دکتۊر محەمەد نور و دکتۊر ئازاد ڕەشۊ واتشا:"بە تەوقدای حکومەتوو دیمەشقی و هجوومەکاو دەوڵەتوو تورکی سیاسەتێوە گڵیاو کریۊ، گەرەکشانە خەسەخانەکاو سەرنیشت و وەرکەوتوو سوریای نەتاوا خزمەتگوزاریی پێشکەش بە گەلی کەرا".
هجوومەکاو ئی دماییەو دەوڵەتوو تورکی زەرەری فرەش بە وێستگەو دابینکەرڎەی ئۊکسجینی یاونا، کە دەیان خەسەخانۍ بەکارش ئارێنۍ، هەرپاسە زەرەرێوە فرەش بە سەنتەروو چارەسەروو گورچیلەی یاونان، کە خزمەتگوزاری بە زیاتەر جە ١٠٠ نەوەشا پێشکەش کەرێ. جە ئەنجاموو هجوومەکەینە سەرجەموو ئامێرەکاو خەسەخانەکەی جە هەرمانە کەوتێنێ. بەهەمان شێوە کۊبانێنە هجووم کریا و فرەو ئامێرەکا جە هەرمانە کەوتێ. یۊ چا سەنتەرا بۊردومان کریان خەسەخانەو مانگۍ سورێن کە ٤٠٠نەوەشێش چەنە بێنۍ بۊنەو ئینەیوە سەیارە فریاگوزارییەکێچ جە هەرمانە کەوتێنێ.
هامسەرۊکوو لوجنەو تەندروسیی سەرنیشت و وەرکەوتوو سوریای دکتۊر محەمەد نور و هامسەرۊکوو ڕاوەبەریی تەندروسیی عەفرینی و شەهبای دکتۊر ئازاد ڕەشۊ سەبارەت بە ئامانجی گردینوو هجوومەکا پەی سەروو چێرخانوو هەرێمەکەی قسێشا پەی ئاژانسوو فوراتی کەرڎە.
دکتور محەمەد، ئاماژەش پانەیە کەرد، سوپای ئەرەگیرەو تورکی جە ڕاو بەئامانجگێرتەی ئەرەمەرزیایەکاوە، چێرخان و خزمەتگوزارییەکاو سەرنیشت و وەرکەوتوو سوریای گەرەکشا گلێرگە و ئیرادەو وێڕاوەبەری وێڕاوەبەری لاواز کەرۊ و واتش:"فرەو ناوەند و ئەرەمەرزیا تەندروسییەکا خزمەت بە گلێرگەی کەرێنۍ، گرد بوردومانۍ کریۍ، خەسەخانەو جوەیدەی، وێستگەی سەرەکیی ئۊکسجینی قامیشلۊنە، ناوەندی دووەم کانتۊنوو کۊبانێنە و چند ناوەندێوە تەرۍ بۊردومانۍ کریێ.
'مشۊم لایەنە پەیوەندیدارەکۍ وەراوەروو هجوومەکاوە بێدەنگیی ماڕا و ڕووبەڕوێش باوە
دکتۊر محەمەد ئاماژەش پانەیچ دا،کە دەوڵەتی ئەرەگیروو تورکی بە ئەنقەست چێرخان و ناوەندە تەندروستییەکا کەرۊ ئامانج، حەرچندە بە پاو گردوو یاسا و ڕێککەوتەینامە میاندەوڵەتییەکا هجوومکەرڎەی سەروو ناوەندە خزمەتگوزارییەکا قەدەغەن، وەلۍ دەوڵەتی ئەرەگیروو تورکی گردوو یاساکا پاشێلۍ کەرۊ. تا ئەرەمەرزیا تەندروستییەکا بارێوە خاسنە با و بەرڎەوامۍ با جە خزمەتگوزارییەکاشا، فرەو ئەرەمەرزیا، پارت و ڕێکوزیا میاندەوڵەتییەکا پاڵپەشتییشا کەرڎەن. متاومۍ بواچمۍ گردوو ئی ئەرەمەرزیایا پێوەسێنۍ بە مافەکاو ئینسانیوە".
گەمارۊو حکومەتوو سوریای کارەساتێوە مرۊییش چۊوە گنۊوە
هامسەرۊکوو ڕاوەبەرو تەندروسیی عەفرینی و شەهبای دکتۊر ئازاد ڕەشۊ زانیارییش سەروو ئانەیە دا، کە دماو کۊچوو ئەرەنیشتاو عەفرینی پەی شەهبای، ئەرەنیشتاو عەفرینی بە پاو فرسەتی ئیساتۍ خەسەخانێوە گولانەشا کەرڎەنۊ، پەنەوازیۍ گلێرگەکەی کەم تا فرە دابینۍ کەرۊ، چند ساڵێوەن دەوڵەتوو تورکی ئەرەگیری بەرڎەوام هەرێمەکاو شەهبای بۊردومانۍ کەرۊ، ئینە جگە جە گەمارۊی سیستماتیکوو حکومەتوو دیمەشقی، کاریگەرییش سەروو ئەرەنیشتاو ئی هەرێمەیە بەگردی و ئاوارەکاو عەفرینیچ، کاریگەرییش سەروو کەرتی تەندروستییچ نیانرە. خەسەخانێوە تەر شارۊچکەو تل ڕفعەتینە بۊردومان کریان و ئەنجامنە ئەندامێوە پزیشکەکەی بریندار بییەن".
ڕەشۊ دمایینە داوا وەنەو دەسەڵاتداراو وەڵاتە وەرپەرسا کەرۊ پەی ماڕای ئی گەمارۊیە و مردنای هجوومەکا هەوڵۍ بدا.
