نویسەر و ئەوە کۆڵەری سیاسی فرسەت دۆسکی باسش چانەیەکەرد حکومەتو ئەرد‌ۆغانی بە بێ جیاوازی هەڕەشێ سەرو گردو بەشەکا کوردەسانی مکەرۆ.

دۆسکی پەی ئاژانسو هەواڵو فوراتی (ANF)ی قسێش کەردێ و ئانەش ویرئاردیمێ کە تاریخو کوردەسانی پەڕا جە شکسی و عەقڵیەتو ئەرەگیری کە متاومێ دەرسشا چنە هۆرگێرمێنە و واتش: "جە ئیسەنە دەسەڵاتداری تورکی هەڕەشێنە سەرو وەرنیشتی و ویست و دلێنەبەردەیشا. بە دڵنیاییۆ ئینە بەتەنیا جە دژو هەرێمو کوردا نییا، بەڵکوم هەڕەشێنە سەرو بییەو گەلو کوردی."

دۆسکی دەسنیشانش کەرد مەبۆ دژایەتیکەردەی ئەردۆغانی بە تەنیا جە دژو پەکەکەی یان یەپەگەی هۆرسەنگیۆنە و جەختش چانەیەکەردۆ دژایەتیکەردەو دۆڵەتو تورکی جە وەرنیشتەنە دژو بییەو کوردان. دۆسکی واتش: "گرنگ نییا کام پارت، ڕێکوزتەی و کەسایەتییی کورد بۆ، ئی ڕژێمە جە دژو گرد چێوێ کوردین." دۆسکی بانگەوازش جە کوردا کەرد چی ساتەنە کە هرووژمو و ئاڵۆزییێ فرە سەرو وەرنیشتی هەن، پەنەوازا کوردێ جیاوازی و فرەچێوی وێسا وسا لێوە و هەڵوێسێ هامبەش نیشانە دانە.

نەکەراما بە قوربانی بەرژەوەندییە حیزبییەکا

دۆسکی دەسنیشانشکەرد پارێزناو دەسکەوتەکا وەرنیشتی جە ئاستو ژیواینە گرنگا و ئینەش وات: "ئا دەسکەوتۍ بە ونەو گەلی و گەشمەرڏاما بەدەسئامێنێ، نەکریا قوربانەو بەرژەوەندییە شەخسی و حیزبییەکا. خیانەت جە فیداکاری گەشمەرڏاما نەکەرمێ. تاریخ حیچ کاتێ خیانەت جەویرمەکەرۆ."

دۆسکی دەستنیشانشکەرد، کاتەکە هین ئانەی نییا باس جە جیاوازیییەکا کریۆنە جە وەرنیشتەنە و جەختشکەردۆ چانەی پەنەوازا کورد بە یۆگێرتەی بلۆ شام، سیاسەتی هامبەش بەرۆڕاوە و واتش، یۆبییەی مەرجا پەی پارێزناو مافەکا گەلو کوردی.

با گرژی تازە نێ ئاراوە

دۆسکی ئانەیچش وست ڕووە، کە مشۆ  گەلو کوردی ڕا نەڎۆ بە پێکئاردەیۆ پەیمانێوەتەرو لۆزانی و واتش: "مەبۆنە جارێوە تەر قوربانی، هیوا و ئێشەکا  گەلەکەیما بکریانە قوربانی ناکۆکییە شەخسییەکا. تەنیا یۆگێرتەی زامنو ئازادییمانە."

جە دەورو بانگەوازییەکەو مەزڵوم عەبدیرە جەمێبیمێوە

دۆسکی باسش چانەیە کەرد گرووپەکۍ هامشێوەو داعشی، بەرەو نوسرەی و جە ئیسەنە هەتەشە وەرگری وێشا فاڕان، بە ڕاو دیبلۆماسی ڕەوایەتیشا پنەدریان، بەڵام مەبۆ گرو ئا تاوانە جەنگییا جە ویر کریانە کە بە دەسو ئی گرووپاوە جە دژو گەلو کوردی جە سەریکانی، گرێ سپی و عەفرین ئەنجامیدریێ و واتش: "پەی پارێزناو هیوای و دەستکەوتەکا گەلەکەیما جە هەر چوار پارچەو کوردەسانی پێوەرە دیدار و یۆگێرتەیما وسمێ هەرمانە. هێزە چەکدارییەکێ وەرنیستی سەرو هێڵێوە خەڵەتی نیەنێ، ئارێ پەی پارێزناو گەلەکەیشا گیانو وێشا بەخت کەرا. ئینەیخ پەی کوردا یاگێ مشتومڕی نییەنە. مشۆم جە دەوورو هەڵوێس و بانگەوازییەکەو مەزڵوم عەبدی سیاسەتێوە هامبەش بریۆڕاوە. ئینە گرەنتی ئایندەی گەل و سیاسەتیمانە. یۆبییەی و یۆگێرتەی جە دەوورو دەسکەوتەکا وەرنیشتی هیواو گەلو کوردین. کورد تەنیا بە یۆگێرتەی وێش متاوۆ ئا دەسکەوتا پارێزنۆ و مشۆم گرد کەسێ کۊشش بکەرۆ."