جە شارو سلێمانیۍ سەر بە پانیشتو کوردستانی، ئەرەمەرزیاو (کەریم عەلکە)ی، ئاشکراش کەرد: دوەمین ”دیدارو ئەدەب و کولتووری هەورامانی" بە پشتیوانی دارایی (د. تەها ڕەسوڵ)ی و سەرپەرشتی شاخەوان سدیق-ی و هامکاری سوهەیب ڤاروق-ی شاعیری، ئەنجام مڎۆنە. 
ئەرەمەرزیاکە ئاشکراش کەردەن: دیدارەکە ئەشیەی زووتەر ئەنجام بڎریێ، بەڵام بە هۆکارو ئا بارودۆخەیە جە وەراسانو کوردستانی و ئێرانی ئامانە ئارا، دما ۋزیا. جە ئیسەنە سەرجەم ئامادەکاریەکۍ پەی سازکەردەی دیدارەکەی تەمامیێنۍ و بە ئی زووانە ئەنجام بڎریۆنە.

ئێساڵ دیدارەکە تایبەتەن بە مامسا (جەمال بێدار)ی نۋیسیار و زۋانزانی و جە میانشەنە چنڎین نۋیسەرۍ ئەکادیمیسەنۍ و شارەزۍ جە ئەدەب و کولتووری هەورامی هەم جە پانیشتو کوردستانی و هەم جە وەراسانو کوردستانی بە بابەتۍ و پەیجۆرۍ بەشدارۍ ببانۍ

بابەتۍ و پەیجۆرە بەشداربییەکۍ بە ئی جۆرە ئاشکرۍ کریێنۍ:

١- پەیوەندیی میانو "زۋانی و زار و شێوەزار"ی کوردی، گۆرانی، هەورامی بە نموونە.. دکتۆر بێستوون حەسەن.. ماسا جە زانشتاگاو سلێمانیۍ.

٢-شۆڕشە ڕۆشنگەرییەکەو هەورامانی.. حەمەکەریم هەورامی/ نۋیسەر.

٣- هۆرسەنگنای جوگرافیی پەی دەرامەتو ئاۋۍ جە هەورامانەنە و ڕۆڵش جە ڤیاری گەشتیارییەنە.. ڕێباز لوقمان مستەفا/ مسیارو دکتۆرای.

٤- ئەۋەوانیێۋ پەی داستانو یوسف و زوڵێخا-ی.. لوقمان کەریم/ ماستەر جە ئەدەبیاتو زانشتگاو سنەی.

٥- شیعرۍ خانەقایی و سەرنجێۋ.. هۊمایۊن ساحێب/ نۋیسەر و پەیجۆرکار.

٦- ڕەوتوو شیعرۍ نۊو هەورامیۍ..سابیری عەزیزی/ نۋیسەر و شاعیر.

٧- گەشەی ئەوەمەنە و بوومی و ڕەسەن.. ئازاد ئەمینی/ پەیجۆرکار.

٨-پێوەنو شیعرۍ و مۆسیقای.. ئەرشەد یامەولا/پەیجۆرکار، هونەرمەند و موزیسیەن.

٩-کاریگەریی فیلمی دۆکیۆمێنتەری سەرو گلێرگەو هەورامانی.. پەروێزی ڕوستەمی/ بەرئاۋەری سینەمایی و سینەماکار.

١٠-چەنی زۋانەکەیمان پارێزنمۍ؟.. جەلیل عەباسی/ نۋسەر و پەیجۆرکار و شاعیر.