'دۆڵەتو ئێرانی ئێساڵ ٨٨٣ کەسێش دێنۍ قەنارە'
ماڵپەڕو هەرانای وەڵاش کەرڎۆ، کە جە سەرەتاو ئێساڵیوە ٨٨٣ کەسۍ جە ئێرانەنە دریێنۍ قەنارە. ئانەیچ وزیان ڕووە، کە هەر جە ئێساڵەنە سزاو جە قەنارەدای سەرو ٢٦ ژەنارە جابەجێکریان.
ماڵپەڕو جەمەو چالاکا مافەکا مرۆڤو ئێرانی (هەرانا) وەڵاش کەرڎۆ، ئێساڵ ٨٨٣ کەسۍ جە ئێرانەنە دریێنۍ قەنارە، ٢٦ ژەنۍ و ٥ کەسۍ وارو تەمەنو ١٨ ساڵیۆ ئینۍ دلۍ جە قەنارەدریایانە.
بەپاو ئامارەکا ئا ماڵپەڕیە رێژەو جە قەنارەدای ئێساڵ بە رێژەو سەڎەنە ٣٣.٥ زیاڎش کەردەن.
هەرپاسە ئانەیچ وزیان ڕووە کە هەر ئۍ ساڵ سزاو جە قەنارەدای پەی ٢٠٧ کەسا بڕیانۆ و سزاو ٥٤ کەساشا جە لایەنو دیوانو باڵاو دادوەری ئێرانیوە پەشڕاس کریانۆ.
ئەرەیاۋېیان کە سەڎەنە ٥١.٨٧و ئا کەسا کە دریێنۍ قەنارە تۆمەتەو "مادەی هۆشبەر"یشا رووبەڕووکریانۆ، و جە سەڎەنە ٤٠.٥٤و ئا کەسایچە بە تۆمەتو "تاوانەو کوشتەی بە ئەنقەسی" سزاو جە قەنارەدایشا پەی بڕیابێوە.
یاگۍ ئاماژەینە بە پاو ئامارەکا رێکوزیاو مافەکا مرۆڤو ئێرانی ساڵەو ٢٠٢٣ لاوکەمیۆ ٨٣٤ کەسۍ جە ئێرانەنە جە قەنارەدریێبێنۍ.
