دۊڵەتو تورکی پەی پەروەردەکەردەی چەتەکا داعشی ئانۍ کە ئینۍ تەلعەفەر و موسڵەنە کەمپۍ سەروازیش کەردەنۆ. چەتەکۍ کە سەرچەتە ئەشرەف ئانتاکی سەرکردایەتیشا مکەرۆ، پەی هرووژمکەردەی سەرو کوردا پەروەردە و ڕائاوردەیشا پنە مکریۆ. بە پاو ئا زانیاریا جە سەرچەمېوە تایبەتیۆ دەسوزییان، دۊڵەتو تورکی هەوڵمڎۆ جە شەنگال، مەخمور و تەمامو عێراقینە سەرجەنۆ داعشی زیڼە بکەرۆوە و پەڕ چەکو تفاقشا بکەرۆ.

جە دەوروبەرو عەزازی و ئیدلبینە دەیان کەمپۍ وەشۍ کریێنۍ و چا کەمپانە چنی پەنابەرا عێراقی و ئاوارە سوورییەکا، ئەنداماو داعشی پەروەردۍ مکریا. دماتەر ئا چەتۍ چا پەروەردە کریێنۍ بەرەو ناوچە جیا جیاکا عێراقی و سووریای ڕەوانە مکریا. نزیکەو هەزار و ٢٠٠ چەتا داعشی پەروەردۍ کریێنۍ، فرەیشا ئینۍ تەلعەفەر و موسڵەنە.

سەرچەمەکە ئەرەیاۋناش کەمپەکۍ هەرێمو مەرمە حەجەری جە جرابولس و کەمپو یاگۍ نزیک سەرسنورەکا شارو ئیدلبی چڼین مانگېن هەرمانە مکەرا و واتش، چا کەمپانە کە پنەشا وچیۆ 'قەرەکۆپری' ئا کەسێشە چنە پەروەردە مکریا کە بە فرەیی جە عێراق (موسڵ، سەڵاحەدین، شرگات)ۆ ئامێنۍ.

سەرچەتەو ئا ناوچەیچە ئەشرەف ئانتاکی-یا و ۋەرپەرس ە پەروەردەکان چېرو چەمڎاری دۊڵەتو تورکینە.

سەرچەمەکە ئاماژەش پانەیچ دا، ئی چەتۍ دماو ئانەی پەروەردەو کۆماندۆیی تورکی تەمامنا، پېسە هێزۍ سەر بە دۊڵەتو تورکی پەی ناوچە جیاوازەکا ڕەوانە مکریا.

جە مەرامو ئا چەتانە منبج، عەفرین، کۆبانێ و هەرێمە ئەرەگیرکریێکۍ تەرۍ هەنۍ.

ئا کەمپۍ کە چەتەکېشا چنە پەروەردە مکریا پی جۊرەنە:

کەمپو بابی ئەس-سەلام (نزیک حەلەبی)، کەمپو 'بەرخۆدانی' (جە هەرێمو مارای نزیک عەزازی) موخەیەم ئەحمەلاد (سۆران، هەرێمو عەزازی) موخەیەم ئەبو ئەل-حەتاهیە (عەزاز)، کەمپو 'عەسیقا'، موخەیەم ئەل- فورقا، موخەیەم عاتما (حارم، ئدلیب)، ئەل-وەدیحی حارم، جە هەرێمو دانای ئیدلبی، عەس-سەلام (ئدلیب)، موخەیەم ئەل-کەراما (ئیدلب)، قاح قاح ئەل-فیردوس (ئیدلب)، موخەیەم ئەل-ئەیادی ئەل-بەیدا، موخەیەم سەحرەت ئەل-خەلیج، موخەیەم خان ئەل-شێخون، ئاتمان (ئیدلب) موخەیەم ئەل-ئیمان ئاتما (ئیدلب)، موخەیەم ئەل-فان ئەل-شیمالی، نەحنو ماعن، موخەیەم فەرجا، نەحنو ئوممە، ئەل-قونتەرات.