ئەرەنیشتەی دۆزوو کۆبانێ کامپوو زیندانوو سینجانینە، بە وەرگێریی هامسەرۆکی وەڵینوو پارتوو دیموکراتیکوو گەلا (هەدەپە)ی، سەڵاحەدین دەمیرتاش بەردەوام بی. سەڵاحەدین دەمیرتاش و چند سیاسەتمەدارێوە جە ڕاو سیستموو دەنگی و دیمەنیوە بەشدارێ بێنێ.

دەمیرتاش واتش، دۆزوو کۆبانێ ئۆپەراسیۆنوو دەوڵەتین و واتش: "ئێمە ڕووبەڕوێنمێ چەنی پیلانگێڵنیی بەردەوامی سیاسەت و سەرمایە و چاپەمەنی و بیرۆکراسییەتی". واتشۆ، جە ڕاو دۆزوو کۆبانێوە فەرمان و دیزاینێوە تازێ خولقیێنێ.

دەمیرتاش واتش، ئانە هەدەپە دەسش وستەن کەس نەتاوانش دەسش وزۆ، پەوکای بە سەرکەوتەی هەدەپەی ناڕەحەتێ بێنێ.

دەمیرتاش ئاماژەش پانەیە کرد، بۆنەو وەڵێکەوتەی کوردیوە هامپەیمانیی ئەردۆگان-باخچەلی وەش بی و هێزی نەژادپەرستی مەهەپەی دەسەڵاتدارا، دراو دەوڵەتین، واتش: "مەبۆ ئینسان بواچۆ هامپەیمانیی کۆماری، دەوڵەت ئیساتێ بەدەسوو مەهەپەین، ئیسەتێ مەهەپە دەسەڵاتدارا. ئینە هامپەیمانییێوە گولانە نیا.هامکاری گولانەی هەقەتینوو ئاکەپەین.  ئەگەر پاسە نەوینمێش، غەڵەت کەرمێ. ئەگەر بدیەیمێ دادگاو باڵای، ئی ڕاسییە موینمێ".

دەمیرتاش واتشۆ، ئی سیستموو دەوڵەتە تازەیە، دماو ئەزموونوو سەدێوە دەوڵەتشا ئارد ئا یاگێ گەرەکشانە، وەلێ ئێمە مدرامان کەرمێ. ئاماژەش پانەیە کەرد، دماو کودەتاکەو گرووپوو فەتحوڵا گولەنی، مەهەپە و ئەرگەنەکۆنە نەژادپەرسەکێ، ئەردۆگانشا دەسەڵاتنە ئاستۆ، وەلێ تاواشا دەس سەروو دەسەڵاتی و دەوڵەتیرە گێرا و بە کەیفوو وێشا جووڵیاوە، پینەیچە باخچەلی یاوا ئامانجەکەیش.

دەمیرتاش واتشۆ، ڕاو ئی دۆزیوە موازۆ، قۆناغوو ئەرەمەرزنا ڕژێمێوە نەژادیین. ئۆپۆزیسیۆنیچ دماو ورچنیایۆ گرد فرسەتێوەش فۆتنان، ئۆپۆزیسیۆن مەتاوۆ بە کوردی بواچۆ کورد بە سۆسیالیستی واچۆ سۆسیالیست، پەنەوازا گرد چێوی بەڕۆشنی بیاوۆ. قایلبییەی پانەی ئۆپۆزیسیۆن مەتاوۆ ڕاشا وەنە گێرۆ.

ئاخرۆ دەمیرتاش جەختش کەردۆ، پەنەوازا  گرد کوێ باوە و سەروو نەخشەڕای تازێ ڕێکێ گنا و ڕابەروو گەلوو کوردی عەبدوڵا ئۆجالانیچ ئی ئەنجامەیە وەرەچەم گێرا، ئینەیچ بۆ بە مایێ ئاشتیێوە درێژخواینی. هەرمانەو ڕۆشنویری و سیاسەتی بە پەنابەرردەی پەی چەکی مەبۆ، مشۆم  پەنا پەی چارەسەری بریۆ.

دادگا نرخنای پەی دۆخوو دەسبەسەرکەردەی کەرۆ و ئەرەنیشتەکەیش دما وست پەی سەبای.