دویسبۆرگەنە پەی گەشمەرداو چاپەمەنیی ئازادی پەرسە نریارە
بنەیانەو تارێ پەی گەشمەردە ڕۆنامەنویسا گوڵستان تارێ و هێرۆ بەهادینی، کە دەوڵەتوو تورکی گەشمەردێ کەردێ، شاروو دویسبۆرگوو ئەڵمانیاینە پەرسە و سەرەوەشییشا قبووڵ کەرد.
شاروو دویسبۆرگوو ئەڵمانیاینە پەی ڕۆنامەنویسا گوڵستان تارێ و هێرۆ بەهادینێ، کە هجوومی عاسمانی دەوڵەتوو تورکینە مەنتێقەو سەیدسادەقوو شارو سلێمانیینە، گەشمەردی کریێ پەرسە نریارە. مەراسیمەکە ناوەندوو جڤاکوو کوردی دیموکراتیکوو دویسبۆرگینە و مەجلیسوو ژەناو ئاسیا یوکسەلینە کریا، واڵێ گەورێ گوڵستان تارێ، ئولکەم ئیسەنە بەشدارەو مەراسیمەکەی بێ.
فرەو ڕۆنامەنویسا و نوێنەراو ڕێکوزیایەکا بەشدارێ مەراسیمەکەی بێنێ، ڕسموو گوڵستان تارێ و هێرۆ بەهادینێ هورواسیا.
ڕۆنامەنویس ئایسەل ئاڤێستا ئەرەیاوناش هامڕێکێما گرد هەلومەرجێونە دژوو فاشیزمی مکۆشیا و واتش:" ئەنجاموو هەوالگێریی خیانەتیوە و هجوومو دەولەتوو تورکیوە گەشمەردێ کریێ،پێسەو هامڕا ڕۆنامەنویسەکاشا، قەڵەم و کامێرەکاشا پەی حەقیقەتی بەکارمارمێ، وەراوەروو گردو هجوومەکاو دوژمنیوە مردمێوە".
واڵێ گوڵستان تارێ ئولکەم ئیسەنە، واتش: "گوڵستانە فرە دڵسۆزەو دۆزەکەیش بێ، حەرگیز سازش سەرۆ نەکەرێ، شەرەفمەندەنا کە هامرێکێش و ڕای گردین پێسە بە هینەو وێشا مزاناش".
زەماو گوڵستان تارێ، ئیدریس ئیسەن ئەرەیاوناش کۆشیای و ڕەنجوو گوڵستان تارێ پەیشاشکۆێوی گەورەن و چا ڕێنە مدرامان مکەرا.
هامسەرۆکوو ناوەندوو جڤاکوو کوردی دیموکراتیکوو دویسبۆرگی، یەڵماز ڕۆنی واتش: "هامرێکێما ئەنجاموو هامکاریی بنەیانەو بارزانیوە پەی دەوڵەتوو تورکی گەشمەردێ بیێ، پەنەوازا ئیتر ئی خیانەتە بوینیۆ".
ئا ڕۆنامەنویسێ چەنی گوڵستان تارێ خەباتشا کەردەن و نزیکۆ ئشناسێنێش، قسێشا کەردێ و کەسێتی و خەباتشا هورسەنگنا.
