتوو دلێڕاسەینە ئینا ئارانە."