دۊزوو کۊبانۍ، دادگاو سزای قورسەو ٢٢ەمینوو ئەنقەرەی کەمپوو زیندانوو سینجانینە بەرڎەوام بی. نوێنەرۍ چندین کەسێتی و پارت و ڕێکوزیایا بەشدارۍ بێنۍ.

سیاسەتمەدارۍ زیندانیکریۍ سەباحەت تونجەل و ئاینور ئاشان و گونای کوبیلای و بوڵەنت پارماکسیز و عەلی ئورکوت و نەزمی گور هۊڵوو دادگاینە ئامادۍ بێنۍ، هەرپاسەسیاسەتمەداراو زیندانەکای تەری ڕاو سیستموو دەنگ و ڕەنگیوە بەشدارۍ بێنۍ.

سەڵاحەدین دەمیرتاش، سوپاسوو ئانیشاش کەرد کە پەی مەرڎەی تاتەیش سەرەوەشییشا وەنە کەرڎەبۍ و واتش: "وەرگێرییەکەیم پێشکەشوو تاتەیم ئۊسا تاهیری کەروو، کە وانای و نویستەی نەزانۍ، بە ڕەنجوو وێش ٧ زارۊڵێش یاونۍ پەنە".

ئاماژەش پانەیە کەرد، کە دەوڵەت بەزۊر خاک و زێدوو ئێمەش ئەرەگیر کەرڎەن، ئانە کە پەیمانەو خاسەی و فەزیڵەتیش شێونێنە دەوڵەتا، ئەگەر پەی تاوانبارێوە گێڵدۍ، ئانە ئێمە نییەنمۍ، ئێمە قوربانیۍ دەسوو شمەنمۍ.  

دەمیرتاش واتش داعش و ئا گرووپە تندڕەوۍ ژیوایشا ئینا سەروو باوڕی دۊگمای پێوە ژیوایشا تێک دان، هەرپاسە ئانۍ تەنیا گەرەکشانە لەمەو وێشا تێرە کەرا و درێژە بە نەوەکاشا بدا، هۊمۊ سایپێنسێنۍ، حیچ پەیوەندیێوەشا بە چاندیوە نییا: "ئەگەر پەیمانەو خاسبییەی تێکە دریێنە و دەرفەتوو ژیوای هامبەشی نەمەنەن، ئانە تاوانوو ئێمە نییا".

واتش: "ئێمە تەنیا نامووس و شناسنامەو گەلەکەیما پارێزنا و مافوو ژیوایما سەروو خاکەکەیماوە پارێزنا.  وەڵاتوو وێمانە خاکوو وێمانە، ڕەنجوو خۊمانە. ئەنقەرەما ئەرەگیر کەرڎەن؟ ئامێنمۍ زوان و چاند و باوڕوو گەلا قەدەغە کەرمێ؟ تورک دژوو ئەرەگیری بەرۍ کەوتێنی؟ یۊنانی، بیزەنتی، ئینگلیزۍ بێنۍ و تورکۍ دژوو ئانیشا مدرامانشا کەرد. وەختۍ کورد مدرامان کەرۊ چی پنەش ماچدۍ تیرۊریست؟".

ئینجا دەمیرتاش تیشکەش وستە سەروو پەیوەندیی تاریخیی بەینوو کوردی و تورکی. دماتەر واتش: "ئێمە مدرامان کەرمۍ، زینداننە مدرامان کەرمۍ، پەرلەماننە مدرامان کەرمۍ. مدرامان دژوو زوڵمی ڕەوان. شمە شەو و ڕۊ پەی غەززەی بانگەوازوو مدرامانی کەرڎۍ. بانگوو ناڕەزایەتی کەرڎۍ. چی ئینە تاوان نییا، چی داواو سەربەوێی کەرڎۍ بە تاوان! تاکە ڕاو چارەسەروو پەرسەو کوردی: قبووڵکەرڎەی بیەیشا، ئێمە سەرە مەکۊمنمێرە. ئێمە ئامادێنمۍ پەی پێوەژیوای، وەلۍ تا دمایین جار دژوو ئی زیهنیەتەیە مدرامان کەرمێ".

ئەرەنیشتەکەی سەبای سەعات ١٠:٠٠ بە وەرگێریی دەمیرتاشی بەرڎەوام بۊ.