پارێزەر جەمال دەمیر ئەرەیاۋناش، هێزو سیاسی و کۆمەڵایەتی "عەبدوڵلا ئۆجالان" ڕابەرو گەلوو کوردیما نەورۆزنە بە ئاشکرا ۋینا و ۋاتش،" پۊکەیچ پېۋیسا ڕا بڎریۊ پارێزەرۍ و خانەواڎەکۍ سەردای ئۆجالانی بکەرا."
عەبدوڵلا ئۆجالان ڕابەرو گەلوو کورڎی ٢٤ ساڵېن جە زینڎانو پیتەو (ئێفی) جە ئەمنیەتو بەرزو ئیمڕالی ئینا چېرو گۆشەگیرێۋی قورسینە و جە ٢٥و ئازاری ٢٠٢١یوە حیچ زانیارێۋە سەرش ۋەدەس نامان. ئینەیچ نارەحەتی و کارۋەدایۍ فرەش دلۍ گەلوو کورڎی و دۆسەکاشنە ۋەش کەرڎەن. نارەحەتیەکۍ جە بارەو تەندروستی و ئاژەو ئەمنی ئۆجالانیۊ زیاڎ بیېنۍ.
پارێزنەر جەمال دەمیر، چی بارۊ ئەرەیاۋناش؛ جە پیلانگێڵنای ١٥و شوباتیوە حەتا ئیسە، "عەبدوڵلا ئۆجالان" بە شێۋێۋی نامرۆڤانە و نایاسایی زینڎانیکریان و جە دژو یاساو دوژمنایەتی ئەرەکۊشۊ. دەمیر باسش چانەی کەرڎ کە "عەبدوڵلا ئۆجالان" ڕابەرو گەلوو کورڎی جە ئاژێۋی قورسی گۆشەگیرینە حەوڵ مڎۊ بۊ بە صەڎاو گەلی و ۋاتش، " کردەوەکۍ جبەرو مرۆڤایەتی کە چنەشەنە دیلکریان، پێۋیسا بۊ بە رۆژەڤو ۋڵاتا جەهانی، ئینەیچ ۋەر پەرسیاری ئێمەن. ئاژەو گۆشەگیری قورسو سەرو بەڕێز ئۆجالانی جە چۋار پارچەو کورڎسانی و فرەو ۋڵاتا جەهانی بۊنە بە مەڵامەتو سەرھورداکا".
گۆشەگیری سەرو بەڕێز ئۆجالانی پۍ گۆشەگیرێۋی فراوان و پلانپۍ نیایرە فاڕیان. پێۋیسا ئینسان سەرنج وزۊ سەرو ساڵەو ٢٠١٥ی. پېسە مزانیۊ ئا ۋەختە پرۊسېۋە بەنامۍ 'پرۆسەو ئاشتی و چارەسەری بۍ" کە دەسەڵات دلۍ پیلانێۋی سەرقاڵکردەینە و دلێبەرڎەی گرڎینە بۍ."
سەبرو گەلوو کورڎی تاقی مکەراۋە
دەمیر باسو ئانەیچش کەرڎ کە یەرۍ ساڵېن جە ڕوو جەسڎەیی و یاۋنەریۊ حیچ پەیوەنڎیۍ چنیش نییا و ۋاتش،" حیچ زانیاریېۋە جە بارەو ئۆجالانی و یەرە زینڎانیەکەی تەریۊ جە ئیمڕالی ۋەدەس نمۍ. دەسەلاڎ پی گۆشەگیریە رەهایە کە قبوڵ مەکریۊ، سەبرو گەلوو کورڎی تاقی مکەرۊۋە. سەرنجو گرڎ کەسێۋە ئینا سەرو ئانەی کە زانیاریېۋە جە ئیمڕالیۋە دەس وزیۊ. هەستیاری کۆمەڵایەتی سەرو ئیمڕالی و بەڕێز ئۆجالانی مزانیۊ. ئەگەر دەسەڵاتی سیاسی دمایی پی هەڵۋێسە ناحەقیە بارۊ، پۍ ئاشتی کۆمەڵایەتی بۊ بە ئاژێۋی گرنگ.
گەلوو کورڎی و دۆسەکېش گەرەکشانە بە زوتەرین ۋەخت زانیاری سەرو بەڕێز ئۆجالانی ۋەدەس بۍ. بە تایبەتی جە زەماۋنەکاو نەورۆزو ئېساڵیەنە بە ملۋێنان کەسۍ مجیېرە دلۍ مەیڎانەکا و ئی داواکاریەشا بەربڕی. واتە هێزو کۆمەڵایەتی و سیاسی بەڕێز ئۆجالانی جە نەورۆزنە بە ئاشکرایی ۋینیا. نزیک بیەی جە ۋەران ۋەرو بەڕێز ئۆجالانی پێۋیسا پی جۊرە بۊ. بەڕێز ئۆجالان زینڎانیېۋی ئاسایی نییا، راسیېۋی ڕابەری گەلوو کورڎی هەن. پۊکاتیچ پێۋیسا جە زوتەرین ۋەختەنە پارێزنەرۍ و خانەواڎەکۍ بتاۋا چنی بەڕێز ئۆجالانی چەمپنە کۊتەی ئەنجام بڎا."
ھورگېرتەو گۆشەگیری پۍ دما ڕۊو گەلا گرنگا
دەمیر ۋاتش،" ئامانج چی گۆشەگیریەو سەرو بەڕێز ئۆجالانی کە پېسە ئەشکەنجەی جە دژوو مرۆڤایەتی پێناسە کریۊ، نارەزاین جە ۋەران ۋەرو ڕانماییەکا پۍ چارەسەری.
جە دما دمایی قسەکاشنە دەمیر ۋاتش، " بەڕێز ئۆجالان ئاژەو ۋەرکەوتوو دلۍ ڕاسەی و چۋار پارچەو کورڎسانی و ۋڵاتا تەریچ بە عالی شی مکەرۊۋە، ڕانمایی و چارەسەری و ئاشتی پێشکەش مکەرۊ. ئینە جیاوازی و تایبەڎمەندی بەڕێز ئۆجالانی نیشانە مڎۊ. ئینەیچ سیستمو کرۆنیکی و نەتەوەپەرسی و، دەسپۆت، تاکپەرەسی و دژە دیموکراتی نارەحەڎ مکەرۊ. پۊکەیچ ھورگېرتەو گۆشەگیری رەهای سەرو بەڕێز ئۆجالانی پۍ دما ڕۊو گەلا ۋەرکەوتوو دلۍ ڕاسەی فرە زەروورا."
ھ.ش
