دیمەنو ساتە وەختو هجومی بە بۆمبی ئەتۆمی تاکتیکی ۋەڵاکریاۋە
دەوڵەتو تورکی ئەرەگیری ڕۊو ١٣و تەمووزی بە بۆمبی ئەتۆمی تاکتیکی هجومش کەرڎ سەرو سەنگەرەکا گەریلای. تاۋاما دیمەنو ئا هجومیە بەدەسبارمۍ کە بە بۆمبی ئەتۆمی تاکتیکی ئەنجامدریان.
ڕۊو ١٣و تەمووزی سەعاڎ ١٠:١٢ دەیەقۍ سوپاو تورکی ئەرەگیری بە بۆمبی ئەتۆمی تاکتیکی هجومش کەرڎ سەرو سەنگەرەکا گەریلای جە مېڎانو مدرامانو کەشو ئێف ئێمی جە هەرێمو گەشمەرڎە دەلیلی جە ۋەرنیشتوو زاپی سەر بە هەرێمەکا پارېزناو مەدیای و دیمەنو ئا هجومەیچە یاۋا دەسو ئاژانسو هەواڵی فورات (ANF)ی. دیمەنەکە جە لایەنو خەڵکو مەنتیقەکەی و گەریلاکاوە تۆمار کریان. جە دیمەنەکانە کاریگەری ئەرەتەقای بۆمبی ئەتۆمی تاکتیکی پیۋیۊ.
ناوەنڎو یاۋنەری و چاپەمەنی هەپەگەی جە ئەرەیاۋناو ڕۊو ١٤و تەمووزینە ئی زانیارییەشە وستەبۍ ڕۋە، "سوپاو تورکی ئەرەگیری جە ١١ و ١٣و تەمووزینە بە بۆمبی ئەتۆمی تاکتیکی قەڎەغە کریا، ۋەرنیشتو و ۋەرکەوتوو زاپیش بۊمبۋاران کەرڎەن. دەنگو ئەرەتەقایۊ بۊمبەکەی جە دوری چن کیلۆمەترېۋە ژنەویان و کاریگەری ئەرەتەقیۊکەی مەنتیقېۋە فراوانش گېرتەنۊ".
فەرمانڎەیی قەرارگەو ناوەنڎی پارېزناو گەلی موراڎ قەرەیلانیچ ڕۊو ١٢و تەمووزی جە هۊرسەنگنایېنە پۍ ئاژانسەکەیما سەرنجش وستەبۍ سەرو چەکی قەڎەغە کریای کە سوپاو تورکی بە کارش مارۊ و پی جۊرە ۋاتەبېش: "
" نزیک بە دۋۍ ساڵ و نیمین بە سەڎان هەزار جارۍ بۊمبۋارانشا کەرڎەن، گرڎ جۆرە ماڎېۋە کیمیایی بەکارئامان، بۆمبی تێرمۆباریک بەکارئامان، بۆمبی فسفۆڕ هۊردریان، چی دماییەیچەنە بۆمبی ئەتۆمی تاکتیکی کە تەنیا جە لیستو ناتۆینە ۋینیۊ و بە گڵۆپو سەوزو ناتۆی تاۋیۊ بەکاربۍ، دژ بە هێزەکاما جە زاپ، ئاڤاشین و مەتینا بەکارئامېنۍ"
هجومەکۍ سوپاو تورکی ئەرەگیری بە بۆمبی ئەتۆمی تاکتیکی، دماو کۊبیەیۊ ناتۆی زیاڎشا کەرڎەن و ئانەیچ یاگۍ سەرنجیا.
هـ . ش
