ڕێکوستەی پارتوو یەکسانی و دیموکراسی گەلا (دەم پارتی)ی ئاگری، جە مێڎانوو دۆرتیۆلینە "نەورۆزوو ئێژاو ئاگری و دماین گلێرۊبیەی" ئەنجام مڎۆ. جە سەعاتەکا سەرەتاو ڕۊینە، بە هەزاران کەسۍ جە دووۍ قۆڵێوە بە ڕاپیمای مجیێرە مێڎانوو نەورۆزی. گەنجەکۍ بە هۊرکەردەو شۊڵەچراوەو ئێری ڕەنگەشا بەخشا بە مێڎانەکەی. بەشدارا مێڎانەکەی بە جل و بەرگی تایبەتیوە، بە بەردەوامی درووشمەکا "بژیۋۆ سەرۆک ئاپۆ" و "پەکەکە گەلا، گەل ئینا چۍ" بەبەرزی واچێنێوە. حەرپاسە ئەنداماو ئەنجومەنوو گەنجا دەم پارتی لافیتەو "ئیتر حیچ هێز و کەسێوە مەتاوۆ زۋان و چاندما پەشتگۊش وزۆ"شا بەرزکەردۆ.

مێڎانەکە جە وەختۍ فرە کەمەنە پەڕبی جە خەڵکی و جەماوەری گەل بە گۆرانییەکانیاشا زەماۋنەشا گێڵنا.

دماو دەیەقێوە ڕێزگێرتەی پۍ یاڎوو گەشمەرڎا، کۆمیتەی ئاماڎەکار و هامسەرۆکوو دەم پارتی شارەکەی سڵامشا جە گەلی کەرد. دماتەر کاندیدوو دەم پارتی هامشارەوانی ئاگری محمەد ئاکووش قسێش کەردۍ و واتش: "کەس نەمەنەن دەسەڵات نەگێرۊش، ئێمە نەلایمۍ سەروو یانەو کەسی، پرۆژەو ئێمە ڕۊشنا و پۍ گرڎ کەسیما ڕۊشنکەردەنۆ، پرۆژەو ئێمە پرۆژەو بنیاڎنیاین."

دماتەر کاندیدەو هامشارەوانی ئاگری غەزال ئاراسە قسێش کەردۍ و ئاماژەش پانەی دا کە جە ٣١و ئادارینە بە ۋێماو زاوڵەکاماوە ملمۍ سەروو سنووقەکاو دەنگدای.

چالاکەو تەژەئای دیلان گوڤەنچ-ە قسێش کەردۍ و واتش: "مانگەو ئاداری مانگەو مدرامانینە، جە هەمان وەختەنە مانگەو کۆمکوشینە. نەورۆز ڕۊو کۊشیای و مدرامانوو گەلوو کوردین. نەورۆزوو کاوەی، رۆناهیۍ، رەوشەنۍ و سەما یوجەین. جە حەر شۊنێنە تاڵانی و دزی بۆ ئانە مدرامان و کۊشیای چا شۊنێنە هەن. هجوومەکۍ فرۍ بیێنۍ، گۆشەگیری سەروو بەڕێز ئۆجالانی سەختەربیەن، سیاسەتوو جەنگی تایبەتی درێژەش هەن. چێش بۆ با بۆ ئێمە پێشوازیما جە نەورۆزی کەرد و گەلما دەس جە مدرامانوو ۋێش ۋەرمەڎۆ."

جە مبارەکباییەکەنە پەیاموو ڕابەروو گەلوو کوردی کە پۍ نەورۆزوو ٢٠١٣ دابێش، ۋنیاوە.

گلێرۊبیەکەی بە جۆش و خرۆشێوە فرۆ بەردەواما.