بارزانیەکۍ و دەسەڵاتو پەدەکەی بەردەوام گۆرە ئەرەگیرەکۍ ۋێشا کە کورڎەسانشا ئەرەگیرکەرڎەن قایلۍ کەرڎێنۍ. خەسڵەتی سەرەکی ئا پەیوەندیا کە چنی ئەرەگیرا وەششا کەرڎێنۍ ئانەنە کە دژایەتی جمیەرەکا و بەشەکا تەرو کورڎەسانی بکەرا.

تاریخو کورڎەسانی تاریخو خیانەتی و تراژیدی و داستانو مڎرامانین. ڕابەر ئاپۆ بە، خیانەتو ئانکیدوی و مڎرامانوو هونبابای جە ئەفسانەو گلگامێشینە، ئی حەقەتینە تاریخیە وزۆ ڕووە چنی هارپاگوسی، کە دەسش بۍ جە وڕنای ئیمپراتۆریەتو مادینە، چنی دنیاو ئارۆی مقارنەش مکەرۆ. نەریتو خیانەتی کە جە ئانکیدۆوە دەسش پنەکەرڎ بەردەوام دەورێوە خراپ و تاریکش جە ژیۋای گەلوو کورڎینە بیەن. ۋەرو ئانەی بابەتەکەما تاریخو کورڎەسانی نییا پۊکەی سەرنج وزمۍ سەرو خیانەتو ئیساتۍ بنەیانەو بارزانی ئا کەسۍ دەورو ئانکیدوی سەردەمی مگێڵنا و پېسە ڤایرۆسێوە سەرەتانی کۊتێنۍ گیانو گەلوو کورڎی. ئێمە باس جە دەزگاو پاراستنی و ڕێکوستەی بنەماڵەو دژە کورڎی و دژە تیرۆرو پارتی مکەرمۍ.

کوڵینێوە جا تاریخو بارزانییەکا

پەی ئەنەیاوای جە واقیعو هامکاری و خیانەتی جە بنەیانەکا ئارۆینە، کوچۍ گێڵمێوە پەی تاریخی و دماتەر چنی سەردەمو ئارۆیما مقارنەش مکەرمۍ تا یاردیدەرما بۆ پەی ئانەی زیاتەر جە حەقەتینەکا بیاومێنە. توێژەرا بە دووۍ نۆعۍ هۊرسەنگنای پەی ئاماو بارزانییەکا جە جبەرۆ مکەرا. یوەم؛ چانەی مشۆ جە سەرنیشتوو کورڎەسانیۆ ئامۍ با و جە ئامێدی و دەڤەرو بارزانینە ئەرەنیشتۍ بیێنۍ. دووەم گریمانە ئانەنە کە بنەیانێوە جولەکێنۍ کە جە سەردەمو نەبوخەسنسەرینە ئامێنۍ و جە پانیشتوو کورڎەسانینە ئەرەنیشتۍ بیێنۍ. هەرچڼە توێژەرا گریمانەی جیاوازشا سەرو شناسنامەو خێزانەکەی وستەن ڕووە، بەڵام خاڵە هامبەشەکۍ ئانەما پەی بەروزا کە بارزانییەکۍ جە شۆنۍ تەر و دماتەر ئامێنۍ کورڎەسان. کەواتە کەلیمۍ ڕەسەنەو بارزانی و بارزانی چکۆوە ئامان؟

بارزان وەڵۍ بنەیانەو بارزانینە بیەیش بیەن

بارزان نامۍ ناوچێوە جوگرافیاو کورڎەسانین. یۆبیەو هۆزەکاو بارزانی جە کۆنفیدراسیۆنو هۆزە کوردیەکا (مزوری، دۆلەمەڕی، بروژی و شێروانی) پێک ئامان و چا ناوچەنە مژیۋا. ئی یۆگێرتەیە فرە وەڵۍ بنەیانەو بارزانینە بیەیش بیەن. سەردەمو وەڵۍ کورڎەسانی ئی بنەیانە جە ڕوو تاریخیۆ فرە ئشناسیۍ نەبێنۍ و فرەو ئا زانیارییا کە ئینۍ ۋەردەسەنە پارچە پارچێنۍ یان بەشێوێوە شاریێنۍ. بەڵام ئاشکران کە کورڎەسان سەرو چ یەکڕیزیۍ ڕۆحی و یاڎەوریێوە ئەرەمەرزیان. نامۍ بارزانی جە هەرێمەکەنە بە عاشقا نیشتمانی ئشناسیان. بنەیانەو بارزانی سەرەتا ئامێنۍ ئامێدی، زاخۆ و دهۆک و دماتەر ئامێنۍ لێوارو ڕووبارو زاپی کە ئا کاتە پنەش وچیان زێ و جە دەگایەکا بیلە و دۆرەینە ئەرەنیشتۍ با کە پنەشا وچیۍ "بنەیانەو بارزانی" کە مەعناو "خێزانو سەرو ئاوەو زاپ"ی میاونۆ. نەک هەر ئی بنەیانە بەڵکم وەڵتەریچ بە ئەرەنیشتا لێوارو ڕووبارو زاپی بە نامۍ بارزانیۆ جە ۋییەرڎەنە نامێشا ئامێنە کە هیچ عیلاقێوە خێڵەکی و عەشیرەییش نییا بە بنەیانەو بارزانیۆ، بەڵکم چنی مەزهەبو نەقشبەندی جە ساڵەکا ١٨٥٠ ینە جە پانیشتوو کورڎەسانینە مەیا وەڵۍ و هۆزێوە ساختە بە دەسو ۋێشا وەشمکەرا.

سەرچەمەکۍ دەسەڵاتو مەسعوود بارزانی

ۋەرو ئانەی بابەتەکەما یەرین مامۆ و کوڕ و برازان زیاتەر عیلاقەش بە بنەیانەو مەسعود بارزانی و نەریتو خیانەتو کوڕی و برازاکاشۆ هەن. مەسعوود بارزانی چنی کناچۍ محەممەد خالیدی کوڕو شێخ بارزانی هامسەرگیریش کەرڎەن. ئەڎاش جە هۆزو زێبارینە. ئینە دەسەڵاتی خێڵەکی و ئایینیش پنە بەخشۆ. ئی دووە سەرچەمەو دەسەڵاتو مەسعوود بارزانی جە ئیدریسی برا گۆرەیش قەوەتتەرش مکەرا و مبۆ بە مەڵامەتوو ئانەی بۆ بە میراتگرو تاتەیش.

پەنەوازا سەرەتا ئاماژە پانەی بکریۆ کە ئی وتارۍ پی ئەنەیاوایە بە گرڎی باس جە عەشیرەتو بارزانی و پەدەکەی نمەکەرۆ. هەم دلۍ بنەیانەو بارزانی و هەم دلۍ پەدەکەیچەنە بێگومان کەسانۍ نیشتمانپەروەرۍ هەنۍ ئی وتارۍ بە هیچ نۆعۍ ئا کەسا نمەگێرۆوە ۋەرو ئانەی دڵسۆزۍ گەل و وڵاتەکەیشانۍ. مەبەس چی وتارۍ ئاشکراکەرڎەی ڕێچکەو خیانەتین کە بە شێوێوە یەرە کەسی مەسعوود، مەسرور و نێچیرڤان بارزانی بە بەڵگۆ چنەشەنە بەشدارێنۍ.

جە هەر شۊنێنە دەسوەردایشا کەرڎەبۆ، زەرەرشا پنەیاونان

تاریخو بارزانی و پەدەکەی کلتوورێوە بنەیانەین کە چنەشەنە هامکاری و خیانەت تێکەڵێنۍ و سەرچەمەو سەرەکی ئا عەقڵیەتەیە کە زەرەرش بە کورڎەسانی یاۋنان. جە تاریخو گەلانە خیانەت فرە کریان. ئینسان نمەتاوۆ نموونێوەش دەس گنۆ کە ئڼەو بارزانییەکا بڕەمای و تەسلیمبیەی جە ناخشانە بیە بۆ. بارزانییەکۍ جە هەر شۆنێنە کە دەسوەردایشا جە کاروبارو کورڎەسانینە کەرڎەبۆ، کورڎۍ ئەرەنیشتۍ ئا شۊنێشا بەش بەشۍ کەرڎێنۍ و ڕابەرایەتی و ئەرەکۊشایشا هۊرشێۋنێنۍ. وڵاتپارێزنا و کەسانۍ نامیۍ کە جە بەشەکا کورڎەسانیوە پەناشا پەی  هەرێمی ڕزگارکریاو پانیشتوو کورڎەسانی جە عێراقەنە بەردەبۆ، بە دەسو زوڵمو پەدەکەی فرەزەرەرمەنڎۍ بیێنۍ. پەی نموونەی؛

*سلێمان موعینی یۆ جە ڕابەرا ۋەرکۊتوو کورڎەسانی جە لایەنو پەدەکەیۆ گەشمەرڎە کریا و تەرمەکەش داوە بە ساواکی (ئیتلاعاتو ئا سەردەمەو ئێران)ی.

*سکرتێری گرڎین و پەدەکەو ۋەرکۊتی، ئەحمەد تۆفیق، ئانڎە جە لایەنو بارزانیۆ ستەمش ۋنە کریا، دماجار ناچار بی ڕووە جە بەغڎای بکەرۆ و دماتەر جە ساڵەو ١٩٧٢ جە لایەنو هێزەکاو بەعسیوە جە بەغڎانە کوشیا.

* سەعید ئەلچی یۆ جە ڕابەرا پەدەکەی جە سەرنیشتوو کورڎەسانی(پەدەکە-ت) و دماتەر دکتۆر شوان (سەعید کرمزی تۆپراک) بە ئەمرەو ڕاوەبەری پەدەکە(بارزانی) ئەشکەنجە دریا و بە شێوێوە دڕندانە گەشمەرڎە کریا.

حیزبە کوردییەکۍ جە سەرنیشت و ۋەرکۊتوو کورڎةسانینە پی جۆرە بەدەسو بارزانی ڕووبەڕوو دلېنەشیەی و ئیفلیچی بیێوە. ئی ئازە سەرو داواو ناوەندە ئیستخبارییەکا ساواکو ئێرانی و میتو تورکیای ڕوەشا دا. هەرجۆرە دەسوەردایۍ دەسەڵاتدارا پەدەکەی جە کاروبارو دلېینەو جمیەرە کوردییەکا ۋەرنیشتوو کورڎەسانی زەرەرۍ گۊرەش بە یەکڕیزی هێزەکا واگەی و ئەرەکۊشای هامبەشیشا یاۋنان. بە هەمان شێوە جمیەری کوردی جە لوبنانەنە کە چالاکانە مامەڵە چنی کێشەو پەنابەرا کوردی کەرۍ، بە مەڵامەتو دەسوەردای دەسەڵاتدارا پەدەکەیۆ ڕووبەڕوو ناکۆکی دلېینەی بیۆ. بەپوختی بارزانییەکۍ و پەدەکە ئەرکی سەرەکی ۋێشا جە پارچەکەرڎەی هێز و وزەو کورڎانە جە بەشەکا تەرو کورڎەسانینە بەکار ئاورڎەن. ئارۆیچ بە جۆش و خرۆشێوە فرۆ درێژە پی ئەرکەیشا مڎا و هەوڵو ئانەیشا دان ڕەزایەتو ئاغاکاشا بەدەس بارا. هەرچڼە نامێش "پارتی دیموکراتو کورڎەسانی"ـن، بەڵام جە ڕوو کرداریوە، بەدڵنیاییوە لایەق بە نازنامۍ "پارتی خیانەتکارو کورڎەسانین"، پېسە ئانەی کە گەلەکەما فرە بە زەریفی وەسفش مکەرا.

دژو جمیەری و بەشەکا تەرو کورڎەسانینۍ

بارزانییەکۍ و دەسەڵاتدارا پەدەکەی بەردەوام ئاغا ئەرەگیرکەرەکێشا کە کورڎەسانشا ئەرەگیر کەرڎەن ڕازی کەرڎێنۍ. مەبەسی سەرەکی پەیوەندییەکاشا چنی هەر هێز و لایەنێوە بەری سەرو بنەماو دژایەتی چنی جمیەری و بەشەکا تەرو کورڎەسانی بیەن. تەنانەت ئینەیچ بەڵگەن سەرو سیماو دژە کورڎی و کورڎەسانی بیەی بارزانی و پەدەکەی. بارزانیەکۍ حەجگیز مەبەسشا پارېزنای بەرژەوەندییە نەتەوەییەکا کورڎەسانی و چەسپنای یەکڕیزی کورڎەسانی نەبیەن بە هیچ نەوعۍ. بارزانیەکۍ پېسە ئا دەڵاڵا کە بە جلۍ کوردیۆ بەرۍ گنا، جە پێگەو کوردبیەینە پېسە ئامرازێوە پەی مەسڵەحەتو ۋێشا بەکارشا ئارڎەن. چی ڕوانگۆ ئەگەر بارزانییەکا بە بەشێوە جە میللەتوو کوردی بشناسمۍ هەرمانۍ غەڵەتەنە و ئاڼەی تەر شەرعیەت بە خیانەتکاریەکاشا بەخشیۆ، ڕەنگە کردەوێوە نەشیاو بۆ کە ۋەرا ۋەر بە گەلەکەیما بکریۆ. پۊکەی پێناسەی دروس ئانەنە کە پێگەو حەقەتینەو بارزانیەکا جە وڵاتپارێزینە بشناسیۆ واتە جە بەرژوەندی گەلوو کورڎینە کارشا کەرڎە یان بەرژوەندی ئەرەگیرانە.

هەمیشە پەشتیش بە هێزە بیانییەکا بەستەن

بارزانیەکۍ حەجگیز نوێنەرایەتی ویست و داواکارییەکا کوردیشا نەکەرڎەن. ئاڎۍ حەجگیز خاوەن ئیراڎەو ۋێشا نەبیێنۍ و بەردەوام پەشتیشا بە هێزە بیانییەکا بەستەن. ئاڎۍ گەرەکشا بیەن گلېرگەو کوردی پا جۆرە بێ ئیراڎە و مەحکووم بە هامکاری و تەسلیمبیەیشا بکەرا. بارزانیەکۍ هەمیشە پېسە دژە سەرهۊردای و شۆڕشی زەرەرشا بە گەلوو کورڎی یاۋنان و بەردەوام هەوڵو ئانەیشا دان پەرە بە هامکاری و بڕەمای و تەسلیمیەتی بڎا. چی ڕوانگۆ بارزانیەکۍ ئەرکو دژە شۆڕشی و سەرهۊردایشا جە گلېرگەو کوردینە جابەجێ کەرڎەن سەرو ئا بنەمایۍ هرووژمشا کەرڎەن سەرو شۆڕشەکا پانیشتی و ۋەرکۊتوو کورڎەسانی و شۆڕشو کورڎەسانیا هۊرشێونانۆ. ئیساتۍ جە کەسایەتی پەکەکەینە بە شێوێوە فرە قیزەون دەسشا بە هەرجۆرە هامپەیمانیێوەو چنی دەوڵەتو ئەرەگیری و مرۆڤکوژی پېسە تورکیای کەرڎەن پەی دلېنەبەرڎەو شۆڕشو سەرنیشتوو کورڎەسانی، چی ڕوۆ بارزانی و پەدەکە جەلادۍ و بکوژۍ شۆڕشگێڵنا و سەرهۊردایەکا کورڎەسانینۍ.

جەنگەکێشا دژ بە کورڎی ئازاڎینۍ

ئەرکی سەرەکی بارزانیەکا و پارتی سەرو بنەماو دژایەتیکەرڎەی ئەرەکۊشای ئازاڎیوازی کورڎەسانیا، هەمیشە دژو جمیەرو ئازادیوازی کوردی پېسە ئەرکێوە مردێنێوە. ئۆلیگارشی بنەیانەو بارزانی ۋێش بە خاوەنی گۆرەو کورڎەسانی مزانۆ. گەرەکش بۍ ڕێکوزیا شۆڕشگێڵنیەکا کورڎەسانی بە ۋێشۆ لکە بڎۆ تا بتاوا سەرەتا شانبەشانو ئەرەگیرا کورڎەسانی خزمەتشا بکەرا. بارزانی و پارتی بەهەمان عەقڵییەتۆ چنی تەڤگەری ئازاڎیی کورڎەسانی نزیکۍ بیێوە و جەنگ بەینشانە قۆمیا، جە کاتێنە کە جە قۆناغو گروپێوەنە بۍ جە ڕاو ڕێکوزیاو ستێرکا سووری و دماتەر جە ڕاو kuk وە هرووژمش کەرڎ سەر و هەوڵو دلېنەبەرڎەی سەرهۊردای جمیەرو ئازاڎیوازی کوردیش دا. ساڵەو ١٩٨٣ڕێککۆتننامێوە سیاسیش سەرو فراوانبیەی جمیەرو ئازاڎی کورڎی پەی ۋەرکۊتوو مېیامینی و ئەرەمەرزنایش جە پانیشتوو کورڎەسانینە ئیمزا کەرڎ، بەڵام چنی هۊرگیسیای جەنگی و ئەرەکۊشای چەکڎاری جە ١٥و ئابو ١٩٨٤پەدەکە تەرسا و داواش جە ڕابەر ئاپۆی کەرڎ کە جەنگ مردنۆ ئەگینا سەرو بنەماو ئا قەولەی کە بە ئەرەگیراش دان دەس بە جەنگکەرڎەی چنی جمېیەرو ئازاڎیی کورڎی مکەرۆ. کاتێ پەکەکە جەنگو گەریلایی ۋێش دژو دەوڵەتو ئەرەگیرو تورکی فراوانتەر کەرد و گورزێوە جەرگبڕەش ۋنەو دژمنی دا، جە چوار پارچەو کورڎەسانینە هێز و پەشتیوانیش پېڎا کەرڎ. بارزانی و پەدەکە ئینەشا پنە قبووڵ نەکریا. عەقڵییەتو بارزانی کە ۋێش بە خاوەن و گۆرەو کورڎەسانی مزانۆ قینی و کینەش ۋەرا ۋەر بە پەکەکەی و ئا قەولەی کە بە ئەرەگیرا کورڎەسانیش دابۍ دژمنایەتی بارزانی چنی پەکەکەی دەسش پنەکەرڎ و گۊرەتەر بی، دژمنایەتی پەدەکەی و بارزانیەکا جە دژمنایەتی حکومەتو تورکیای دژ بە پەکەکەی زیاتەرا. بارزانی جە قسەکاشەنە پەی ۋەرپەرسا تورکیای، ماچۆ "پەکەکە وەڵۍ شمەنە دژمنو ئێمەن" ئا حەقەتینەیە ئاشکرا مکەرۆ.

دیبلۆماسی چنی دۆڵەتو تورکیای

بارزانیەکۍ و پارتی چنی کۆمارو تورکیای پەی دڵنیابیەی چانەی کە پەکەکە سەرو ئاستی مېیاندەوڵەتی پېسە "ڕێکوزیێوە تیرۆریستی" بشناسیۆ و وزیۆنە لیستو تیرۆریۆ چالاکی دیپلۆماسی ۋەرفراوانشا ئەنجامدا. جە ئاکامو هەوڵە قیزەونەکاشا، جمیەرو ئازاڎیی کورڎەسانی جە ئاستی مېیاندەوڵەتینە پېسە "ڕێکوزیێوە تیرۆریستی" ئشناسیا و چالاکیەکێش قەڎەغە کریۍ. هەرپاسە پەدەکە جە ڕاو پیلانگێڵنی مېیاندەوڵەتیوە دەورێوە گرنگش بۍ جە ڕادەسکەردەیۆ ڕابەر ئۆجالانی بە کۆمارو تورکیای. دەسپنەکەرڎەیۆ ئەرەکۊشای چەکڎاری تەڤگەرو ئازاڎی جە ١و حوزەیرانو ٢٠٠٤ ینە کۆمارو تورکیایش تووشو شۆکی کەرڎ و نیگەرانیێوە گۆرەش پەی پەدەکەی وەشکەرڎ .

چنی حکومەتو تورکیای هامپەیمانیش وەشکەرڎ

حکومەتو ئەرەگیرو تورکی بەمەڵامەتو سیاسەتو قڕکەردەی دژ بە گەلوو کورڎی، گەرەکش نەبۍ بە ڕسمی دڎان بە پانیشتوو کورڎەسانیرە بنیۆ، ئامانجش ناستەی پێگەو فیدرالی بۍ جە هەرێمەکەنە. هەرچڼە دەسپنەکەرڎەیۆ ئەرەکۊشای چەکڎاری جە لایەنو جمیەری ئازاڎیی کورڎەسانیوە پلانەکۍ کۆمارو تورکیایش پووچۍ کەرڎۍ، حکومەتو تورکی گەرەکش بۍ هێزو ۋێش و جمیەرەکەی بە دەسپنەکەرڎەی هرووژمێوە تازەی جبەرو سنووریۆ جە زاپەنە کە جە ٢١شوباتو ٢٠٠٨ ڕوەشدا تاقی بکەرۆوە. سوپاو تورکی بە مەڵامەتوو مڎرامانوو گەریلاکاوە و وستەیرە وارو هەلیکۆپتەری جەنگی کۆبرای و دەیان سەروازۍ کوشیۍ جە جەنگێوە یەک حەفتەیینە ناچار جە ٢٨و شوباتو ٢٠٠٨ ینە پاشەکشەش کەرڎ. ئینە پەی حکومەتو تورکیای فرە قورس بۍ.

دماو ئی شکسەیە دۆڵەتو تورکیای ئەرەگیری دڎانش نیا پێگەو پانیشتوو کورڎەسانیرە و عیلاقەی ڕسمیش چنی وەشکەرڎ و بێگومان جە ۋەرا ۋەرو ئی دڎان نیایپۊرەینە پەدەکە جارێوەتەر شانبەشانو کۆمارو تورکیای جە دژو جمیەری ئازاڎیی کورڎی پېسە ئانەی جە ۋییەرڎەنە کەردش جەنگ مکەرۆ. بەتایبەتی جە ساڵەو ٢٠١٢ ینە چنی دەسپنەکەرڎەو شۆڕشو ۋەرنیشتی و چڕبیەیۆ جەنگی گەریلایی پەدەکە لایەنگری ۋێش پەی دۆڵەتو ئەرەگیرو تورکی نیشانەدا. شکسش جە ۋەرا ۋەرو داعشینە جە ساڵەو ٢٠١٤ ینە و جە ۋەرا ۋەرو حکومەتو عێراقی دماو ڕیفراندۆمی سەربەخۆیی جە ساڵەو ٢٠١٧ ی بی بە مەڵامەتوو کەلەبەرۍ گۆرۍ پەی پەدەکەی و هەوڵو چارەسەری جە ئامێزو دەوڵەتو تورکینە وینێوە. سەرو ئا بنەمایۍ پەدەکە دژ بە پەکەکەی جە پانیشتوو ۋەرنیشت و شەنگاڵینە چنی دۆڵەتو تورکی دەسش بە جەنگی خیانەتکارانەی کەرڎ. هەرچڼە جەنگەکە جە سەرەتانە بە شێوێوە سەرەکی هەواڵگری و ئایدۆلۆژی بۍ، چنی هرووژمی سەروازی پەی سەرو هەرێمو زینی وەرتێ جە ساڵەو ٢٠٢٠ و هەرێمەکا گارەی جە ساڵەو ٢٠٢١، بەڵام جە ماوەو ٢٠٢٢-٢٠٢٣ێنە، ئیساتۍ پەدەکە چنی دۆڵەتو ئەرەگیرو تورکی بیەن بە بەشێوە گرنگ جە جەنگی چالاکەنە دژ بە گەریلاکا ئازاڎیی کورڎەسانی.

قسۍ سەرو پێکئاماو دۆڵەتو کورڎی دروێنە

بنەیانەو بارزانی و پارتی قەد وەرگیریشا جە ئازاڎیی و سەربەخۆیی کورڎەسانی نەکەرڎەن و قسەوباسشا سەرو ئەرەمەرزنای دۆڵەتێوە کوردی دروێنە و پەی پارێزنای بەرژەوەندی بنەیانەیی بەکارش بەرا. پېسە عەرەبەکا دەسەڵاتداریێوە پاشایانەشا گەرەکا. ئامانجشا بە قوربانی کەرڎەی پارچەکا تەرو کورڎەسانیا و دلېنەبەرڎەی هێزە شۆڕشگێڵنەکان. بنەیانەو بارزانی و پارتی کە جمیەرو ئازاڎیی کورڎی بە منافس و ڕەقیبو ۋێشا مزانا هامکاری گرڎ ئەرەگیرێوە کورڎەسانی مکەرا و بەردەوامێنۍ پەی دلێنەبەرڎەی ئا جمیەرەیە. ئەڵبەتە ئێمە وڵاتپارێزنا دلۍ پەدەکەی جە هۊرسەنگنایەکامانە دوورۍ وزمێوە و مەبەسما ئاڎۍ نییەنۍ. ئەگەر ئی هرووژمە هامبەش و هامکاریۍ بنەیانەو بارزانی و پەدەکەی بە هەڵوێسی تنو گەلوو کورڎی و ڕای گرڎی ڕانەگیریۆ ئانە کورڎەسان باجێوە فرە مڎۆ، ئی خاکە دماو جەنگی جیهانی یەرەمی ئینا چېرو تەرسەو مەنەی و نەمەنەینە مشۆم گرڎ کورڎێوە وڵاتپارێز ئانەی بزانۆ کە ئەگەر خیانەتو بارزانی و پەدەکەی بێکاریگەر نەکریۆ، زەرەری ستراتیجی بە کوردی میاونۆ و مشۆم پا جۆرە هەڵسوکۆت بکریۆ.

ۋەرو چێشی ئەردۆغان سوپاسو بارزانیەکا مکەرۆ؟

پەدەکە گرڎو پەنەوازیە چێرخانیەکا و هەواڵگرییەکا دۆڵەتو ئەرەگیرو تورکی مەیسەر مکەرۆ. جە هرووژمەکا دژوو گەریلاکانە، ئاڵاو حکومەتو تورکیای و پەدەکەی شان بە شانو یۆترینی شۆکیۆوە. پەدەکە شارەکێش پەی سوپاو ئەرەگیرو تورکی کەردێنۍ و بەرەو هەرێمەکا گەریلای ڕاشا پەی وەش مکەرۆ و پێوەرە جە دژو گەریلاکا ئازاڎیی کورڎی جەنگ مکەرا، پێناسەکەرڎەی بنیات و پێکئاماو پەدەکەی کە بکوژو هەزاران کەسایەتی وڵاتپارێزنی و کادیر و گەریلاین مشۆم چا ڕوانگۆ بکریۆ. ئەگەر تەنیا پېسە هامکاری و لایەنگری باسش بکریۆ شێونای ڕاسی و حەقێقەتین. ۋەرو ئانەینە کە ئەردۆغانی سەرۆک کۆماری مرۆڤکوژو تورکی بە ئاشکرا سوپاسو پەدەکەی مکەرۆ کە چنی حکومەتو تورکیای جە کوشتەی وڵاتپارێزنا، سەرمەشقەکا، گەریلا، زاوڵا و ژەنا کورڎی هامکاریشا کەرڎەن، ۋەرو خزمەتەکاش بە دژمنی فاشیستو تورکی کە گەرەکشا کوردا کۆمکوژ بکەرۆ، سوپاسو بارزانیەکا مکەرۆ. پەنەوازا گرڎوو وڵاتپارێزا کورڎی چا ڕوانگۆ ۋیر بکەراوە کە ئەردۆغانی بکوژ کە ڕوانە زاوڵۍ و ژەنیما جە ۋەرنیشتوو پانیشتەنە کوشۆ، پەی ۋێش سوپاسو بارزانیەکا مکەرۆ، پۊکەی یوەمین پرەنسیپی وڵاتپارێزنی ئانەنە کە هەڵوێسێوە کرداریی و بەرجەسە جە ۋەرا ۋەرو خیانەتو بارزانی و پەدەکەینە نیشانە بڎریۆ.

'بەشی دووەم جە ڕوانی ئاینڎەنە منریۆرە'