هامسەرۆکاو دەم پارتی پەیامێوە مبارەکبایشا بۆنەو جەژنەو رەمەزانیوە وەڵاکەردۆ و ئەرەیاۋناشا، "ئێمە سپاسوو گەلاما مکەرمۍ کە سەرەڕاو فشار و زۆرداریچ ۋېڕاگریشا کەرد و دووۍ جەژنېشا پیرۆزۍ کەردۍ".
هامسەرۆکایەتی گرڎیی پارتوو دیموکراسی و یەکسانی گەلا (دەم پارتی) تولای هاتیمئۆغوڵاریە و تونجەر باقرخان بۆنەو جەژنەو رەمەزانیوە پەیامێوە مبارەکبایشا وەڵا کەردۆ. جە پەیامەکەنە هامسەرۆکا هیواشا واستەن کە جەژنەو رەمەزانی بۆ بە مایۍ ئاشتی.
پەیامەکەو هامسەرۆکا گرڎیی دەم پارتی پی جۆرەنە:
"جەژنەو رەمەزانی جە تەماموو جەهانی ئیسلامی پیرۆز مکەرمۍ، هیواڎارێنمۍ بۆ بە مایۍ چەسپناو دادپەروەری، ئازاڎیی، ئاشتی و خێرۍ و وەشی.
قۆناغوو هۊرچنیەکا ئی دماییە بە ئێمەش نیشانەدا کە گەلاو تورکیای ئیتر ژیۋایۍ یەکسان و دادپەروەرانەشا گەرەکا، جەنگ و ملەملانۍ و چەوسنایۊیشا گەرەک نیا.
ئێمە پېوەرە هیواکېما گۊرۍ کەردۍ. بڕواما پاسەنە کە هامپەشتی و پێوەرەبیەیما چی قۆناغۍ ۋەروودەمیمانە زیاتەر وەڵۍ گنۆ.
پی بۆنۆ سپاسوو تەماموو گەلەکەیما مکەرمۍ کە دژوو ستەمی و زۆرداری ۋێڕاگریشا کەرد و پەرەشا بە کۊشیای ئازاڎیی دا و جەژنەکېماشا کەردە بە دووۍ جەژنۍ، ئێمە سپاسوو رەنجدەرا و خەباتکارا پارتەکەیما مکەرمۍ کە شەو و ڕۊشا وست سەروو یۊی و ئەرەکۊشۍ، سپاسوو ئانیشا گرڎیی مکەرمۍ کە سەروو سنووقەکاوە مردۍ و پارێزنایشا جە ئیراڎەو گردیما کەرد و گرڎوو فرت و فێڵەکېشا پوچۍ کەردۍ.
جەژنەو رەمەزانی مبارەکە مکەرمۍ، هیوا و ئامانجما ئانەنە کە کۊشیای ئاشتی و ئازاڎیی جە وڵاتەکەمانە و جە چوار لاو جەهانینە بیاوۆ بە سەرکەوتەی و سەرفرازی".
