بە پاو هەواڵێوە تۆڕەو مافەکا مرۆڤوو کوردسانی شەوەو شەممەی دێرۍ ١٣و نیسانی (٢٥و نەورۊزی) ژمارێوە کۆڵبەرۍ جە بەرزاییەکاو خەتەو سنووری نزیک بە دەگاو بەیتوشی سەردەشت-ینە کۊتێنۍ ۋەروو دەسڕێژوو گولـلا هێزەکاو پاسەوانوو سنووری ئێرانی.

ئانەیچ وزیان ڕووە کە کۆڵبەرێوە تەمەن ٢٠ ساڵ بە نامۍ مێهرداد عەبدوڵا زادەی کە خەڵکوو دەگاو مارەغانی بیەن بە مەڵامەتوو ۋەرکەوتەو گولـلېوە جە سەختینە کۊتەنەرە وار و عەمرەو خوڎایش کەردێنە.

هاموەخت جە مەنتیقە سنووریی بەستامی سەر بە شاروو سەقزیچنە کۆڵبەرێوە خەڵکوو شاروو سنەی بە نامۍ ئومێد سەعیدی جە تەرەفوو هێزەکاو پاسەوانوو سنووری ئێرانیوە تەقەش ۋنەکریا و عەمرەو خوڎایش کەردە. هێزەکاو ئێرانی دماو تەقەکەردەی چا کۆڵبەریە هەر چا یاگېنە جیاشا ئاست و دماتەر جەنازەکەش جە تەرەفوو مەردمیوە ئېزیاوە.

جە سەرەتاو ساڵەی کوردییوە، واتە جە ماوەو کەمتەر جە مانگېنە ٤ کۆڵبەرۍ تەرۍ بە تەقەو هێزەکاو دەوڵەتوو ئێرانی جە مەنتیقە سنوورییەکا بانەی و نەوسوڎێنە کوشیێنۍ و پەنج کۆڵبەرېچ بە مەڵامەتوو رەقبیەیۆ، مرداو دڵی و کۊتەیرە واری جە بەرزاییۆ عەمرەو خوڎایشا کەردێنە.

بەپاو ئامارێوە تۆڕەو مافەکا مرۆڤی جە ساڵەی ۋیەردۍ کوردییەنە ٣٩ کۆڵبەرۍ و کاسبکارۍ کوردی بە تەقەو هێزەکاو ئێران کوشیێبێنۍ و لاو کەمیۆ ١٠ کۆڵبەرۍ و کاسبکارېچ بە رووەدای جیاجیای پېسە کۊتەیرە واری جە سەختینە، رەقبیەیۆ و خنیکیایۆ عەمرەو خوڎایشا کەردۍ بۍ، هەر چا ساڵېنە ٣٦٥ کۆڵبەرېچ بە رووەدای جیاجیا زامڎارۍ بیۍ، کە فرەیشا بە تەقەو هێزەکاو دەوڵەتیۆ کریێبێنۍ ئامانج.