ئازاڎیی ئەرەیاۋناو ژەنا (Woman Press Freedom) سەربە هامپەیمانی ژەنا رۆنامەنوویسی بۆنەو ٣ۍ ئایاری ڕۊو ئازاڎیی ئەرەیاۋنای سەبارەت بە ئاژەو ژەنا رۆنامەنوویسی گوزارشتەو ۋێش ئاشکرا کەردە. جە گوزارشتەکېنە ئامان، کە دەسەڵآتدارا پېسە چەکێوە زینڎانی دژوو رۆنامەوانا بەکارمارا.

جە گوزارشتەکېنە ئامان، کە زینڎانەکۍ پېسە جۆرێوە جە سانسۆری بەکار مەیا و ئانەیچ وزیان ڕووە، " سەروو ئاستوو جیهانینە دەسەڵاتدارا پەی بێدەنگکەردەی رۆنامەوانا کەرەسەی فێڵبازانە مېزاوە. ئێمە جە ڕۊو جیهانی ئازاڎیی رۆنامەوانینە موینمۍ کە ئێساڵ گېرتەی رۆنامەنوویسا رووەش جە بەرزی کەردەن و ئانەیچ مەترسیڎارا. رۆنامەوانا جە زینڎانەکانە ڕا گیریا، بێدەنگۍ کریا، سەرەتاییتەرین بنەماکاو ئازاڎیی کاری رۆنامەوانی دلېنە بریا".

جە گوزارشتەکېنە سەرنج وزیان سەروو مەترسییەکاو سەروو رۆنامەوانا جە سەرانسەروو جیهانینە و پی جۆرە ئامان، "ئێمە چەمە ڕێنمۍ کە دەموودەس کەشێوە ئازاڎ و بێتەرس پەی کاری رۆنامەوانی بڕەخسیۆ. چنی بەردەوامبیەی گێرتەی رۆنامەوانا هەڕەشۍ سەروو مافوو ڕابەربڕیەی و دیموکراسیچ قووڵ بۆوە. مەبۆ گێرتەی رۆنامەوانا کە راسی و ئەوەپەرسایما یاڎ ماراوە، جە یاڎ بکەرمۍ و پەشتگۊششا وزمۍ. ئامارەکۍ بەرش وزا کە گێرتەی رۆنامەوانا تەنیا چا وڵاتانە نییا کە جە بەروو سیستمی دیموکراسینە جماوە، جە سەرانسەروو جیهانینە بیەن بە هەڵمەتێوە گرڎینە".

جە بەشێوەتەروو گوزارشتەکێنە ئامان، کە جە ساڵەو ٢٠٢٤ینە ٩٢ رۆنامەوانۍ ژەنی ئینۍ زینڎانەنە، کە ٥٧ کەسێشا ئێساڵ رووبەڕوو گێرتەی و زینڎانی کەردەی بیێنێوە. حەرپاسە ئانەیچ وزیان ڕووە، کە بە پاو زانیارییەکا ئا ژەنۍ تەنیا جە ڕاو گێرتەی و زینڎانیکەردەیۆ مافەکێشا پاشێل مەکریا، بەڵکم جە هەمان وەختەنە چنی بەردەیشا پەی زینڎانی رووبەڕوو گێچەڵۍ، مامەڵەی جیاکارانەی، رەگەزپەرسی باوە. ئانەیچ تەنیا بە بێدەنگکەردەی ژەنا سنووردار مەبۆ، جە هەمان وەختەنە پەیامێوەن پەی ژەنا، ئاڎیشا جە کاری رۆنامەوانی دوورۍ وزۆوە. ئامارەکۍ ۋەروودەسیما نیشانەش مڎا کە ئاژەو کەردەی ئامانجوو ژەنا رۆنامەوانی و ئاستەنگەکاو ۋەروو دەمیشا ئینا چ ئاستێوەنە".