نێرگس محەمەدی-یە بریێوێ خەڵاتو نۆبڵو ئاشتی و چالاکەی زیندانیکریێ، بە ئاماژەدای بە فشارو هێزە ئەمنییەکا سەرو ژەناوە پەی سەپنای حیجابی، واتش: "دەسەڵاتدارێ جادەکێشا کەردێنێ بە مەیدانو جەنگی دژو ژەنا".
ڕۆو شەممەی ١٣و نیسانیوە، پڕۆژێوە بە نامێ نوریوە جە جادە و یاگە گردینەکاو فرەو شارەکاو ئێرانینە مکریۆ، کە ئامانجش پێسە هەرمانبەدەساو دەوڵەتی واتەنشا، "وەرگێریکەردەی بێحیجابیین" و چا چوارچوەنە ماوەو حەفتەی وەڵینینە چندین گێرتێ ڤیدیۆیی بارەو تندوتیژیی هێزەکاو دەوڵەتیوە وەراوەرو ژەنا وەڵێ کریێنێوە.
چا بارەوە نێرگس محەمەدی-یە بریێوێ خەڵاتو نۆبڵو ئاشتی، کە ئینا زیندانو ئێڤینو تارانینە، پەیامێونە ئاماژەش کەردەن، حکومەت گیرۆدەو ئازارەی کوشندێ نەبییەی ڕەوایەتیین دلێنە و لاوازیین سەرو ئاستی میاننەتەوەیی.
وستەنیچش ڕووە،"دەسەڵات چەوپەڕو بێچارەیینە جادەکێش کەردێنێ بە مەیدانو جەنگی دژو ژەنا و گەنجا و گەرەکشا ئازارەو نەمەنەی ڕەوایەتی دلێنە و وڕیای هێزەکەی بە تەرسی و تۆقنای قەرەبوو بکەرۆوە و لاوازبییەی و گاڵتەجاڕبییەی بانگەشەکاش کایێ میاننەتەوەیینە بە ستەم و زۆرداری دلێنە چارەسەر بکەرۆ".
نێرگس محەمەدییە واتەنیچش، "وێگێری و مدرامانو ژەنە سەربەرزاو ئێرانی جادەکاو شارەکانە و بەردەوامیدای بە نافەرمانی و یاخیبییەی مەدەنی، هەناسەکاو دەسەڵاتو وێسەپنی ئایینیش یاونان دمایین هەناسەدایەکاش"، جەختش کەردەنۆ، "جادە پەی ئێمەن و بەدڵنیاییەوە سەرکەوتەیچ چارەنویسو ئێمەن".
گێڵایۆ پۆلیسو ئەخلاقی پەی جادەکا دماو ئانەیە مێ، کە عەلی خامنەیی ڕابەری ئایینی ئێرانی نماو جەژنێنە داواش کەردێبێ، کە دەوڵەت وەرگێریی ئا دیاردا بکەرۆ کە بە "لادای و پاشێلکەردەی نۆرم و پیمەرە ئایینیەکا" نامێش بەردێبێنێ، پێسەو ئاماژێو پەی زیادبییەی ئا ژەنا کە بە بێ حیجابی بەزۆرە یاگە گردییەکانە بەرێ مگنانێ.
