زینڎانیۍ سیاسیۍ جە زینڎانەکاو سەرنیشتو کوردستانی و تورکیاینە پەی دەسەبەرکەرڎەی ئازاڎیی جەستەیی ڕابەرو گەلو کوردی عەبدوڵا ئۊجالانی و ورگێرتەی گۊشەگیری، جە ٢٧ تشرینو دووەم/ نۊڤەمبریوە دەسشا بە چالاکیی مانگێرتەی جە وارڎەی کەرڎەن و چالاکییەکە هەشتەم ڕۊشنە بەرڎەواما. کۊمەڵەو پەشتیوانی جە بنەیانەو زینڎانییا (توئای-دەر) بە مەبەسو پاڵپەشتی جە زینڎانییە مانگێرتا دەسشا بە "ئێشکگێریی دادپەروەری" کەرد.

چالاکیی ئێشکگێریی بە دروشمو "پەی دادپەروەری گۊشەگیری تێکمدەیمۍ، پەی ئاشتیی کۊمەڵایەتی بیمۍ بە دەنگو زینڎانییا" دەسش پەنە کریا. سەبارەت بە ئێشکگێرییەکەی جە ناوەندو توئای-دەرینە ئامەدنە کۊنفڕانسی رۊنامەوانی ساز کریا و نوێنەراو پارتە سیاسییەکا، ڕێکوزیا و ئەرەمەرزیا مەدەنییەکا بەشدارییشا کۊنفڕانسەکەنە کەرد.

هامسەرۊکو مەد توهاد-فەد کەرەم جانپۊڵات کارڎایوەش وەراوەر بە پۊلیسەکا نیشانە دا، کە هەوڵێشا دۍ ڕاگێری وەنەو کۊنفڕانسە ڕۊنامەوانییەکەو  وەرڎەموو کۊمەڵەکەیشا کەرا و واتش، جە سەرجەمو لەقەکاو کۊمەڵەو توهاد-فەدینە دەس بە ئێشکگێری کەرا و واتیچش، "ئیساتێنە گردما ئینایمۍ گۊشەگیریینە و ئا دیمەنەو ئارۊیچە بە ڕاگێریی پۊلیسی خوڵقیان بەڵگەن سەرو ئانەیە".

درێژەنە جانپۊڵات واتش، کە ڕابەرو گەلو کوردی عەبدوڵا ئۊجالان ماوەو ٣٣ مانگان هیچ هەواڵێوەش مەزانیۊ و واتش، "زینڎانیییە سیاسییەکۍ تا سەرنجەو ڕای گردینی بەرەو لاوگۊشەگیری کێشا دەسشا بە مانگێرتەی جە وارڎەی کەرڎەن. ئێمەیچ گەرەکمانە زیاتەر بیمۍ بە دەنگو زینڎانییا. داوا کەرمۍ ڕای گردین زیاتەر سەروو ئا بابەتە هەستیارەیوە با. تا مانگێرتەکۍ نەکەوتێنۍ دۊخۍ خۊفناکۊ مشۊم خاستەر بیمۍ بە دەنگشا".

بەرڎەوامیی قسەکاشنە جانپۊڵات ئانەش وست ڕووە، "بە پاو ئێمە هۊکار و سەرچەمەو سەرجەمو بنبەس و چەقبەستەیەکاو ئیساتۍ، گۊشەگیری سەرو بەڕێز عەبدوڵا ئۊجالانین. پەی ناستەی ئا دۊخە چەقبەستەیە مشۊم عەبدوڵا ئۊجالان بتاوۊ چەمش گنۊ بە پاریزنەرەکاش و چەنی بنەیانەکەیش کۊ بۊوە و دەنگش بیاوۊ بە ڕای گردینی.قسەکاو بەڕێز ئۊجالانی پەی  ڕای گردینی بەنرخێنۍ و بەهەند ورگیریا. ئاد واتش، 'من متاوو حەفتێوەنە ئا جەنگە کە تورکیانە هەن مردنووش' ئا قسۍ فرە گرنگەنە. ئێمە چەنی ڕێکوزیا و پارتە سیاسییەکا دەس بە ئێشکگێری کەرمۍ.  گرد یەرەڕۊ جارێوە ئێشکگێرۍ یاگەواڕاڵی کەرا و بە نۊرە ئێشک گێرا".

کۊنفڕانسە ڕۊنامەوانییەکە بە دروشمەکاو "بژیوۊ مدرامانو ئیمراڵی" و "بژیوۊ مدرامانو زینڎانەکا" دماییش ئاما.

دماو کۊنفڕانسە ڕۊنامەوانییەکەی دەس بە ئێشکگێریی کریا.