دمانیمەڕۊوهیزی ١٤-٣-٢٠٢٣ دلۍ کارگەی کولتووریی شاروو سلێمانینە، سی ڕێکوزیۍ گلێرگەی مەدەنی، خەڵاتێوەشا بە نامۍ "خەڵاتوو یەکسانی"یوە ئەرەیاونا و پەی یووەم جاریچ، خەڵاتی نامەبریا بەخشیا بە "د. چۊمان هەردی'یۍ.

حەر یۊ جە "هانا شوانۍ، جوان ڕەحیمۍ، بەهار مونزیرۍ، سەیوان ڕۊستەم"ی، بە نوێنەرایەتیی ڕیکوزیایەکاو ژەنا و گلێرگەی مەدەنی، یووەمین خەڵاتوو یەکسانییشا بەخشا بە خاتوو "چۊمانێ" جە پاو حەول و پەشتیوانییەکاش جە مەجالەو جێندەری و مافوو ژەنۍ و ویری یەکسانینە.

ڕێکوزاو مەراسیمەکەی ئاشکراشا کەرد، خەڵاتەکە بۊ بە نەریتێوە ساڵانە و لاو ئازاڎیوازاوە پێشکەش بە کەسێوە کریۊ، کە داکۊکیکار بۊ جە وەڵابییەیۊ یەکسانیوازی دلۍ گلێرگەینە.

* "دکتۊر چۊمان هەردی"یە شاعیرە، چیرۊکنویسە، ورگێڵنەنە، کۊڵیارە و مامۊستاو زانکۊینە.

* جە بنەیانێوە ئەدەبدۊسی جە سلێمانیینە ساڵەو ١٩٧٤ جەئەدۍ بیێنە، کناچێ"ئەحمەد هەردی"ی شاعیری نامیەو کوردینە.

* جە ساڵەو ١٩٩٣وە لوێنە بەریتانیا چا دەسش کەرڎەن بە وانای.

* زانکۊی ئۊکسفۊردینە کارناسیی دەروونئشناسییش تەمامنان و دماتەر کۊلێجوو لەندەنینە ماستەروو فەلسەفەیش ور گێرتەن.

* زانکۊو کێنت-ینە دکتۊراش وانان نامەو دکتۊراکەیش تایبەت کەرڎەن بە " کاریگەریی کۊچی ناچاری جە ژیوای ژەناو کوردی جە عێراق و ئێراننە.

* جە ساڵەو ٢٠٠٥دا پۊست‌دکتۊراش وانان جە زانکۊو ئۊپسالاینە جە سوید و کۊڵیایۊێش نویستەن بە نامۍ "باری دەروونیی بێوەژەناو قوربانییاو کۊکوشی".

* بە داکۊکیکارۍ سەرەسەختەو مافەکاو ژەنا و جێندەری و ویری یەکسانی مشناسیۊ پانیشتوو کورسانینە.

س.ز