عەلی حەنان کە خەڵکو عەفرینین و بەمەڵامەتو هرووژمەکا دۆڵەتو تورکی و چەتەکێ پەی سەرو شەهبای و تل رەفعەتی جە ٢ی کانونو یوەمیینە جارێوە تەر کۆچ بەربییەن، ئیسە جە یەرەم کۆچبەریی وێشەنە مژیۋۆ. عەلی حەنان باسش جە ڕازەو کۆچبەری وێش کەرد.

عەلی حەنان باسش چانەیە کەرد، کە ساڵەو ٢٠١٦ بەمەڵامەتو پەلامارەکا دۆڵەتو تورکی و چەتەکاش ناچارێ بیێنێ جە حەلەبۆ ڕووە بکەرا عەفرین. دووێ ساڵێ دماتەر دیسان بەمەڵامەتو هرووژمەکا دۆڵەتو تورکی و چەتەکاشۆ پەی سەرو عەفرینی بنەیانەکەش جارێوە تەر کۆچبەرێ بیێنێ و ڕووەشا کەردێنە شەهبا.

جە ٢ی کانونو یوەمینە بەمەڵامەتو هرووژمو چەتەکا دۆڵەتو تورکی پەی سەرو شەهبای و تل رەفعەتی جارێوە تەر عەلی حەنان و بنەیانەکەش ئاوارێ بیێوە و دماو چوار ڕوا مەنەیۆ جە تەبقانە ڕووەشا کەردە حەسەکە.

عەلی حەنان باسش جە هەلومەرجو گرژی کۆچبەری کەرد و واتش، "نە یانێوەما هەن، دلێشەنە مەنمێ و نە ئاوێما هەنە سەرەما شۆرمێ". عەلی حەنان ئاماژەش بە گرژی و ئاستەنگییەکا دابینکەردەو پەنەوازییەکا سەڏان کۆچبەراش کەرد.

ناڕەحەتو زاڕۆڵا و بەتەمەنان

عەلی حەنان باسش چانەیە کەرد، کە پەی پەنەوازییەکا ئەڏا ٧٠ ساڵەکێش و زاڕۆڵە ٢ و ٨ ساڵەکاش ڕوانە زیاتەر بێتاقەت بۆنە. واتش، مەحاڵا چی هەوا چیانە یانێوە پەی زاڕۆڵەکام بێزوە. عەلی باسش جە گرژییەکا سەرەتاو مەنەیشۆ جە شەهبانەنە کەرد جە ساڵەو ٢٠١٨ ی واتش، "با زمسانە چێرو گەمارۆینە بینمێ. رژێمی زۆرداری کەرێ و نازێ سوتەمەنی بێ. بەڵام بە ویەردەو وەختی تاواما سەرو پەیاوە وێما گێرمێ. بە گەرماو هامنی و سەرداو زمسانی پەی شش ساڵا جە خێمەکانە مەنیمێ. ئینە هەم جە رووەو جەسەیی و هەمیچ جە رووەو مەعنەویۆ ئەزمونێوە دژوار بێ".

'شەهباما کەرد بە بەهەشت'

عەلی حەنان باسش چانەیە کەرد، یاگێوە چۆڵەی پێسەو شەهبایما کەردەبێ بە بەهەشت. کەردەبێما بە یاگێ ژیوای. گەلەکەما یاوابێ ئاستێوە کە ژیواو وێش دابین کەرێ. بەڵام دیسان بە مەڵامەتو هرووژمو چەتەکا دۆڵەتو تورکی، ناچارێ بیێ بە زۆرەملێ یانە و حاڵو وێشا جیابازا".

عەلی حەنان کە جە ڕاو خەیاتیۆ ژیواو وێش و بنەیانەکەیش دابین کەرێ باسش چانەیە کەرد، کۆچبەری و خولقناو هەلومەرجو ژیوای هەرمانێ ئاسانە نییەنە. دروسکەردەو یانەی و، دابینکەردەو کارەبۍ، ئاوی و رێکوپێک کەردەی هەلومەرجو مەکتەبی و زاڕۆڵا گردوو ئینشا دژواری و تەنگوچەڵەمێنی. کۆچبەری تەنیا رێکوزتێوە جەسەیی نییا، هامکات کارەسات و ئێشێ دەرونیشچا".

'ئێمە درێژە بە مڏرامانی مڎەیمێ'

عەلی حەنان جە دماینە هەستو وێش وەراوەر پا قۆناغا کەپۆرەشەرە ویەردێنێ و ئانەی سەرشارە ئامان پی جۆرە بەرش بڕی: "گەرەکشانە ژیواو ئێمە بکەرا زینان. هەوڵ مڎا کە بێزاری و مانییای ساز بکەرا. حەر چنە ئێمە وەرەوڕو دژواری و تەنگوچەڵەمەیچ بیمێوە ئێمە درێژە بە مڏرامانی مڎەیمێ".