کوردسان و تورکیانە جە هۊرچنیە دلېینەییەکا ٣١و ئادارینە رژێموو فاشیستی ئاکەپە-مەهەپەی گورزێوە گەورېش ۋەرکەوتە و شکسش ئارد، بەتایبەتی کوردسانەنە 'سیاسەتوو قەیوم'ی کە ٨ ساڵ بۍ ئیراڎەو گەلوو کوردیش زەوت کەردەبۍ، هەر بە ئیراڎەو گەلوو کوردی مەڕیا. ئەکادیمیس د. عەیسمەت کۆناک جە بارەو ئا مژارەیۆ قسېش پەی کەردیمۍ.

د. عیسمەت کۆناک ئانەش وست ڕووە، کە هۊرچنیەو ٣١و ئادارینە دلۍ گەلینە بیەن بە مایۍ دڵوەشی و گورزێوە قورسە بیېنە جە رژێمی و دەسەڵاتی.

د. عیسمەت ئاماژەش بە فێڵ و ساختەکارییەکا دەسەڵاتی جە شارەکا کوردسانینە کەرد و واتش، "بە ئاردەی دەنگدەرا هاوردەی نەتاواشا بیاوا ئەنجام. شڕنەخەنە والی، قایمقام، ڕاوەەبەروو ئاسایشی گرڎشا پېوەرە هەرمانە پەی ئاکەپەی کەرېنۍ، ئینەیچ جە وەختێنە ئاڎیۍ کارمەندۍ دەوڵەتینۍ و باج جە خەڵکی مسانا و پا باجەی جە کورداش مسانا سەروو خاکوو کورداوە پرووپاگەندە پەی پارتێوە مکەرا کە ئیراڎەو کورداش زەوت کەردەن. چی هۊرچنیەینە پی جۆرە شارەوانیەکۍ شرنەخی و بەدلیسی دەسشا سەرەرە گیریا، بەڵام بە گرڎیی هەم جە کوردسان و هەمیچ جە تورکیانە دەسەڵات شکسش ئاورد. مەتاوا ئا ئەنجامەی گەرەکشانە بەدەسش بارا".

جە بەشێوە تەروو قسەکاشەنە د. عیسمەت کۆناک ئاماژەش پانەی کەرد، کە "دەسەڵاتوو ئاکەپە-مەهەپەی حەجگیز جە ئەنجاموو هۊرچنیەی رازی نییا و گەرەکشنیا قبوڵش کەرۆ و ئینا حۊڵوو ئانەینە پەردەپۆشش بکەرۆ. پەی ئانەیچ ۋېشا پەی دامۍ تازۍ ئاماڎە مکەرا. جە ئاژەو ئیساتێنە باری ئابووری ئاڎیشا خاس نییا و مەتاوا جە ڕاو ئابووریوە مرۆڤەکا قایل بکەرا. بەمەڵامەتوو ئانەیۆ مزانا خەڵک جە سیستمێوە نایەکسانی ناڕازیێنۍ، پۊکاتی زیاتەر پەنا پەی پشېوی بەرا. ئانەی بە تەنیا ڕاو رزگاربیەو ۋێش منیۊرە. جەماوەری ۋەرا ۋەر بە یۊترینی مڎۆ جەنگ، پەرە بە دوژمنکاری مڎۆ. واتە پېسە دماو هۊرچنیەکەو ساڵەو ٢٠١٥ ی متاوۆ پەنا پەی پشێوی نیایۆ بەرۆ. ئاشکران کە نزیکتەرین ئەنجام و ۋنەکۊتەیۆ ئانەیچ جەنگا. ئاڎۍ ئەجۆشانە جەنگ رزگارکەر و فریادڕەسشانە."

د. عیسمەت کۆناک ئاماژەش پانەیچکەرد کە رژێموو ئەردۆغانی چی مژارەنە پوتینی بە نمونەو ۋێش منیۊرە. "پېسە مزانیۆ پوتین جە ئوکرانیانە دەسش بە جەنگی کەرد. وەڵۍ دەسپنەکەردەو جەنگەکەینە جە دلېینەو وڵاتەکەینە بە رێژەو سەڎەنە ٧٧ ی پەشتیوانیش ۋنە کریۍ. جە هۊرچنیەو ئی دماییەینە رێژەو دەنگەکاش یاوا سەڎەنە ٨٧. بەرهەڵستکارەکێش بە تەمامی سەروو ڕاو ۋێشۆ بێکاریگەر کەردۍ. ئەردۆغانیچ گەرەکشا رێک هەمان شێواز بەکاربارۆ. بەڵام رووسیا و تورکیا دووۍ وڵاتۍ فرە جیاوازېنۍ. پەی ئانەی ئەردۆغان گەرەکش بۆ جە پانیشتوو کوردسانینە دەس بە جەنگێوە بکەرۆ پەنەوازش بە سەرچەمە و ئابووریېوە بەقوەتی هەن. ئیساتۍ چانەی بۍ بەشا. بەڵام رووسیا ساحیبوو بودجېوە گەورەی و فرەین. ساحیبوو سەرچەمۍ دۊڵەمەنڎییا. نەوتە، گاز و واردەش هەن و جەهانیچش ۋێشۆ بەستەنۆ و پەنەوازی فرەو وڵاتایچ حاسڵ مکەرۆ. پۊکاتی متاوۆ پەی ماوەو چنڎین ساڵا بەردەوام بۆ چا جەنگەیە. بەڵام تورکیا ئا هێزشە نییا کە ئانەی بکەرۆ. حەرپۊکەی جەنگ هیچ ئەنجامێوە شۊنەو ۋێشەرە نمارۆ پەی ئاڎیشا. واتە سەرەش مېشۊ و وزۆش ۋەروو گیلۆتین پەی ئانەی سەر ئێشەکەش خاس بۆ. دەسپنەکەردەو جەنگی دژوو کوردا، بۆ بە سەرەتاو ۋێکوشتەی ئەردۆغانی. بەڵام مشۊم هێز و لایەنە ۋەرهەڵسکارەکۍ بە تایبەتی جە ۋەرا ۋەروو ئاژاوەگێڵنییەکانە وریۍ با و ڕاو جای پەنەواز بگێرانە ۋەر."