دۆڵەتو تورکی جە دژو خەڵکی مەدەنی تاوانە ئەنجام مڎا
ئەندامی وەڵینو پەرلەمانو هەرێمو بەرلینی هاکان تاش ئەرەیاوناش؛ دۆڵەتو تورکی بەردەوام وەڵێ وڕنای ڕژێمو ئەسەدینە هرووژم کەرێ سەرو وەرنیشتی و واتش: "دۆڵەتو تورکی جە دژو خەڵکی مەدەنی تاوانە ئەنجام مڎۆ."
ئەندامی وەڵینو پەرلەمانو هەرێمو بەرلینی هاکان تاش ئەرەیاوناش؛ سوپاو تورکی نەک تەنیا دماو وڕنای ڕژێمو ئەسەدی هرووژمش کەرد سەرو وەرنیشتوو کوردەسانی، بەڵکووم وەڵتەرێچ بەردەوام خەڵکی مەدەنیێ هەرێمەکەیش کەردێنێ ئامانج و بەسەڏان هاموڵاتیێ مەدەنیێش کوشتێنێ.
هاکان تاش ویرش ئاردۆ کە چی دماییاییانە ڕۆنامەوان نازم داشتان و جیهان بیلگینە بەدەسو دۆڵەتو تورکی گەشمەرڏێ کریێ، ئی تاوانێشە ئیدانە کەردە و واتش: "نمەبۆ جەلایەنو حیچ وڵاتێوە ئی تاوانێ قەبوڵ کریانە کە ڕۆنامەوانێ بێتاوانێ گیریانە ئامانج و گەشمەرڏێ کریا. پۆکەی داوا جەگەلو ئەوروپای کەرو دژ بی کردەوا ناڕەزایەتی وێشا نیشانە دانە."
هاکان تاش چنی دەسپنەکەردەو ئاژەی تازەو سوریای، دەسەڵاتدارا فیدراڵی ئاڵمانیای و وڵاتا تەرێ پەیوەندیدارێ سەردای تورکیایشا کەردەن و سەبارەت بە هرووژمەکا پەی سەرو کوردا ڕەخنەشا گێرتەن.
هاکان تاش ئانەیچش وات کە ئەمریکا خەڵاتو ١٠ملیۆن دۆلاراش پەی پاڵبەسکەردەو سەرۆکو ڕێکوزیاو هەتەشەی کە جە لیستو تیرۆرو ئەمریکاینە هۆرشانانۆ و واتش: "ئەمریکا و وڵاتا تەرو ئەوروپای پەی ئانەی بتاوانە ڕاو هامکاری چنی هەتەشەی کەراوە، چنی یۆترینی کۆتۍ ملەملانۍ".
هاکان تاش بانگەوازو پارێزنای مافەکا گەلو کوردیش جە سوریانە و پاڵپەشتیش جە ئەرەکۆشای کەرد و ئەرەیاوناش؛ دۆڵەتو تورکی بە هرووژمەکاش زەرەرێ گۆرە بە خەڵکی مەدەنی مېیاونۆنە و پەنەوازا گرڎ کەسێ جەدژو ئا تاوانێ دەنگو وێشا بەرز بکەراوە و نارەزایەتی نیشانە بڎا."
